ພາກທຸລະກິດມອບເຄື່ອງວັດແທກອຸນຫະພູມ ມູນຄ່າ 159 ລ້ານ ຊ່ວຍວຽກງານຄວບຄຸມພະຍາດໂຄວິດ-19 ທີ່ສະຫວັນນະເຂດ

532

ພາກສ່ວນນັກທຸລະກິດ ມອບເຄື່ອງວັດແທກອຸນຫະພູມ ມູນຄ່າ 159 ລ້ານກີບ ເພື່ອປະກອບສ່ວນເຂົ້າໃນວຽກງານຄວບຄຸມ ແລະ ຕ້ານການແຜ່ລະບາດຂອງພະຍາດໂຄວິດ-19 ພາຍໃນແຂວງສະຫວັນນະເຂດ.

ເພື່ອເປັນການປະກອບສ່ວນຄວບຄຸມ ແລະ ຕ້ານການແຜ່ລະບາດຂອງພະຍາດອັກເສບປອດຍ້ອນເຊື້ອຈຸລະໂລກສາຍພັນໃໝ່ ຫຼື ໂຄວິດ 19 ມາໃນຕອນບ່າຍວັນທີ 2 ເມສາ 2020ນີ້ທີ່ຫ້ອງວ່າການປົກຄອງແຂວງສະຫວັນນະເຂດ ບັນດານັກທຸລະກິດຈາກຫຼາຍພາກສ່ວນພາຍໃນແຂວງສະຫວັນນະເຂດໄດ້ນຳເອົາເຄື່ອງວັດແທກອຸນຫະພູມຮ່າງກາຍ ມາມອບໃຫ້ການນໍາຂອງແຂວງ ໂດຍມີ ທ່ານ ສີພັນດອນ ມີໄຊ, ທ່ານ ຕຸລາໄຊ ວໍລະຈິດ, ທ່ານ ຄຳພູມີ ມີໄຊ , ທ່ານ ວົງສະຫວັນ ວໍລະຈິດ ໄດ້ນຳເອົາມີເຄື່ອງວັດແທກອຸນຫະພູມຮ່າງກາຍຄົນລະ 50 ເຄື່ອງ, ລວມເປັນ 200 ເຄື່ອງ ຄິດໄລ່ເປັນມູນຄ່າທັງໝົດ 150 ລ້ານກີບ ແລະ ກຸ່ມຄົນໄທໃນສະຫວັນນະເຂດຮ່ວມກັບສະໂມສອນໂຟວິຣໄດຣ ໄດ້ມອບເຄື່ອງວັດແທກອຸນຫະພູມຮ່າງກາຍ ຈຳນວນ 10 ເຄື່ອງ ລວມມູນຄ່າ 9.000.000 ເຊິ່ງລວມມູນຄ່າເປັນເງິນທັງໝົດ 159 ລ້ານກີບ

ໂດຍການໃຫ້ກຽດກ່າວຮັບ ຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ໂອກາດນີ້ທ່ານ ເຈົ້າແຂວງ ກໍ່ໄດ້ສະແດງຄວາມຂອບໃຈມາຍັງ ພາກສ່ວນນັກທຸລະກິດທີ່ເຫັນໄດ້ເຖິງຄວາມສຳຄັນໃນການປະກອບສ່ວນຊ່ວຍເຫຼືອ ຄວບຄຸມ ແລະ ຕ້ານການແຜ່ລະບາດຂອງພະຍາດອັກເສບປອດ ຫຼື ໂຄວິດ19 ພາຍໃນແຂວງສະຫວັນນະເຂດພວກເຮົາ, ເຄືື່ອງທີ່ນໍາມາມອບໃນຄັ້ງນີ້ແມ່ນ ຈະໄດ້ມອບໃຫ້ພະແນກສາທາລະນະສຸກແຂວງ ແລ້ວ ນໍາໄປມອບຕໍ່ໃຫ້ບັນດາເມືອງຕ່າງໆທີ່ມີສູນກັກກັນຢ່າງທົ່ວເຖິງ, ໃນນັ້ນແຂວງສະຫວັນນະເຂດມີ ສູນກັກກັນທັງໝົດ 396 ສູນ ມີຜູ້ຖືກກັກກັນຈໍານວນ 18.665 ຄົນ ຍິງ 9.438 ຄົນ, ປະຈຸບັນແມ່ນຍັງບໍ່ພົບຜູ້ຕິດເຊື້ອພະຍາດໂຄວິດ 19 ພາຍໃນແຂວງສະຫວັນນະເຂດ.