ເມືອງທ່າແຕງ ປະກາດແຕ່ງຕັ້ງ ແລະໂຍກຍ້າຍພະນັກງານການນໍາຫຼາຍຕໍາແໜ່ງ

448

ໂດຍຕອບສະໜອງຕາມຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່, ຫຼາຍອົງການຈັດຕັ້ງນັບທັງສູນກາງລົງຮອດທ້ອງຖິ່ນ ບັນດາສຳນັກງານອົງການຈັດຕັ້ງກໍ່ໄດ້ມີການປັບປ່ຽນ, ໂຍກຍ້າຍໜ້າທີ່ພະນັກງານການນໍາ ທັງນີ້, ກໍ່ເພື່ອເຮັດໃຫ້ການຈັດຕັ້ງປະຕິບັດວຽກງານໃນຂົງເຂດດັ່ງກ່າວ ໃຫ້ມີປະສິດທິຜົນຍິ່ງໆຂຶ້ນ.

ວັນທີ 26 ມີນາ 2020 ເມືອງທ່າແຕງ ແຂວງເຊກອງ ກໍ່ໄດ້ຈັດພິທີປະກາດແຕ່ງຕັ້ງ ແລະໂຍກຍ້າຍພະນັກງານການນໍາຫຼາຍຕໍາແໜ່ງ ພາຍໃຕ້ການເປັນປະທານຂອງທ່ານ ລົດແກ້ວ ເພັງພູນສະຫວັດ ຮອງເລຂາພັກເມືອງທ່າແຕງ, ທ່ານ ດາວວີ ສວຍທະລັງສີ ກໍາມະການພັກແຂວງ, ຫົວໜ້າຄະນະໂຄສະນາອົບຮົມແຂວງ, ມີຄະນະປະຈຳພັກເມືອງ, ກຳມະ ການພັກເມືອງ, ຕາງໜ້າຈາກພະແນກການອ້ອມຂ້າງແຂວງ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ໃນພິທີທ່ານ ເພັດຕຸລາ ສຸດທິຈັກ ຮອງຫົວໜ້າຄະນະຈັດຕັ້ງເມືອງທ່າແຕງ ໄດ້ຂຶ້ນຜ່ານຂໍ້ຕົກລົງຂອງທ່ານເຈົ້າເມືອງໆທ່າແຕງ ວ່າດ້ວຍການແຕ່ງຕັ້ງ ແລະໂຍກຍ້າຍພະນັກງານການນໍາ ໂດຍເຈົ້າເມືອງຕົກລົງແຕ່ງຕັ້ງທ່ານ ນາງ ແກ້ວອຸດອນ ດວງມະນີວົງ ຄະນະປະຈໍາພັກເມືອງ, ເປັນຫົວໜ້າຄະນະໂຄສະນາອົບຮົມເມືອງ, ຍົກຍ້າຍທ່ານ ສຸກັນ ຈັນສີປະເສີດ ກໍາມະການພັກເມືອງ, ຫົວໜ້າຫ້ອງວ່າການເມືອງ ໄປເປັນຫົວໜ້າຫ້ອງການກະສິກໍາ ແລະປ່າໄມ້ເມືອງ, ຍົກຍ້າຍທ່ານ ກິແກ້ວ ໄຊຍະສິດ ກໍາມະການພັກເມືອງ, ຫົວໜ້າຄະນະໂຄສະນາອົບຮົມເມືອງ ໄປເປັນຫົວໜ້າຫ້ອງການຍຸຕິທໍາເມືອງ ແລະຍົກຍ້າຍທ່ານ ກິ ສາຍອຸດົມ ກໍາມະການພັກເມືອງ, ຫົວໜ້າຫ້ອງການຍຸຕິທໍາເມືອງ ໄປເປັນຫົວໜ້າຫ້ອງວ່າການເມືອງທ່າແຕງ.

ພ້ອມນີ້, ກໍ່ໄດ້ແຕ່ງຕັ້ງທ່ານ ສິງດໍາ ຄິວລະວົງ ຫົວໜ້າໜ່ວຍງານຮ່ວມມື ແລະສົ່ງເສີມການລົງທຶນ ຂຶ້ນເປັນຮອງຫົວໜ້າຫ້ອງການແຜນການ ແລະການລົງທຶນເມືອງ, ທ່ານ ວຽງສະໄໝ ແກ້ວໄຊຍາ ເປັນຫົວໜ້າໜ່ວຍງານຮ່ວມມື ແລະ ສົ່ງເສີມການລົງທຶນ, ທ່ານ ນາງ ເພັດສະໝອນ ສາຍຕາ ເປັນຫົວໜ້າໜ່ວຍງານບໍລິຫານ ແລະຈັດຕັ້ງ, ທ່ານ ພູທອນ ເຮືອງສະຫວັນ ເປັນຫົວໜ້າໜ່ວຍງານແຜນການ ແລະປະເມີນຜົນ ທີ່ຂຶ້ນຫ້ອງການແຜນການ ແລະການລົງທຶນເມືອງທ່າແຕງ.

ໂດຍ: ພອນ ບຸນອຸທິດ