ກອງຮ້ອຍ 13 ປ້ອງກັນອາກາດ ເປີດອົບຮົບຫັດແອບການທະຫານປະຈຳປີ 2020

582

ວັນທີ 27 ມີນາ 2020 ນີ້, ກອງຮ້ອຍ 13 ປ້ອງອາກາດ ໄດ້ເປີດຊຸດອົບຮົມ – ຫັດແອບ ການເມືອງ, ການທະຫານ ແລະ ພາລາທິການ – ເຕັກນິກ ປະຈໍາປີ 2020 ໂດຍການເປັນປະທານຂອງ ສະຫາຍ ພັນໂທ ຂັນທະລີ ອິນພະວົງ ຄະນະພັກກອງບັນຊາການ ຮອງຫ້ອງເສນາທິການທະຫານແຂວງບໍ່ແກ້ວ, ມີຄະນະພັກ-ຄະນະບັນຊາກົມກອງ, ພະແນກການທີ່ກ່ຽວຂ້ອງ ຕະຫຼອດຮອດພະນັກງານ-ນັກຮົບເຂົ້າຮ່ວມຢ່າງພ້ອມພຽງ.

ສະຫາຍ ພັນຕີ ປິ່ນທອງ ໝັ້ນການ ຫົວໜ້າການທະຫານກອງຮ້ອຍ 13 ໄດ້ຂຶ້ນຜ່ານແຜນການອົບຮົມ-ຫັດແອບ ປະຈໍາປີ ຂອງກົມກອງ ເພື່ອຈັດຕັ້ງປະຕິບັດແຜນການອົບຮົມ-ຫັດແອບ, ປັບປຸງລະບຽບແບບແຜນ, ຝຶກຝົນກຳລັງແຮງກາຍ ໂດຍບັ້ນອົບຮົມຄັ້ງນີ້ຈະເລັ່ງໃສ່ອົບຮົມຄວາມຮູ້ພື້ນຖານອົບຮົມຈັດຕັ້ງເຜີຍແຜ່ບັນດາຂໍ້ກຳນົດ ກົດລະບຽບຂອງກອງທັບ, ຂໍ້ກຳນົດເພີ່ມວ່າດ້ວຍການນຸ່ງຖືເຄື່ອງແບບ, ການເຄົາລົບ-ລາຍງານ.

ຈັດຕັ້ງຫັດແອບລະບຽບຮູບແຖວຂັ້ນໝູ່, ໝວດ, ກອງຮ້ອຍ, ກອງພັນນ້ອຍ, ສິລະປະຍຸດ – ຍຸດທະວິທີ, ວຽກງານພັກ-ວຽກງານການເມືອງ, ວຽກງານພາລາທິການຮັບໃຊ້ວຽກງານສູ້ຮົບ, ວຽກງານເຕັກນິກອົບຮົມວຽກງານເຕັກນິກຮັບໃຊ້ວຽກງານສູ້ຮົບ, ທິດສະດີຫຼັກການ, ວິທີນຳໃຊ້ພາຫະນະອາວຸດ ເຊິ່ງກຳນົດເວລາອົບຮົມ 150 ວັນ ຈຶ່ງຈະສຳເລັດ.

ຕອນທ້າຍສະຫາຍ ພັນໂທ ຂັນທະລີ ອິນພະວົງ ໄດ້ໂອ້ລົມ ໂດຍຍົກໃຫ້ເຫັນສະພາບການຂອງໂລກ ແລະ ພາກພື້ນ, ພາຍໃນປະເທດ ພ້ອມທັງເນັ້ນໜັກໃຫ້ຄະນະພັກ-ຄະນະບັນຊາເພີ່ມຄວາມຮັບຜິດຊອບຂອງຕົນ, ຈັດຕັ້ງນຳພາປະຕິບັດແຜນການອົບຮົມໃຫ້ເປັນຮູບປະທຳຕົວຈິງ, ເອົາໃຈໃສ່ປະຕິບັດຂໍ້ກຳນົດກົດລະບຽບຂອງກອງທັບຢ່າງເຂັ້ມງວດ, ສຸມໃສ່ປັບປຸງກໍ່ສ້າງກຳລັງຂອງກອງທັບໃຫ້ມີຄວາມໜັກແໜ້ນ, ເຂັ້ມແຂງໃນທຸກດ້ານປະກອບສ່ວນເຂົ້າໃນການປັບປຸງກໍ່ສ້າງກອງທັບ. ພ້ອມດຽວກັນນັ້ນ, ກອງຮ້ອຍທະຫານຊາຍແດນ 124 ກໍໄດ້ເປີດຊຸດອົບຮົມປະຈຳປີເຊັ່ນດຽວກັນ.

ນັກຂ່າວ ຄໍ 124 ໂດຍ: ບຸນຖົມ