ນັກລົງທຶນກໍ່ສ້າງເຂື່ອນໄຟຟ້າ ມອບລົດຮັບສົ່ງຄົນເຈັບ ຮັບໃຊ້ວຽກງານສາທາລະນະສຸກ

504

ພາກສ່ວນນັກລົງທຶນກໍ່ສ້າງເຂື່ອນໄຟຟ້າ​ໄດ້ ມອບລົດຮັບສົ່ງຄົນເຈັບຈຳນວນ 3 ຄັນ ມູນຄ່າ 156,000 ໂດລາສະຫະລັດ ໃຫ້ແກ່ກະຊວງສາທາລະນະສຸກ ໃນວັນທີ 31 ມີນາ 2020 ເພຶ່ອມາຮັບໃຊ້ວຽກງານດ້ານສາທາລະນະສຸກ.

 ລົດຈຳນວນ 3 ຄັນ ນີ້ຈະໄດ້ມອບຕໍ່ໃຫ້ສາທາລະນະສຸກແຂວງບໍລິຄຳໄຊ, ຊຽງຂວາງ ແລະ ໄຊສົມບູນ ເພຶ່ອມາຮັບໃຊ້ວຽກງານຂະແໜງ ສາທາລະນະສຸກຢູ່ເຂດຫ່າງໄກສອກຫຼີກຂອງແຂວງດັ່ງກ່າວ, ເຊິ່ງລົດດັ່ງກ່າວແມ່ນໄດ້ມາຈາກການປະກອບສ່ວນຂອງບໍລິສັດຈະເລີນເຊກອງພະລັງງານຈຳກັດ ແລະ ການລະດົມ ຈາກບໍລິສັດພົງຊັບທະວີ ຈໍາກັດຜູ້ດຽວ ແລະ ບໍລິສັດແສງເພັດເກັບກູ້ລະເບີດຈຳກັດ.

ລົດຮັບສົ່ງຄົນເຈັບດັ່ງກ່າວມອບໂດຍຕ່າງໜ້າພາກສ່ວນນັກລົງທຶນກໍ່ສ້າງເຂື່ອນໄຟຟ້າ ແລະ ຮັບໂດຍ ຮອງສາດສະດາຈານ ດຣ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ພ້ອມດ້ວຍພະນັກງານຈາກ ພາກສ່ວນທີ່ກ່ຽວຂ້ອງເຂົ້າຮ່ວມ. ໃນໂອກາດນີ້ ດຣ ບຸນກອງ ສີຫາວົງ ໄດ້ກ່າວ ສະແດງຄວາມຂອບໃຈ ມາຍັງທຸກພາກສ່ວນທີ່ໃຫ້ການສະໜັບສະໜູນຊຸກຍູ້ເຂົ້າໃນການພັດທະນາວຽກງານດ້ານສາທາລະນະສຸກ.

ຂ່າວ-ພາບ: ເພັດໂພໄຊ