ແຮງງານເມືອງອາດສະພອນ ທີ່ເຂົ້າສູນກັກກັນ 417ຄົນ

689

ເຈົ້າແຂວງສະຫວັນນະເຂດສືບຕໍ່ຊີ້ນຳ ທີ່ສູກກັກກັນໂຮງຮຽນ ມສ ນາເລົ່າ ແລະ ໂຮງຮຽນ ມຕ ວຽງໄຊ ທີ່ສູນຂອງເມືອງອາດສະພອນ
ວັນທີ 30 ມີນາ 2020ນີ້ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມດ້ວຍເຈົ້າເມືອງອາດສະພອນ, ຫົວໜ້າຄະນະສະເພາະກິດເມືອງອາດສະພອນໄດ້ລົງຕິດຕາມ ແລະ ຊີ້ນຳວຽກງານການສະກັດກັ້ນແລະ ຄວບຄຸມການແຜ່ລະບາດພະຍາດໂຄວິດ19 ຢູ່ 2 ສູນຂອງເມືອງອາດສະພອນຄື: ສູນໂຮງຮຽນ ມສ ນາເລົ່າ ທີ່ມີ 7 ກຸ່ມບ້ານ ແລະ ສູນໂຮງຮຽນ ມຕ ວຽງໄຊ ມີ 5 ກຸ່ມບ້ານທີ່ຂຶ້ນກັບ ເຊິ່ງພາຍໃນເມືອງອາດສະພອນມີສູນກັກກັນທັງໝົດ 8 ສູນ ຄື: ໂຮງຮຽນ ມສ ອາດສະພອນ , ໂຮງຮຽນ ມສ ນາເລົ່າ, ໂຮງຮຽນ ມຕ ນາໝາກເກືອ, ໂຮງຮຽນ ມສ ໂນນມີໄຊ ໂຮງຮຽນ ມສ ແກ້ງໝຸ້ມ, ໂຮງຮຽນ ມສ ໂພນງາມ ແລະ ສູນໂຮງຮຽນ ມຕ ວຽງໄຊ ແຕ່ລະສູນແມ່ນໄດ້ເນັ້ນໃສ່ບ້ານທີ່ມີສຸກສາລາຕິດກັບ

ເຊິ່ງໃນນັ້ນລວມມີແຮງງານທັງໝົດ 323 ຄົນ , ຍິງ 131 ຄົນ, ທີ່ມາແບບຖືກຕ້ອງ ແລະ ມີຈຳນວນທີ່ມາແບບບໍ່ຖືກຕ້ອງ 94 ຄົນ, ຍິງ 59 ຄົນ ລວມຈໍານວນພົນທັງໝົດທີ່ມາຖືກຕ້ອງ ແລະ ບໍ່ຖືກຕ້ອງມີ 417 ຄົນ , ຍິງ 190 ຄົນ, ຈາກຕົວເລກທີ່ໄປເຮັດວຽກຢູ່ຕ່າງປະເທດກ່ອນໜ້ານີ້ແມ່ນມີປະມານ 3.000 ກວ່າຄົນ.

ຜ່ານຈາກການສໍາຫຼວດ ແລະ ເບິ່ງຕົວຈິງ ໃນຄັ້ງວັນທີ 30 ມີນາ 2020 ເຫັນວ່າທັງສອງສູນ ແມ່ນຍັງບໍ່ທັນປະຕິບັດຕາມການອານາໄມໂລກວາງອອກໄດ້ດີເທົ່າທີ່ຄວນ,ເປັນຕົ້ນແມ່ນການຢູ່, ການກິນ, ເຊິ່ງເຫັນໄດ້ວ່າ: ແຕ່ລະຄົນທີ່ຢູ່ໃນສູນແມ່ນຍັງໃກ້ຊິດກັນ , ຍັງນອນຮ່ວມກັນ ແລະ ຍັງສ້າງກິດຈະກຳຮ່ວມກັນ.

ຕໍ່ສະພາບການດັ່ງກ່າວທ່ານເຈົ້າແຂວງສະຫວັນນະເຂດແມ່ນໄດ້ຊີ້ນໍາໃຫ້ທາງຄະນະຮັບຜິດຊອບແຕ່ລະສູນຕ້ອງ ໄດ້ເອົາໃຈໃສ່ຢ່າງເຄັ່ງຄັດຕໍ່ແຮງງານລາວທີ່ມາຈາກຕ່າງປະເທດ, ໃຫ້ມີການແຍກຫ້ອງໃຫ້ໜ້ອຍຄົນເທົ່ໃດຍິ່ງເປັນການດີ, ເພື່ອເປັນການສະກັດກັ້ນ ແລະ ການຄວບຄຸມການແຜ່ລະບາດຂອງພະຍາດໂຄວິດ 19 ເນື່ອງຈາກວ່າພະຍາດດັ່ງກ່າວນີ້ ແມ່ນພະຍາດລະບາດທີ່ເປັນສົງຄາມຈຸລະໂລກທີ່ເບິ່ງບໍ່ເຫັນດ້ວຍຕາເປົ່າ, ສະນັ້ນທຸກຄົນຕ້ອງຖືເອົາວຽກງານການປ້ອງກັນມາກ່ອນ ເປັນຕົ້ນແມ່ນການໃຊ້ຜ້າອັດປາກ, ລ້າງມືເປັນປະຈໍາໃນຂະນະສໍາຜັດພື້ນຜິວຕ່າງໆ ແລະ ການຮັກສາໄລຍະຫ່າງການຢູ່ຮ່ວມກັນປະມານ 2 ແມັດ ທີ່ສຳຄັນບໍ່ໃຫ້ໃກ້ຊິດດ ແລະ ບໍ່ໃຫ້ການສ້າງກິດຈະກໍາຮ່ວມກັນພາຍໃນສູນ.