ອຸ່ນໃຈຂຶ້ນ! ຕົວເລກຜູ້ຕິດເຊື້ອໂຄວິດ-19 ໃນລາວ ຍັງຄົງທີ່ 6 ຄົນເທົ່າເດີມ

510
  • ນັບວ່າເປັນຂ່າວດີໃນຮອບອາທິດ ຫຼັງກະຊວງສາທາອອກມາປະກາດການກວດພົບຜູ້ຕິດເຊື້ອໂຄວິດ-19 ໃນລາວ ນັບແຕ່ວັນທີ 24 ມີນາ 2020, ແຕ່ລາຍງານຫຼ້າສຸດມື້ນີ້ ວັນທີ 27 ມີນາ 2020 ບໍ່ພົບຜູ້ຕິດເຊື້ອເພີ່ມ ຕົວເລກຍັງຄົງທີ່ 6 ກໍລະນີ.

ວັນທີ 27 ມີນາ 2020 ທີ່ກະຊວງສາທາລະນະສຸກ ໄດ້ມີການຖະແຫຼງກ່ຽວກັບສະພາບການລະບາດຂອງພະຍາດໂຄວິດ-19 ຢູ່ໃນ ສປປ ລາວ ໂດຍທ່ານ ຮສ. ດຣ. ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ຜູ້ປະຈຳການຄະນະສະເພາະກິດຄວບຄຸມພະຍາດໂຄວິດ-19 ພ້ອມດ້ວຍຄະນະ ແລະ ມີບັນດາສື່ມວນຊົນເຂົ້າຮ່ວມ.

ທ່ານ ຮສ. ດຣ. ພູທອນ ເມືອງປາກ ກ່າວວ່າ: ການເຝົ້າລະວັງການລະບາດຂອງພະຍາດໂຄວິດ-19 ໃນ ສປປ ລາວ ຮອດວັນທີ 27 ມີນາ 2020 ມີຜູ້ຕິດເຊື້ອແມ່ນຄົງທີ່ ມີຈຳນວນ 6 ຄົນເທົ່າເດີມ. ຈາກການກວດວິເຄາະຫາເຊື້ອທັງໝົດໃນໄລຍະຜ່ານມາ 218 ກໍລະນີ. ພ້ອມທັງໄດ້ຄົ້ນຫາຜູ້ໃກ້ຊິດ ແລະ ສຳຜັດຜູ້ຕິດເຊື້ອ ໄດ້ທັງໝົດມາຮອດວັນທີ 27 ມີນາ ແມ່ນມີຈຳນວນ 195 ຄົນ.

ສ່ວນລາຍງານຕົວເລກຜູ້ຕິດເຊື້ອທົ່ວໂລກມີທັງໝົດ 201 ປະເທດ, ກໍລະນີຢັ້ງຢືນຜູ້ຕິດເຊື້ອພະຍາດ ໂຄວິດ-19 ແລ້ວ 528.376 ກໍລະນີ (ເພີ່ມຂຶ້ນ 60.419 ກໍລະນີ) , ເສຍຊີວິດ 23.962 (ເພີ່ມຂຶ້ນ 2.779 ກໍລະນີ) ແລະ ປິ່ນປົວຫາຍດີ 123.380 (ເພີ່ມຂຶ້ນ 9.162).

ຂອບໃຈທີ່ມາ: ຂ່າວເສດຖະກິດການຄ້າ