ອ່າງເກັບນໍ້າຫ້ວຍວັງເຫ ເມືອງໂພນທອງ ສໍາເລັດການກໍ່ສ້າງໄລຍະທີI

527

ໃນວັນທີ 20 ມີນາ 2020 ນີ້ ກົມຊົນລະປະທານກະຊວງກະສິກໍາ ແລະ ປ່າໄມ້ ນໍາໂດຍທ່ານ ບຸນຄໍາ ສີດາວົງ ຫົວໜ້າກົມຊົນລະປະທານ ຮ່ວມກັບພະແນກກະສິກໍາ ແລະ ປ່າໄມ້ແຂວງຈໍາປາສັກ ນໍາໂດຍທ່ານ ບົວລີ ເພັດສົງຄາມ ຫົວໜ້າພະແນກກະສິກໍາ ແລະ ປ່າໄມ້ແຂວງຈໍາປາສັກ, ມີທີປຶກສາໂຄງການ, ຫົວໜ້າໂຄງການ, ຫົວໜ້າບໍລິສັດຮັບເໝົາກໍ່ສ້າງ ແລະ ພາກສ່ວນທີ່ກ່ຽວຂ້ອງຂັ້ນສູນກາງ, ຂັ້ນແຂວງ ແລະ ເມືອງ ໄດ້ລົງຕິດຕາມກວດກາໂຄງການ ຊົນລະປະທານອ່າງເກັບນໍ້າຫ້ວຍວັງເຫ ເມືອງໂພນທອງ ແຂວງຈໍາປາສັກ ພາຍຫຼັງສໍາເລັດການກໍ່ສ້າງໃນໄລຍະທີ1.

ຊົນລະປະທານອ່າງເກັບນໍ້າຫ້ວຍວັງເຫແມ່ນຕັ້ງຢູ່ເມືອງໂພນທອງ ແຂວງຈໍາປາສັກ ຫ່າງຈາກເທສະບານນະຄອນປາກເຊ ໄປທາງທິດຕາເວັນຕົກສ່ຽງໃຕ້ປະມານ 38 ກິໂລແມັດ ແລະ ຫ່າງຈາກຫ້ອງວ່າການເມືອງໂພນທອງປະມານ 20 ກິໂລແມັດ ໂຄງການດັ່ງກ່າວເປັນບູລິມະສິດຂອງແຂວງຈໍາປາສັກ ກໍ່ຄືຂອງລັດຖະບານ, ຫົວງານເປັນປະເພດເຂື່ອນດິນ ເພື່ອກັກເກັບນໍ້າສະໜອງນໍ້າໃຫ້ແກ່ເນື້ອທີ່ການຜະລິດກະສິກໍາແບບໄຫຼເອງ ໃນລະດູຝົນ2.500 ເຮັກຕາ, ລະດູແລ້ງ 1.500 ເຮັກຕາ, ກວມເອົາ 10 ບ້ານ, ເທົ່າກັບ 1.327 ຄອບຄົວ, ມີພົນລະເມືອງທັງໝົດ 8.114 ຄົນ ໂຄງການນີ້ມີມູນຄ່າທັງໝົດ 387 ຕື້ກວ່າກີບ ໂດຍໄດ້ຜ່ານສະພາແຫ່ງຊາດລາວຮັບຮອງເຂົ້າແຜນລົງທຶນຂອງລັດໃນສົກປີ 2012-2013.

ທ່ານ ປອ.ວິນວິໄລ ໄຊຍະພອນ ທີ່ປຶກສາໂຄງການໄດ້ລາຍງານໃຫ້ຮູ້ວ່າ: ໄລຍະກໍ່ສ້າງໄດ້ແຈ້ງອອກຄື: ໄລຍະທີ1 ກໍ່ສ້າງລະບົບຫົວງານ ມູນຄ່າ 120 ຕື້ກີບ ໂດຍແມ່ນບໍລິສັດ ສາມັກຄີໄຊກໍ່ສ້າງຈໍາກັດ ເປັນຜູ້ຮັບເໝົາກໍ່ສ້າງຕາມສັນຍາສືບຕໍ່ກໍ່ສ້າງສະບັບເລກທີ 0973/ຊປທ, ລົງວັນທີ 30 ພຶດສະພາ 2017 ກໍ່ສ້າງໄລຍະທີ 1 ມູນຄ່າ 120 ຕື້ກີບ ໄລຍະເວລາໃນການຈັດຕັ້ງປະຕິບັດໂຄງການ 36 ເດືອນ ເລີ່ມແຕ່ວັນທີ 29 ພຶດສະພາ 2017-29 ພຶດສະພາ 2020 ມາຮອດປັດຈຸບັນການຈັດຕັ້ງປະຕິບັດໂຄງການສໍາເລັດຕາມແຜນການຮ້ອຍສ່ວນຮ້ອຍ. ສ່ວນການຈັດຕັ້ງປະຕິບັດໂຄງການໄລຍະທີ2 ແມ່ນຍັງຢູ່ໃນຂັ້ນຕອນຄວາມພ້ອມດ້ານຕ່າງໆຄາດວ່າຈະເລີ່ມລົງມືກໍ່ສ້າງໃນມໍ່ໆນີ້.

ຂ່າວ-ພາບ: ມີນາ