ຂ່າວດີ! ບໍ່ພົບຜູ້ຕິດເຊື້ອໂຄວິດ-19 ເພີ່ມ ເຮັດໃຫ້ຍອດຜູ້ຕິດເຊື້ອທັງໝົດຄົງທີ່ 9 ຄົນ

580

ວັນທີ 31 ມີນາ 2020 ເວລາ 14:30 ໂມງ ຄະນະສະເພາະກິດ ປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດ ໂຄວິດ-19 ໄດ້ຖະແຫຼງຂ່າວທີ່ກະຊວງສາທາລະນະສຸກ ວ່າ: ສະພາບການລະບາດ, ການຄວບຄຸມ ແລະ ປ້ອງກັນການລະບາດຂອງເຊື້ອພະຍາດໂຄວິດ-19 ໃນ ສປປ ລາວ ຜ່ານການເຝົ້າລະວັງ ແລະ ກວດວິເຄາະ ໃນວັນທີ 30 ມີນາຜ່ານມາ ມີກໍລະນີສົງໄສ 31 ກໍລະນີ

ຈາກນະຄອນຫຼວງວຽງຈັນ 23 ກໍລະນີ, ຫຼວງພະບາງ ແລະ ຈໍາປາສັກ ແຂວງລະ 2 ກໍລະນີ, ແຂວງຜົ້ງສາລີ, ສາລະວັນ, ໄຊຍະບູລີ ແລະ ເຊກອງ ແຂວງລະ 1 ກໍລະນີ ເຊິ່ງທັງໝົດນັ້ນໄດ້ເກັບຕົວຢ່າງມາກວດ ແລະ ຜົນກວດເປັນລົບ ຄືບໍ່ມີຜູ້ຕິດເຊື້ອ ທັງ 31 ກໍລະນີ.

ສະນັ້ນ, ເຮັດໃຫ້ຍອດຜູ້ຕິດເຊື້ອພະຍາດໂຄວິດ-19 ໃນ ສປປ ລາວ ລວມທັງໝົດ 9 ຄົນ, ຢູ່ນະຄອນຫຼວງວຽງຈັນ 6 ຄົນ ແລະ ຢູ່ຫຼວງພະບາງ 3 ຄົນ ເຊິ່ງອາການຂອງຄົນເຈັບແມ່ນ ຊົງຕົວຂັ້ນເບົາບາງ ແລະ ໄດ້ຮັບການປິ່ນປົວຢ່າງເອົາໃຈໃສ່ຈາກແພດໝໍຕາມຫຼັກວິຊາການ