ສາລະວັນ ຮຽກຮ້ອງໃຫ້ເປັນເຈົ້າການຍົກລະດັບການປ້ອງກັນ ພະຍາດໂຄວິດ-19

537
ໃນວັນທີ 30 ມີນານີ້, ທ່ານ ສີສຸວັນ ວົງຈອມສີ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງສາລະວັນ ມີຄວາມເປັນຫ່ວງເປັນໄຍພໍ່ແມ່ປະຊາຊົນ ທີ່ອາດຈະໄດ້ຮັບຜົນກະທົບໃນການດຳລົງຊີວິດ ໃນຫຼາຍດ້ານ ແລະ ເປັນຫ່ວງດ້ານສຸຂະພາບຂອງປະຊາຊົນ ໃນໄລຍະທີ່ພະຍາດໂຄວິດ-19 (covid-19) ແຜ່ລະບາດຢ່າງກວ້າງຂວາງໃນຫຼາຍໆປະເທດ. ເພື່ອເຮັດໃຫ້ການຕ້ານ, ສະກັດກັ້ນພະຍາດໂຄວິດ-19 ໃຫ້ມີສິດທິຜົນ ຮຽກຮ້ອງມາຍັງຄະນະນຳທຸກຂັ້ນຂອງແຂວງ, ອົງການປົກຄອງເມືອງ 8 ຕົວເມືອງ, ຂະແໜງການຕ່າງໆທີ່ກ່ຽວຂ້ອງ ແລະ ອຳນາດການປົກຄອງບ້ານທຸກໆບ້ານ, ແພດໝໍ ເອົາໃຈໃສ່ໃກ້ຊິດຕິດແທດ ແລະ ເຝົ້າລະວັງ, ຕິດຕາມສະພາບການຕ່າງໆ ພ້ອມທັງລາຍງານໃຫ້ຂັ້ນເທີງຮັບຊາບຢ່າງຕໍ່ເນື່ອງ ແລະ ຈິງຈັງ.
ນອກຈາກນັ້ນຍັງໄດ້ຮຽກຮ້ອງໃຫ້ຂະແໜງການທີ່ກ່ຽວຂ້ອງ ໂດຍສະເພາະແພດໝໍ ເອົາໃຈໃສ່ຕິດຕາມ, ແຮງງານທີ່ກັບມາຈາກປະເທດໄທ ໃນສູນກັກຕົວໃນແຕ່ລະເມືອງ, ຕ້ອງໃຫ້ຄວາມເບີ່ງແຍງດູແລ ດ້ານທີ່ຢູ່-ພັກເຊົາ, ອາຫານການກິນ ແລະ ການກວດເຊັກສຸຂະພາບ ເພື່ອວັດແທກອຸນຫະພູມ ແລະ ເຝົ້າລະວັງຕິດຕາມອາການຕ່າງໆຢ່າງໃກ້ຊິດ.
ໂດຍປະຕິບັດຕາມຄຳສັ່ງຂອງນາຍົກລັດຖະມົນຕີ ເລກທີ 06/ນຍ ລົງວັນທີ 29 ມີນາ 2020 ວ່າດ້ວຍການເພີ່ມທະວີມາດຕະການສະກັດກັ້ນ, ກັນການລະບາດ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19 (covid-19) ມີທັງໝົດ 18 ຂໍ້ ປະຕິບັດຢ່າງເຂັ້ມງວດ ແລະ ໃຫ້ມີສິດທິຜົນ ເພື່ອຄວາມປອດໄພຕໍ່ຊີວິດ, ຊັບສິນ ແລະ ສັງຄົມ.
