ນາຍົກລົງຕິດຕາມການຄວບຄຸມ ແລະ ສະກັດກັ້ນການລະບາດໂຄວິດ-19 ຢູ່ແຂວງຄຳມ່ວນ

547

ວັນທີ 26 ມີນາ 2020 ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ພ້ອມຄະນະໄດ້ເດີນ ທາງລົງຕິດຕາມສະພາບການຄວບຄຸມ ແລະ ສະກັດກັ້ນການລະບາດຂອງພະຍາດໂຄວິດ-19 ຢູ່ແຂວງຄຳມ່ວນ ໂດຍເປັນ ກຽດຕ້ອນຮັບຂອງທ່ານ ໂອໄດ ສຸດາພອນ ເຈົ້າແຂວງຄຳມ່ວນ ພ້ອມດ້ວຍບັນດາທ່ານໃນຄະນະສະເພາະກິດຄວບຄຸມ ແລະ ສະກັດກັ້ນໂຄວິດ-19 ຂັ້ນແຂວງ. ໃນນັ້ນແມ່ນໄດ້ເດີນທາງລົງຕິດຕາມເບິ່ງສະພາບການທີ່ດ່ານຂົວມິດຕະພາບ 3 ຄຳມ່ວນ-ນະຄອນພະນົມ ແລະ ສູນກັກບໍລິເວນ ຢູ່ທີ່ໂຮງຮຽນມໍຕົ້ນນາໂບ ເມືອງທ່າແຂກ.

ສຳລັບແຂວງຄຳມ່ວນ ຍັງບໍ່ມີກໍລະນີທີ່ເຂົ້າເຄືອຄ່າຍຕິດເຊື້ອໂຄວິດ-19 ແຕ່ການນຳຂອງແຂວງກໍ່ໄດ້ເອົາໃຈໃສ່ ຢ່າງໃກ້ຊິດໃນການຕິດຕາມເຝົ້າລະວັງ ເຊິ່ງຄະນະສະເພາະກິດຄວບຄຸມ ແລະ ສະກັດກັ້ນການແຜ່ລະບາດຂັ້ນແຂວງ ໄດ້ວາງແຜນຕິດຕາມເຝົ້າລະວັງໂດຍໄດ້ແຕ່ງຕັ້ງກອງເລຂາ ແລະ ບັນດາອົງການຈັດຕັ້ງທີ່ກ່ຽວຂ້ອງລົງເຜີຍແຜ່ໂຄສະນາ ຢູ່ບັນດາກຸ່ມບ້ານ ເພື່ອສ້າງຄວາມເຂົ້າໃຈໃຫ້ແກ່ອຳນາດການປົກຄອງ ແລະ ພໍ່ແມ່ປະຊາຊົນໃຫ້ຮັບຮູ້ ເຖິງວິທີການປ້ອງກັນ ແລະ ຄວາມອັນຕະລາຍຂອງພະຍາດດັ່ງກ່າວ ແລະ ໄດ້ອອກແຈ້ງການປິດຊົ່ວຄາວບັນດາ ດ່ານທ້ອງຖິ່ນ, ດ່ານປະເພນີ, ດ່ານຜ່ອນຜົນ ໃນວັນທີ 18 ມີນາ ແລະ ໃນວັນທີ 22 ມີນາ ກໍ່ໄດ້ແຈ້ງຢຸດຊົ່ວຄາວ ການເຂົ້າ-ອອກຂອງບຸກຄົນຜ່ານດ່ານສານກົນຂົວມິດຕະພາບ 3 ແລະ ດ່ານສາກົນນາເພົ້າ ແຕ່ໃນປະຈຸບັນຈຳນວນ ພົນລະເມືອງລາວ ທີ່ໄປອອກແຮງງານຢູ່ປະເທດໄທ ກໍ່ໄດ້ພາກັນເດີນທາງກັບບ້ານຢ່າງຫຼວງຫຼາຍ ເຊິ່ງເລີ່ມແຕ່ວັນທີ 20-25 ມີນາ 2020 ມີປະຊາຊົນທີ່ເດີນທາງກັບເຂົ້າມາຜ່ານດ່ານຂົວມິດຕະພາບ 3ທັງໝົດ ຈຳນວນ 7 ພັນກວ່າຄົນ ໃນນັ້ນເປັນພົນລະເມືອງລາວ 4 ພັນກວ່າຄົນ ແລະ ໃນປະຈຸບັນປະຊາຊົນກໍ່ຍັງສືບຕໍ່ເດີນທາງເຂົ້າມາເລື້ອຍໆຕໍ່ເນື່ອງ.

ໂດຍທາງແຂວງກໍ່ໄດ້ມີການນຳໃຊ້ພາຫະນະຂອງເຈົ້າໜ້າທີ່ທະຫານ ເຂົ້າມາຊ່ວຍໃນການຂົນສົ່ງປະຊາຊົນໄປເຂົ້າສູນ ກັກບໍລິເວນຂອງບັນດາເມືອງຕ່າງໆ ເຊິ່ງສ່ວນໃຫຍ່ແມ່ນກຳນົດເອົາໂຮງຮຽນເປັນສູນກັກບໍລິເວນຊົ່ວຄາວ ເຊິ່ງມີທັງໝົດ ຈຳນວນ 78 ສູນໃນທົ່ວແຂວງ. ໃນນັ້ນເມືອງທ່າແຂກ ມີ 10 ສູນ, ໄຊບົວທອງ 6, ບົວລະພາ 5, ຫີນບູນ 14, ໜອງບົກ 5, ມະຫາໄຊ 10, ຍົມມະລາດ 6, ເຊບັ້ງໄຟ 9, ນາກາຍ 5 ແລະ ເມືອງຄູນຄຳ 8 ສູນ. ນອກນີ້ຍັງໄດ້ກະກຽມສະຖານ ທີ່ຈຳກັດບໍລິເວນ ສຳລັບຄົນທີ່ເດີນທາງເຂົ້າປະເທດ ທີ່ມີອາການໄຂ້ ຈະໄດ້ນຳໄປຢູ່ຫ້ອງແຍກປ່ຽວທີ່ໂຮງໝໍແຂວງ ແລະ ທີ່ພະແນກ ຖວທ ຫຼັງເກົ່າເປັນບ່ອນຮອງຮັບ ໂດຍຈະມີທີມງານແພດ-ໝໍຕິດຕາມປິ່ນປົວຢ່າງໃກ້ຊິດ.