ເມືອງໄຊບູລີມີແຮງງານຖືກກັກເກືອບ1ພັນຄົນ

567

ຕາມການລາຍງານຂອງທ່ານ ອ່ອນລຳພັນ ບົວສີແກ້ວ ເຈົ້າເມືອງໄຊບູລີ ໄດ້ໃຫ້ສຳພາດຕໍ່ຜູ້ສື່ຂ່າວວິທະຍຸກະຈາຍສຽງຂອງພວກເຮົາກ່ຽວກັບມາດຕະການໃນການເຝົ້າລະວັງ ແລະ ສະກັດກັ້ນການລະບາດຂອງເຊື້ອພະຍາດໂຄວິດ-19 ທາງເມືອງໄຊບູລີແມ່ນໄດ້ມີມາດຕະການໃນການຄວບຄຸມຢ່າງເຂັ້ມງວດ ໂດຍສະເພາະແມ່ນບັນດາແຮງງານລາວທີ່ມາຈາກປະເທດກຸ່ມສ່ຽງເປັນຕົ້ນແມ່ນມາຈາກປະເທດໄທ ເຊິ່ງເມືອງໄຊບູລີກໍ່ແມ່ນເມືອງໜຶ່ງຂອງແຂວງສະຫວັນນະເຂດ ທີ່ມີຊາຍແດນຕິດກັບປະເທດໄທ

ໃນນັ້ນເມືອງໄຊບູລີກໍ່ໄດ້ມີທ່າເຮືອນ້ອຍ ແລະ ດ່ານປະເພນີຢູ່ບ້ານຕ່າງໆລຽບຕາມແຄມແມ່ນ້ຳຂອງ ເຊິ່ງໄດ້ມີປະຊາຊົນທັງສອງຝັ່ງໄດ້ຂ້າມໄປມາຄ້າຂາຍຮ່ວມກັນໃນໄລຍະຜ່ານມາ ແຕ່ພາຍຫຼັງທີ່ເກີດການລະບາດຂອງເຊື້ອພະຍາດໂຄວິດ-19 ຢູ່ບັນດາປະເທດອ້ອມຂ້າງ ແລະ ໄດ້ຮັບແຈ້ງການຈາກອົງການປົກຄອງແຂວງ ທາງເມືອງໄຊບູລີກໍ່ໄດ້ມີການປິດດ່ານທຸກປະເພດພາຍໃນເມືອງ ແຕ່ກໍ່ຍັງມີແຮງງານລາວຈຳນວນໜຶ່ງທີ່ຍັງລັກລອບເຂົ້າມາ ແຕ່ທາງເຈົ້າໜ້າທີ່ ທີ່ກ່ຽວຂ້ອງກໍ່ໄດ້ນຳໂຕພວກກ່ຽວເຂົ້າມາກັກບໍລິເວນທີ່ສູນກັກກັນຊົ່ວຄາວ

ແລະ ແຮງງານລາວທີ່ມາຖືກຕ້ອງຕາມກົດໝາຍຜ່ານທາງດ່ານສາກົນຂົວມິດຕະພາບ 2 ສະຫວັນນະເຂດ – ມຸກດາຫານ ກໍ່ໄດ້ກັກບໍລິເວນທີ່ສູນກັກກັນຊົ່ວຄົວຂອງເມືອງຈັດກຽມໄວ້ເຊັ່ນດຽວກັນ ປັດຈຸບັນທົ່ວເມືອໄຊບູລີມີສູນກັກກັນທັງໝົດ 13 ສູນ

ມີແຮງງານທີ່ຖືກກັກກັນຈຳນວນ 948 ຄົນ,ຍິງ 478 ຄົນ ໃນນັ້ນມີຜູ້ທີ່ຖືກກັກກັນຄົບ 14 ວັນ ແລະ ໄດ້ສົ່ງກັບບ້ານເຮືອນຂອງຕົນມີຈໍານວນ 43 ຄົນ,ຍິງ 11 ຄົນ ແລະ ທົ່ວເມືອງຍັງບໍ່ມີໂຕເລກກໍລະນີສົງໃສໃນປັດຈຸບັນ.
ຂ່າວ: ອັກສອນສິນ ພົມມະຈັນ