ໂດຍໃນບາງຂໍ້ໃນລະບຸໄວ້ວ່າ: ໃຫ້ພະນັກງານ-ລັດຖະກອນ ຢຸດການມາເຮັດວຽກຢູ່ຫ້ອງການ ແຕ່ວັນທີ 1-11 ເມສາ 2020 ແລະ ສືບຕໍ່ພັກບຸນປີໃໝ່ລາວ ຮອດວັນທີ 19 ເມສາ 2020 ຍົກເວັ້ນທະຫານ, ຕຳຫຼວດ, ເຈົ້າໜ້າທີ່ດັບເພີງ, ພະນັກງານຮັບຜິດຊອບລະບົບບໍລິການໄຟຟ້າ, ນ້ຳປະປາ, ການສື່ສານ, ແພດໝໍ, ອາສາສະໝັກ ພະນັກງານຜູ້ທີ່ໄດ້ຮັບມອບໝາຍປະຈຳການ ແລະຜູ້ສະກັດກັ້ນ, ກັນການລະບາດ, ຄວບຄຸມ ແລະ ປີ່ນປົວຜູ້ຕິດເຊື້ອພະຍາດ ແລະ ຫ້າມໃຫ້ປະຊາຊົນ, ພະນັກງານ, ລັດຖະກອນ, ທະຫານ, ຕຳຫຼວດ, ກຳມະກອນ, ນັກຮຽນ-ນັກສຶກສາ, ຜູ້ປະກອບການຊາວຕາງດ້າວ, ຕ່າງປະເທດ ທີ່ຢູ່ ສປປ ລາວ ອອກຈາກເຮືອນ ຫຼື ທີ່ພັກອາໄສຂອງຕົນ.
ທ່ານເຈົ້າແຂວງສາລະວັນ ຍັງຮຽກຮ້ອງມາຍັງທຸກພາກສ່ວນໃນສັງຄົມ ກັກຕົນເອງໃຫ້ຢູ່ເຮືອນໃນໄລຍະ 10 ກວ່າວັນ ແຕ່ວັນທີ 1-19 ເມສານີ້ ເພື່ອປ້ອງກັນ ແລະ ຫຼຸດຜ່ອນການແຜ່ລະບາດຂອງພະຍາດໂຄວິດ-19 ໃນທົ່ວສັງຄົມ ກໍ່ຄືແຂວງສາລະວັນ ຈົ່ງພ້ອມກັນອົດທົນ, ຜ່ານຜ່າວິກິດນີ້ ແລະ ເປັນເຈົ້າການ, ໃຫ້ການຮ່ວມມືກັບບັນດາພະນັກງານທີ່ເຮັດໜ້າທີ່ຕ້ານ ແລະ ປ້ອງກັນພະຍາດດັ່ງກ່າວ, ຫຼັງຈາກນັ້ນກໍ່ຈະຜ່ານມາໄປດ້ວຍກັນ.
ນອກນີ້ເພື່ອປົກປ້ອງຜູ້ບໍລິໂພກ ບໍ່ໃຫ້ຖືກເອົາລັດເອົາປຽບຈາກພໍ່ຄ້າແມ່ຄ້າ ທີ່ສວຍໂອກາດຂຶ້ນຄາສິນຄ້າຕາມລຳພັງໃຈ ໃນຍາມບ້ານເມືອງພົບຄວາມເດືອດຮ້ອນ, ຕ້ອງໄດ້ມີມາດຕະການເດັດຂາດໃນການຄຸ້ມຄອງສິນຄ້າ ແລະ ສືບຕໍ່ເກັບກຳສະຖິຕິດ້ານແຮງງານ ທີ່ກັບມາຈາກຕ່າງປະເທດ ໃນແຕ່ລະບ້ານແຕ່ລະເມືອງ ຢ່າງເຂັ້ມງວດ ແລະ ມອບໃຫ້ອຳນາດການປົກຄອງບ້ານ ເປັນເຈົ້າການຢ່າງແຂງແຮງ ໃນການລາຍງານສະພາບຄວາມຈິງໃນແຕ່ລະບ້ານ ພ້ອມທັງແນະນຳໃຫ້ເຕົ້າໂຮມເອກະສານເດີນທາງ, ພາດສະປອດ ແລະ ອື່ນໆ ເພື່ອເກັບຮັກສາຄຸ້ມຄອງໄວ້ກ່ອນ ແລະ ວຽກງານໃນດ້ານອື່ນໆຢ່າງຮີບຮ້ອນ.
#ໂດຍວິໄລວອນ