ກອງປະຊຸມໃຫຍ່ຄັ້ງທີ II ໜ່ວຍພັກລາວໂທລະຄົມ ແຂວງຫຼວງນໍ້າທາ

531

ບໍລິສັດລາວໂທລະຄົມ ມະນາຄົມມະຫາຊົນ ແຂວງຫຼວງນໍ້າທາ ໄດ້ຈັດກອງປະຊຸມໃຫຍ່ໜ່ວຍພັກ ຄັ້ງທີ່ II ໂດຍການເປັນປະທານ ສະຫາຍ ທອງໄຫວ ພອນໄຊຍະວົງ ເລຂາໜ່ວຍພັກ, ເຂົ້າຮ່ວມ ສະຫາຍ ອ່ອນຈັນ ຄໍາພາວົງ ກໍາມະການປະຈໍາພັກແຂວງຫົວໜັາພະແນກການເງິນແຂວງ, ມີ 3 ອົງການຈັດຕັ້ງພັກມະຫາຊົນ, ຕາງໜ້າທະນາຄານສົ່ງເສີມກະສິກໍາ, ທະນາຄານການຄ້າຕ່າງປະເທດລາວມະຫາຊົນ, ຕະຫຼອດຮອດສະມາຊິກພັກພາຍໃນໜ່ວຍເຂົ້າຮ່ວມ.

ທ່ານ ຄໍາແສງ ທໍາມະສອນ ຮອງເລຂາໜ່ວຍພັກ ໄດ້ຜ່ານບົດລາຍການເມືອງຕໍ່ກອງປະຊຸມໃຫ່ຍສະມາຊິກພັກໄດ້ເອົາໃຈໃສ່ຈັດຕັ້ງເຊື່ອມຊືມແນວທາງນະໂຍບາຍຂອງພັກປະຕິບັດໜ້າທີ່ທີ່ໄດ້ຮັບການມອບໝາຍດ້ວຍຄວາມຮັບຜິດຊອບສູງ, ມີຄວາມສາມັກຄີເປັນເອກະພາບ, ຈັດຕັ້ງເຄື່ອນໄຫວວຽກງານຕາມການຊີ້ນໍາຂອງຄະນະໜ່ວຍພັກ, ໜ່ວຍພັກ ບໍລິສັດລາວໂທລະຄົມມະນາຄົມມະຫາຊົນ ມິສະມາຊິກພັກທັງໝົດ 20 ສະຫາຍ, ສໍາຮອງ 2 ສະຫາຍ.

ຜ່ານການດໍາເນີນຊີວິດການເມືອງ ແລະ ປະເມີນສະມາຊິກໃນໜ່ວຍ ຄັ້ງວັນທີ 11 ທັນວາ 2019 ຜ່ານມາສະມາຊີກໃນໜ່ວຍທັງໝົດຖືກຈັດເປັນປະເພດແຂງ 100% ໄດ້ຮັບໃບຢັ້ງຢືນໜ່ວຍພັກ ປອດໃສ, ເຂັ້ມແຂງ, ໜັກແໜ້ນຄັ້ງທີ I , ຮອບທີ I ປະຈໍາປີ 2018, ຄະນະໜ່ວຍພັກໄດ້ພ້ອມກັນເອົາໃຈໃສ່ຊີ້ນໍາໆພາການຈັດຕັ້ງປະຕິບັດໜ້າທີ່ວິຊາສະເພາະດ້ວຍຄວາມຮັບຜິດຊອບສູງປະກອບສ່ວນເຂົ້າໃນການພັດທະນາເສດຖະກິດ-ສັງຄົມເວົ້າລວມເວົ້າສະເພາະຕໍ່ວຽກງານໂທລະຄົມມະນາຄົມ, ເພື່ອປະຕິບັດຕາມແຜນພັດທະນາຂອງລັດຖະບານ, ໃນການຂະຫຍາຍຕາໜ່າງໂທລະຄົມລົງສູ່ເຂດຊົນນະບົດຫ່າງໄກສອກຫຼີກ, ທຸກເມືອງທຸກບ້ານໃຫ້ມີໂທລະສັບໃຊ້.

