ກວຕ ເລື່ອນສະມາຊິກພັກສຳຮອງຂຶ້ນເປັນສະມາຊິກພັກສົມບູນ

504

ອົງຄະນະພັກ ກະຊວງວິທະຍາສາດ ແລະ ເຕັກໂນໂລຊີ (ກວຕ) ໄດ້ຈັດພິທີຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສຳຮອງ ແລະ ເລື່ອນສະມາຊິກພັກສຳຮອງຂຶ້ນເປັນສະມາຊິກພັກສົມບູນໂດຍໃຫ້ກຽດເຂົ້າຮ່ວມຂອງສະຫາຍ ປອ. ສຸລິອຸດົງ ສູນດາລາ ຮອງລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ, ມີບັນດາເລຂາ, ຮອງເລຂາໜ່ວຍພັກຫ້ອງການ, ກົມ, ສະຖາບັນ, ຕາງໜ້າສາມອົງການຈັດຕັ້ງມະຫາຊົນ ແລະ ສະມາຊິກພັກຈາກ 5 ພາກສ່ວນ ເຂົ້າຮ່ວມ.

ໂອກາດດັ່ງກ່າວ, ສະຫາຍ ເຮີເຊັງ ເຢຍປໍເຮີ, ເລຂາໜ່ວຍພັກກົມກວດກາ ໄດ້ຂຶ້ນຜ່ານມະຕິຕົກລົງຂອງຄະນະພັກ ກວຕ ວ່າດ້ວຍການຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສຳຮອງຂອງພັກປະຊາຊົນປະຕິວັດລາວ ຈຳນວນ 4 ສະຫາຍ, ຍິງ 1 ສະຫາຍ ແລະ ສະຫາຍ ບຸນປອນ ບົວແພງ, ເລຂາໜ່ວຍພັກກົມຈັດຕັ້ງ ແລະ ພະນັກງານ ກໍໄດ້ຂຶ້ນຜ່ານມະຕິຕົກລົງຂອງຄະນະພັກ ກວຕ ວ່າດ້ວຍການຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສຳຮອງຂອງພັກປະຊາຊົນ ປະຕິວັດລາວ ຈຳນວນ 1 ສະຫາຍ.

ຄຽງຄູ່ກັນນັ້ນ, ສະຫາຍ ປອ. ນາງ ຂັນລາສີ ແກ້ວບຸນພັນ, ເລຂາໜ່ວຍພັກກົມຊັບສິນທາງປັນຍາ ໄດ້ຂຶ້ນຜ່ານມະຕິຕົກລົງຂອງອົງຄະນະພັກ ກວຕ ວ່າດ້ວຍການເຫັນດີອະນຸມັດເລື່ອນສະມາຊິກພັກສຳຮອງຂຶ້ນເປັນສະມາຊິກພັກສົມບູນ ຈຳນວນ 4 ສະຫາຍ, ຍິງ 2 ສະຫາຍ. ສ່ວນ ສະຫາຍ ພຸດທະສັກ ວິຈິດຕຣາ ເລຂາໜ່ວຍພັກຫ້ອງການ ໄດ້ຂຶ້ນຜ່ານມະຕິຕົກລົງຂອງອົງຄະນະພັກກະຊວງ ວ່າດ້ວຍການເຫັນດີອະນຸມັດເລື່ອນສະມາຊິກພັກສຳຮອງຂຶ້ນເປັນສະມາຊິກພັກສົມບູນຈຳນວນ 1 ສະຫາຍ ແລະ ສະຫາຍ ບຸນທັນ ວົງຊະນະ ຮອງເລຂາໜ່ວຍພັກກົມແຜນການ ແລະ ຮ່ວມມື ກໍໄດ້ຂຶ້ນຜ່ານມະຕິຕົກລົງຂອງອົງຄະນະພັກກະຊວງ ວ່າດ້ວຍການເຫັນດີອະນຸມັດເລື່ອນສະມາຊິກພັກສຳຮອງຂຶ້ນ ເປັນສະມາຊິກພັກສົມບູນຈຳນວນ ຍິງ 1 ສະຫາຍ.

ໃນຕອນທ້າຍສະຫາຍ ປອ. ສຸລິອຸດົງ ສູນດາລາ ຍັງໄດ້ໃຫ້ກຽດໂອ້ລົມໃນພິທີ ຊຶ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ 5 ໜ່ວຍພັກ ທີ່ສ້າງໄດ້ສະມາຊິກພັກສຳຮອງໃໝ່ ແລະ ເລື່ອນສະມາຊິກພັກສຳຮອງຂຶ້ນເປັນສົມບູນ ເຮັດໃຫ້ໜ່ວຍພັກມີການເຕີບໃຫຍ່ຂະຫຍາຍໂຕ.​ ພ້ອມນັ້ນ,​ ກໍສະແດງຄວາມຍ້ອງຍໍຊົມເຊີຍຕໍ່ບັນດາສະມາຊິກພັກສຳຮອງ ແລະ ສົມບູນໃໝ່ ທີ່ສາມາດຜ່ານຜ່າອຸປະສັກ ໂດຍສະເພາະແມ່ນໜ້າທີ່ວຽກງານທີ່ການຈັດຕັ້ງມອບໝາຍໃຫ້ຈົນໄດ້ຮັບຄວາມໄວ້ເນື້ອເຊື່ອໃຈ​ຈາກອົງການຈັດຕັ້ງກໍຄືຄະນະພັກ ແລະ​ ກ້າວເຂົ້າເປັນສະມາຊິກພັກປະຊາຊົນປະຕິວັດລາວໃນຄັ້ງນີ້.

ສະຫາຍຍັງໄດ້ຮຽກຮ້ອງມາຍັງສະມາຊິກພັກທຸກສະຫາຍຈົ່ງສືບຕໍ່ຮັກສາມູນເຊື້ອ ແລະ ຕັ້ງໜ້າຝຶກຝົນຫຼໍ່ຫຼອມຕົນເອງຢ່າງຕໍ່ເນື່ອງ ໂດຍສະເພາະແມ່ນຍົກສູງທາງດ້ານຄຸນທາດການເມືອງ, ຢຶດໝັ້ນໃນທາດແທ້ ແລະ ອຸດົມການຂອງພັກ, ຍົກສູງສະຕິຕໍ່ການຈັດຕັ້ງ, ຊື່ສັດ ແລະ ຈົງຮັກພັກດີຕໍ່ພັກ-ລັດ, ຕໍ່ປະເທດຊາດ, ເອົາໃຈໃສ່ເພີ່ມທະວີຄວາມສາມັກຄີຮັກແພງເຊິ່ງກັນ ແລະ ກັນໃຫ້ເປັນປຶກແຜ່ນເພື່ອສືບຕໍ່ຈັດຕັ້ງປະຕິບັດວຽກງານທີ່ພັກ-ລັດມອບໝາຍໃຫ້ປະສົບຜົນສຳເລັດ. ພິທີດັ່ງກ່າວ, ຈັດຂຶ້ນໃນທ້າຍອາທິດຜ່ານມາ ທີ່ກະຊວງວິທະຍາສາດ ແລະ ເຕັກໂນໂລຊີ.