ມາອີກ 1 ບໍລິສັດ! ຊົມເຊີຍ ລາວໂທລະຄົມມອບເງິນ 2 ຕື້ ຊ່ວຍລັດຖະບານຕ້ານການລະບາດພະຍາດໂຄວິດ-19

738

ຊົມເຊີຍ! ລາວໂທລະຄົມ ມອບເງິນ 2 ຕື້ກີບ ຊ່ວຍລັດຖະບານຮັບມືການລະບາດຂອງພະຍາດໂຄວິດ-19 ໃນຕອນເຊົ້າວັນທີ 28 ມີນາ 2020 ທີ່ຫ້ອງວ່າການສໍານັກງານນາຍົກລັດຖະມົນຕີ, ຄະນະນໍາ ລັດວິສາຫະກິດລາວໂທລະຄົມ ນໍາໂດຍ ທ່ານ ສຸພົນ ຈັນທະວີໄຊ ຜູ້ອໍານວຍການໃຫຍ່ລັດວິສາຫະກິດລາວໂທລະຄົມ ມອບເງິນຈໍານວນ 2 ຕື້ກີບ ໃຫ້ແກ່ລັດຖະບານ ກໍຄືຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂພະຍາດໂຄວິດ-19 ເພື່ອປະກອບສ່ວນ ຊ່ວຍລັດຖະບານນໍາໃຊ້ເຂົ້າໃນວຽກງານປ້ອງກັນ ແລະ ແກ້ໄຂການລະບາດຂອງພະຍາດດັ່ງກ່າວໃຫ້ມີປະສິດທິຜົນສູງ.​

ຕາງໜ້າລັດຖະບານກ່າວຮັບໂດຍ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ທັງເປັນຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19.

ກ່ອນໜ້ານີ້, ບໍລິສັດເບຍລາວ ກໍໄດ້ມອບເງິນ ຈຳນວນ 2 ຕື້ກີບ ເພື່ອຊ່ວຍລັດຖະບານເຂົ້າໃນການຕ້ານ ແລະ ສະກັດກັ້ນການລະບາດຂອງພະຍາດໂຄວິດ-19 ທີ່ກຳລັງລະບາດຢູ່ໃນ ສປປ ລາວ ໃນປັດຈຸບັນ ແລະ ມີຜູ້ຕິດເຊື້ອແລ້ວ 6 ຄົນ ຢູ່ຫຼວງພະບາງ 2 ແລະ 4 ຄົນ ຢູ່ນະຄອນຫຼວງວຽງຈັນ

ຂ່າວ: ຂປລ