ມາເຖິງປັດຈຸບັນມີສະຖານີມືຖື 2G ຈໍານວນ 54 ສະຖານີ, 56 ຄໍ, 3ຈີ ຈໍານວນ 73 ສະຖານີ, 4ຈີ ຈໍານວນ 39 ສະຖານີ, 4,5ຈີ ຈໍານວນ 6 ສະຖານີ, ມີເສົາສົ່ງສັນຍານ 52 ຈຸດ, ໄດ້ຂະຫຍາຍສາຍກາບໃຍແສງ ທັງໝົດມີ 817,167 km, ປະຕິບັດລາຍຮັບໄດ້ທັງໝົດ 135 ຕື້ ກວ່າກີບ, ທຽບໃສແຜນການ 1 12%, ປະຕິບັດລາຍຈ່າຍໄດ້ 68 ຕື້ກວ່າກີບ, ທຽບໃສແຜນການ 111%, ດ້ານກໍາໄລປະຕິບັດໄດ້ 67 ຕື້ກວ່າກີບ ແລະ ມອບອາກອນເງີນເດືອນ, ອາກອນຊົມໃຊ້ ແລະ ອາກອນມູນຄ່າເພີ່ມໃຫ້ລັດທັງໝົດ 33 ຕື້ກວ່າກີບ.

ສໍາລັບທິດທາງແຜນການແມ່ນຈະໄດ້ສືບຕໍ່ເສີມຂະຫຍາຍມູນເຊື້ອຄວາມສາມັກຄີພາຍໃນ ພາຍນອກໃຫ້ແໜ້ນແຟ້ນ, ນໍາໃຊ້ຄວາມຮູ້ຄວາມສາມາດບົ່ມຊ້ອນຂອງພະນັກງານສະມາຊິກພັກເຂົ້າໃນວຽກງານຢ່າງເໝາະສົມ, ສ້າງໜ່ວຍພັກໃຫ້ປອດໃສ, ເຂັ້ມແຂງ, ໜັກແໜ້ນໃນແຕ່ລະມາດຖານໃຫ້ບັນລຸໄດ້ຕາມຄາດໝາຍ 98%ຂື້ນ, ເພີ່ມທະວີຄວາມເປັນເຈົ້າການໃນການບໍລິຫານຈຳໜ່າຍສິນຄ້າໃຫ້ທົ່ວເຖິງຢູ່ບັນດາເມືອງ – ບ້ານ, ເອົາໃຈໃສ່ໃນການແກ້ບັນຫາໃຫ້ແກ່ລູກຄ້າ ເປີດປ່ອງບໍລິການເພີ່ມອີກ 2 ເມືອງ, ຄາດຄະເນການຂາຍໃຫ້ໄດ້ 117ຕື້ກວ່າກີບ.

ກອງປະຊຸມ ຍັງໄດ້ປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ມີຜູ້ສະໝັກ 5 ສະຫາຍ, ເລືອກເອົາ 3 ສະຫາຍ. ກອງປະຊຸມໄດ້ເຫັນດີເປັນເອກະສັນປ່ອນໄດ້ ສະຫາຍ ທອງໄຫວ ພອນໄຊຍະວົງ ເປັນເລຂາ ໜ່ວຍພັກຊຸດໃໝ່, ສະຫາຍ ແອນ້ອຍ ຈິດທະວີ ເປັນຮອງເລຂາ ແລະ ສະຫາຍ ນາງ ເພັດສະໝອນ ຈັນທະວົງ ເປັນຄະນະ ແລະໄດ້ປ່ອນບັດເອົາຜູ້ແທນເພື່ອເຂົ້າຮ່ວມກອງປະຊຸມໃຫຍ່ອົງຄະນະພັກແຂວງ ຄັ້ງທີ VIII ຕື່ມອີກ.

ຂ່າວ: ອຸ້ມ ສົມນໍວັນ