ແຕ່ງຕັ້ງທ່ານ ວິໄລວົງ ບຸດດາຄໍາ ເປັນຮັກສາການເຈົ້າແຂວງຈໍາປາສັກ

489

ໃນຕອນເຊົ້າວັນທີ 3 ເມສາ 2020 ຢູ່ທີ່ສະໂມສອນແຂວງຈໍາປາສັກ ໄດ້ຈັດພິທີປະກາດພະນັກງານການນຳແຂວງ 6 ສະຫາຍອອກພັກການ-ຮັບອຸດໜູນບໍານານ ໂດຍການເຂົ້າຮ່ວມຂອງ ທ່ານ ພັນຄໍາ ວິພາວັນ ກໍາມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ, ມີບັນດາຮອງລັດຖະມົນຕີ,​ ຮອງຫົວໜ້າຄະນະຈັດຕັ້ງສູນກາງພັກ,​ ມີບັນດາສະຫາຍການນໍາແຂວງ,​ ການນຳພະແນກການກົມກອງອ້ອມຂ້າງແຂວງ,​ ການນໍາ 9 ເມືອງ,​ 1 ນະຄອນ ແລະ ການນໍາພາກຈາກສ່ວນກ່ຽວຂ້ອງເຂົ້າຮ່ວມ.

ໃນພິທີ, ໄດ້ປະກາດພະນັກງານການນຳແຂວງ 6 ສະຫາຍ ອອກພັກການ-ຮັບອຸດໜູນບໍານານ ຄື: ສະຫາຍ ບຸນຖອງ ດີວິໄຊ ກໍາມະການສູນກາງພັກ ເລຂາພັກແຂວງເຈົ້າແຂວງໆຈຳປາສັກ; ສະຫາຍ​ ສົມສະໜິດ​ ບຸດຕິວົງ ຮອງເລຂາພັກແຂວງ ຮອງເຈົ້າແຂວງໆຈຳປາສັກ;

ສະຫາຍ ນິພອນ ວຽງປະເສີດ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ​; ສະຫາຍ​ ບົວສອນ ວົງສອງຄອນ ຄະນະປະຈຳພັກແຂວງ ຮອງເຈົ້າແຂວງໆຈຳປາສັກ; ສະຫາຍ ສຸລິວັນ ສະຫວັດທະສິນ ຄະນະປະຈຳພັກແຂວງ; ສະຫາຍ ບຸນມາກ ວິລະວົງ ຄະນະປະຈຳພັກແຂວງ.

ພ້ອມນີ້, ຍັງໄດ້ປະກາດແຕ່ງຕັ້ງພະນັກງານນຳພາຂັ້ນສູງຂອງແຂວງຄື: ແຕ່ງຕັ້ງ ສະຫາຍ ວິໄລວົງ ບຸດດາຄໍາ ກຳມະການ​ສູນກາງ​ພັກ​ ກຳມະການ​ປະຈຳສະພາແຫ່ງຊາດ, ປະທານກໍາມາທິການແຜນການ-ການເງິນ ແລະ ກວດສອບສະພາແຫ່ງຊາດ ເປັນເລຂາພັກແຂວງ ຮັກສາການເຈົ້າແຂວງໆຈຳປາສັກ ແລະ ແຕ່ງຕັ້ງ ສະຫາຍ ມະໄລທອງ ກົມມະສິດ ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ ເປັນກຳມະການປະຈຳພັກແຂວງຈຳປາສັກ.​

(ເນື້ອໃນ-ພາບ: ດາວພະຈັນ​ ໄຊຍະວົງ)