ກອງປະຊຸມໃຫຍ່ຄັ້ງທີ I ຫນ່ວຍພັກກອງຄຸ້ມຄອງພາສີ 1

561

ຫນ່ວຍພັກກອງຄຸ້ມຄອງພາສີ 1 ແຂວງຫລວງນ້ຳທາ ໄດ້ຈັດກອງປະຊຸມໃຫຍ່ຄັ້ງທີ I ໂດຍການເປັນປະທານຂອງ ສະຫາຍ ບຸນເກີດ ສຸວັນນະເສນ ເລຂາຫນ່ວຍພັກ ກອງຄຸ້ມຄອງພາສີ 1, ເຂົ້າຮ່ວມໂດຍ ສະຫາຍ ອ່ອນຈັນ ຄຳພາວົງ ກຳມະການປະຈຳພັກແຂວງ ເລຂາຄະນະພັກຮາກຖານ ຫົວຫນ້າພະແນກການເງິນແຂວງ, ມີ 3 ອົງການຈັດຕັ້ງພັກ, 3 ອົງການຈັດຕັ້ງມະ ຫາຊົນ, ແຂກຖືກເຊີນ ແລະ ສະມາຊິກພັກພາຍໃນຫນ່ວຍເຂົ້າຮ່ວມ.

   ສະຫາຍ ທອງຫລ້າ ອ່ອນລືໄຊ ຮອງເລຂາຫນ່ວຍພັກກອງຄຸ້ມຄອງພາສີ 1 ໄດ້ຜ່ານບົດລາຍງານການເມືອງໄລຍະ 3 ປີຜ່ານ ມາ ແລະ ທິດທາງແຜນການ 5 ປີ ຕໍ່ຫນ້າປີ 2020 – 2025 ໃນໄລຍະ 3 ປີຜ່ານມາຄະນະຫນ່ວຍພັກກອງຄຸ້ມຄອງພາສີ 1 ໄດ້ຖືເອົາວຽກງານສຶກສາອົບຮົມການເມືອງແນວຄິດເປັນບັນຫາສຳຄັນໃຫ້ແກ່ຖັນແຖວພະນັກງານສະມາຊິກພັກ, ເປັນປົກກະຕິເຊື່ອມຊືມມະຕິກອງປະຊຸມໃຫຍ່ຄັ້ງທີ X ຂອງພັກ, ມະຕິກອງປະຊຸມໃຫຍ່ຄັ້ງທີ VII ຂອງອົງຂະນະພັກແຂວງ, ເປັນເຈົ້າການໃນການຈັດຕັ້ງປະຕິບັດບັນດາແນວທາງນະໂຍບາຍຂອງພັກ, ລະບຽບກົດຫມາຍຂອງລັດ ເປັນເຈົ້າການປະຕິບັດຫນ້າທີ່ວຽກງານດ້ວຍຄວາມຮັບຜິດຊອບສູງ. ຫນ່ວຍພັກກອງຄຸ້ມຄອງພາສີ 1 ມີສະມາຊິກພັກທັງຫມົດ 13 ສະຫາຍ, ຍິງ 2 ສະຫາຍ, ສົມບຸນ 12 ສະຫາຍ, ສຳຮອງ 1 ສະຫາຍ.

ກອງຄຸ້ມຄອງພາສີ 1 ມີຄະນະກອງ 4 ສະຫາຍ ມີຂອບເຂດການຊີ້ນຳໆພາ ຄຸ້ມຄອງ ພະນັກງານ 2 ແຂວງຄື: ແຂວງຫລວງນ້ຳທາ ແລະ ແຂວງບໍ່ແກ້ວ, ການເຄື່ອນໄຫວວຽກງານວິຊາສະເພາະໄດ້ປະຕິບັດສອດຄ່ອງກັບກົດຫມາຍ ແລະ ລະບຽບການ, ອຳນວຍຄວາມສະດວກໃນການສົ່ງອອກ-ນຳເຂົ້າ ສິນຄ້າ, ເຄື່ອງຂອງ ແລະ ຜູ້ເດີນທາງຜ່ານດ່ານ ທັງຮັບປະກັນໃນການຈັດເກັບລາຍຮັບເຂົ້າງົບປະມານໃຫ້ໄດ້ຕາມຄາດຫມາຍວາງໄວ້ ຜ່ານການຈັດຕັ້ງປະຕິບັດໃນໄລຍະ 3 ປີຜ່ານມາເກັບລາຍຮັບໄດ້ 1.682 ຕື້ກວ່າກີບ ປະຕິບັດໄດ້ 93,03%, ວຽກງານປາບປາມ ແລະ ສືບສວນ-ສອບສວນຈັບກຸມສິນຄ້າຫນີພາສີໄດ້ທັງຫມົດ 114 ຄະດີ, ມູນຄ່າ 5.527 ຕື້ກວ່າກີບ, ແກ້ໄຂແລ້ວ 92 ຄະດີ , ຍັງບໍ່ທັນໄດ້ແກ້ໄຂ 22 ຄະດີ, ມູນຄ່າ 2,714 ຕື້ກ່ວາກີບ, ຈັດເກັບລາຍຮັບຄ່າພາສີ-ອາກອນ ແລະ ຄ່າປັບໃຫມໄດ້ 2.264 ຕື້ກວ່າກີບ, ວຽກງານແກ້ໄຂລົດນຳເຂົ້າບໍ່ຖືກຕ້ອງ ແຕ່ປີ 2017-2019 ໄດ້ແກ້ໄຂລົດນຳເຂົ້າບໍ່ຖືກຕ້ອງ ໂດຍປະຕິບັດຕາມແຈ້ງການຂອງກະຊວງການເງິນ ໄດ້ຈຳນວນ 1.045 ຄັນ ມອບເຂົ້າງົບປະມານ 27.411 ຕື້ກວ່າກີບ.

