ດ່ານສາກົນຂົວມິດຕະພາບ 2 ສະຫວັນນະເຂດ – ມຸກດາຫານ ຍັງເປີດໂອກາດໃຫ້ແຮງງານລາວກັບຄືນປະເທດ

611

ຕາມການລາຍງານຂອງທ່ານ ພັຕ ບຸນເຫຼື່ອມ ໄຊຍະວົງສອນ ຮອງຫົວໜ້າດ່ານ ຕມ ຂົວມິດຕະພາບ 2 ສະຫວັນນະເຂດ-ມຸກດາຫານໄດ້ໃຫ້ສຳພາດຕໍ່ຜູ້ສື່ຂ່າວວິທະຍຸກະຈາຍສຽງແຂວງສະຫວັນນະເຂດຂອງພວກເຮົາໃນຄັ້ງວັນທີ 31 ມີນາ 2020 ນີ້ວ່າ: ປັດຈຸບັນເຖິງແມ່ນວ່າທາງປະເທດເພື່ອນບ້ານ(ປະເທດໄທ) ຈະປິດການສັນຈອນທາງລົດໂດຍສານລະຫວ່າງປະເທດ ແລະ ອອກແຈ້ງການປິດດ່ານສາກົນຂົວມິດຕະພາບ2 ຢ່າງເປັນທາງການແລ້ວກໍ່ຕາມ ແຕ່ກໍ່ຍັງມີແຮງງານລາວເປັນຈຳນວນຫຼວງຫຼາຍ ທີ່ຍັງທະຍອຍກັບຄືນປະເທດຢ່າງບໍ່ຂາດສາຍ ໂດຍການເໝົາລົດຕູ້ບຸກຄົນຈາກກຸງເທບມະຫານະຄອນ ມາຫາດ່ານສາກົນຂົວມິດຕະພາບ2 ເພື່ອກັບຄືນ ສປປ ລາວ ຕໍ່ກັບເຫດການດັ່ງກ່າວທາງເຈົ້າໜ້າທີ່ ທີ່ກ່ຽວຂ້ອງທັງສອງປະເທດຈຶ່ງໄດ້ມີການປະສານສົມທົບ ປຶກສາຫາລືຮ່ວມກັນໃນການເປີດໂອກາດໃຫ້ແຮງງານລາວກັບຄືນປະເທດໃນຊ່ວງໄລຍະທີ່ເກີດມີການລະບາດຂອງເຊື້ອພະຍາດໂຄວິ-19 ເຊິ່ງໄດ້ຕົກລົງອະນຸຍາດໃຫ້ສະເພາະແຮງງານເທົ່ານັ້ນທີ່ສາມາດຂ້າມມາໄດ້ ສ່ວນວ່າບຸກຄົນທົ່ວໄປທີ່ມີເປົ້າໝາຍໄປທ່ຽວ,ໄປຢາມພີ່ນ້ອງ,ໄປຊື້ຂາຍທຳມະແບບປົກກະຕິທົ່ວໄປແມ່ນທາງດ່ານຈະບໍ່ອະນຸຍາດ.

ສຳລັບໂຕເລກແຮງງານລາວທີ່ຂ້າມເຂົ້າມານັບແຕ່ວັນທີ 20 ຫາ ວັນທີ 31 ມີນາ 2020 ມີທັງໝົດ 22.919 ຄົນ ຕ່າງແຂວງ 1.214 ຄົນ ສະເພາະທີ 31 ມີນາ ມີ 925 ຄົນ,ຍິງ 462 ຄົນ ໃນນັ້ນແມ່ນຍັງບໍ່ພົບກໍລະນີສົງໃສຜູ້ຕິດເຊື້ອໂຄວິດ-19 ຈັກຄົນພົບພຽງແຕ່ຜູ້ເປັນໄຂ້ທຳມະດາເທົ່ານັ້ນ.
ສຳລັບແຮງງານລາວທີ່ຂ້າມເຂົ້າມາໃນໄລຍະນີ້ທາງດ່ານຈະອະນຸຍາດໃຫ້ຂ້າມເປັນ 2 ຊ້ວງຄື: ຊ້ວງເຊົ້າແມ່ນເລີ່ມແຕ່ເວລາ 9 ໂມງ ຫາ 12 ໂມງ ແລະ ຊ້ວງບ່າຍ ແມ່ນເລີ່ມແຕ່ເວລາ 17 ໂມງ ຫາ 18 ໂມງເທົ່ານັ້ນ.
ພາບ – ຂ່າວ: ອັກສອນສິນ ພົມມະຈັນ