ເຈົ້າໜ້າທີ່ຕຳຫຼວດຈັບໄດ້ແລ້ວ ຜູ້ກໍ່ເຫດທຳຮ້າຍຮ່າງກາຍຊາຍສູງອາຍຸຈົນເສຍຊີວິດທີ່ສວນປະຕູໄຊ

887

ເພຈຂ່າວຄວາມສະຫງົບ Lao Security News ເປີດເຜີຍໃນວັນທີ 1 ເມສາ 2020 ນີ້ວ່າ ເຈົ້າໜ້າທີ່ຕຳຫຼວດສາມາດຈັບກຸມທ້າວ ໄຊ ວຽງໄຊ ຫຼື ເງິນ 45 ປີ ຢູ່ບ້ານບໍ່ໂອ, ເມືອງຫາດຊາຍຟອງ ນະຄອນຫຼວງວຽງຈັນ ພາຍຫຼັງຜູ້ກ່ຽວກໍ່ເຫດທຳຮ້າຍຮ່າງກາຍ (ເຕະະກ້ານຄໍທ້າວ ສີສະໝຸດ (ຜູ້ເຄາະຮ້າຍ) ທີ່ເສຍຊີວິດຢູ່ປະຕູໄຊ.
ສ່ວນຄຳໃຫ້ການຕ່າງໆ ແລະ ສາເຫດຈູງໃຈໃນການກໍ່ເຫດຈະລາຍງານໃຫ້ທ່ານຊາບ ຫຼັງຈາກເຈ້າໜ້າທີ່ສືບສວນຄາດຕະກອນສຳເລັດແລ້ວ

ກ່ອນໜ້ານີ້ ເວບໄຊໜັງສືພິມວຽງຈັນໃໝ່ ອອກຂ່າວ່າ: ກໍລະນີທີ່ພົບຊາຍນິລະນາມນອນເສຍຊີວິດໂດຍບໍ່ຮູ້ເສຍເຫດຢູ່ບໍລິເວນປະຕູໄຊ ໃນຕອນເຊົ້າວັນທີ 30 ມີນາ 2020 ຜ່ານມາ ເຮັດໃຫ້ປະຊາຊົນພາກັນແຕກຕື່ນຫຼາຍພໍສົມຄວນ ເນື່ອງຈາກວ່າຜູ້ທີ່ເສຍຊີ ວິດນັ້ນແມ່ນມາຈາກໃສ ແລະ ເສຍຊີວິດຍ້ອນສາຍເຫດອັນໃດ ຫຼາຍໆທ່ານທີ່ຊາບຂ່າວ ແລະ ເຫັນລົງ ໃນເຟສບຸກ ກໍເກີດຄວາມບໍ່ສະບາຍໃຈ ຄິດວ່າຜູ້ກ່ຽວນັ້ນອາດຕາຍຍ້ອນຕິດເຊື້ອພະຍາດ COVID-19 ກໍເປັນໄປໄດ້ ເພາະຢູ່ໃນໄລຍະຂອງການແຜ່ລະບາດຂອງພະຍາດດັ່ງກ່າວນີ້.

ຈາກການລົງກວດສອບສະຖານທີ່ເກີດເຫດຂອງເຈົ້າໜ້າທີ່ ເພື່ອເກັບກຳຂໍ້ມູນຫຼັກຖານ ໂດຍສະເພາະ ກ້ອງວົງຈອນປິດໃກ້ຈຸດເກີດເຫດທີ່ຈະເປັນຫຼັກຖານຕົວຈິງຂອງການເສຍຊີວິດ ຈຶ່ງຮູ້ວ່າ: ເວລາປະມານ 00:12 ໂມງຂອງວັນທີ 30 ມີນາ 2020 ຜູ້ເສຍຊີວິດໄດ້ມີປາກສຽງກັບຊາຍຄົນໜຶ່ງ (ຜູ້ກໍ່ເຫດ) ຈົນເຖິງ ຂັ້ນລົງມືທຳຮ້າຍຮ່າງກາຍກັນ ໂດຍອີກຝ່າຍໄດ້ເຕະເຂົ້າກ້ານຄໍຂອງຜູ້ເສຍຊີວິດໜຶ່ງບາດເຂົ້າຈຸດສຳຄັນ ເຮັດໃຫ້ຜູ້ກ່ຽວລົ້ມລົງທັງຢືນ ແລະ ໝົດສະຕິ ຈາກນັ້ນ ໄດ້ມີຜູ້ຊາຍອີກຄົນເຊິ່ງເປັນຄົນທີ່ຢູ່ໃນເຫດການ ແລະ ເຫັນເຫດການທີ່ເກິດຂຶ້ນທັງໝົດ ເຂົ້າມາຊ່ວຍເຫຼືອຊາຍຜູ້ເຄາະຮ້າຍດັ່ງກ່າວ ໂດຍເຂົ້າມາຫາມໄປ ນັ່ງຢູ່ຕັ່ງເພື່ອເບິ່ງອາການ ແຕ່ກໍບໍ່ໄດ້ນຳສົ່ງໄປໂຮງໝໍ ຫຼື ໂທລະສັບຫາໜ່ວຍກູ້ໄພມາຊ່ວຍເຫຼືອແຕ່ ຢ່າງໃດ ເຮັດໃຫ້ຊາຍຜູ້ເຄາະຮ້າຍນັ້ນເສຍວິດໃນເວລາຕໍ່ມາ.

ປັດຈຸບັນ ທາງເຈົ້າໜ້າທີ່ຕຳຫຼວດ ປກສ ແມ່ນໄດ້ຈັບຕົວຜູ້ກໍ່ເຫດໄດ້ແລ້ວ