ດ່ວນ! ພົບຜູ້ຕິດເຊື້ອໂຄວິດ-19 ຄົນທີ 10 ແລະ ຍັງມີຜູ້ໃກ້ສິດສຳພັດ180 ກວ່າຄົນ

991

ຕົວເລກຜູ້ຕິດເຊື້ອໂຄວິດ-19 ຂອງ ສປປ ລາວ ວັນນີ້ ເພີ່ມຂຶ້ນອີກ 1 ຄົນ ເຮັດໃຫ້ລວມຍອດຜູ້ຕິດເຊື້ອທັງໝົດເປັນ 10 ຄົນ ແລະ ຍັງມີຜູ້ຢູ່ໃນກໍລະນີໃກ້ສິດສຳພັດ 180 ກວ່າຄົນ

ວັນທີ 1 ເມສາ 2020 ທີ່ກະຊວງສາທະລະນະສຸກ ໄດ້ມີການຖະແຫຼງກ່ຽວກັບສະພາບການລະບາດຂອງພະຍາດໂຄວິດ-19 ຢູ່ໃນ ສປປ ລາວ ໂດຍ ທ່ານ ຮສ ດຣ. ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ຜູ້ປະຈຳການຄະນະສະເພາະກິດຄວບຄຸມພະຍາດໂຄວິດ-19 ພ້ອມຄະນະດ້ວຍ ແລະ ມີບັນດາສື່ມວນຊົນເຂົ້າຮ່ວມ.

ທ່ານ ຮສ ດຣ. ພູທອນ ເມືອງປາກ ກ່າວວ່າ: ການເຝົ້າລະວັງການລະບາດຂອງພະຍາດໂຄວິດ-19 ໃນ ສປປ ລາວ ມາຮອດວັນທີ 1 ເມສາ 2020 ພົບຜູ້ຕິດເຊື້ອອີກ 1 ຄົນ ອາຍຸ 21 ເພດຍິງ ຢູ່ບ້ານ ໜອງສະໂນຄຳ ເມືອງສີໂຄດຕະບອງ ນະຄອນຫຼວງວຽງຈັນ ເຊິ່ງຜູ້ກ່ຽວແມ່ນໄດ້ມີປະຫວັດພົວພັນ ແລະ ຕິດເຊື້ອຈາກ ຜູ້ຕິດເຊື້ອທີ່ 8 ທີ່ໄດ້ລາຍງານຜ່ານມາ ມາຮອດປັດຈຸບັນລວມຜູ້ຕິດເຊື້ອທັງໝົດໃນປະເທດລາວ ມີ 10 ຄົນ ຈາກການກວດວິເຄາະຫາເຊື້ອທັງໝົດ 437 ກໍລະນີ. ພ້ອມທັງໄດ້ຄົ້ນຫາຜູ້ໃກ້ສິດ ແລະ ສຳພັດຜູ້ຕິດເຊື້ອ ໄດ້ແລ້ວ 186 ຄົນ.