ກວດກາເອກະສານການແຈ້ງເສຍໃນລະບົບອາຊີກຸດະ 297.362 ລາຍການ ກວດພົບເຫັນວ່າບໍ່ໄດ້ເສຍພາສີ-ອາກອນ ແລະ ພັນທະອື່ນໆບໍ່ຄົບຖ້ວນ 16 ຄະດີ, ສາມາດເກັບຄືນໄດ້ 16 ຄະດີ, ເປັນເງິນ 96 ລ້ານກວ່າກີບ.ທິດທາງແຜນການ ໃນ 5 ປີຕໍ່ຫນ້າແມ່ນຈະໄດ້ສືບຕໍ່ສ້າງຫນ່ວຍພັກເປັນຫນ່ວຍພັກ ປອດໃສ ເຂັ້ມແຂງ, ຫນັກແຫນ້ນ ທາງດ້ານການເມືອງແນວຄິດ, ມີຄວາມເຂັ້ມແຂງທາງດ້ານການຈັດຕັ້ງ ແລະ ແບບແຜນວິທີເຮັດວຽກ ຕາມກົນໄກລະບຽບການຄຸ້ມຄອງຫັນເຂົ້າສູ່ລະບົບທັນສະໄຫມເທື່ອລະກ້າວ ການຈັດເກັບລາຍຮັບເຂົ້າງົບປະມານດ້ວຍລະບົບການຄຸ້ມຄອງລະບອບ ບ 53 ດ້ວຍລະບົບ ເພື່ອຄວາມສະດວກ ຄວາມວ່ອງໄວ, ຖືກຕ້ອງ ແລະ ໂປ່ງໃສ ຊັດເຈນ ສາມາດກວດສອບໄດ້ຕາມກົດຫມາຍກຳນົດ.

ຈະສູ້ຊົນສ້າງມະຫາຊົນກ້າວຫນ້າເຂົ້າເປັນສະມາຊິກພັກໃຫ້ໄດ້ 4 ສະຫາຍ. ການຂຸດຄົ້ນຈັດເກັບລາຍຮັບເຂົ້າງົບປະມານ ເພື່ອປະກອບສ່ວນພັດທະນາເສດຖະກິດ-ສັງຄົມ ໄດ້ກຳນົດໄວ້ໃນ 5 ປີຕໍ່ຫນ້າຄື : ແຂວງຫລວງນ້ຳທາໃຫ້ໄດ້ 2.121 ຕື້ກວ່າກີບ ແລະ ແຂວງບໍ່ແກ້ວໃຫ້ໄດ້ 1.502 ຕື້ກວ່າກີບ. ໃນກອງປະຊຸມຍັງໄດ້ປ່ອນບັດຄັດເລືອກເອົາຄະນະພັກຊຸດໃຫມ່ ເຊິ່ງມີຜູ້ສະມັກ 5 ສະຫາຍ ປ່ອນເອົາ 3 ສະຫາຍ ກອງປະຊຸມໄດ້ເຫັນດີເປັນເອກະພາບເລືອກເອົາ ສະຫາຍ ບຸນເກີດ ສຸວັນນະເສນ ເປັນເລຂາຫນ່ວຍພັກຊຸດໃໝ່ ພ້ອມດ້ວຍຄະນະອີກ 2 ສະຫາຍ ເພື່ອຊີ້ນໍາໆພາວຽກງານພັກໃນຕໍ່ຫນ້າ.

ຂ່າວ: ອຸ້ມ ສົມນໍວັນ