ເມືອງຊະນະຄາມ ຖືກຜົນກະທົບຈາກລົມພາຍຸ

607

ເວລາປະມານ 19 ໂມງ ຫາ 20 ໂມງ ຂອງຕອນແລງວັນທີ 24 ມີນາ 2020 ທີ່ຜ່ານມາ, ຢູ່ທີ່ເມືອງຊະນະຄາມ ແຂວງວຽງຈັນ, ໄດ້ເກີດມີຝົນຕົກໜັກ, ພ້ອມທັງມີໝາກເຫັບຕົກ ແລະ ມີລົມພາຍຸພັດຜ່ານຢ່າງໜັກໜ່ວງ, ເຊິ່ງໄດ້ສ້າງຜົນເສຍຫາຍໃຫ້ແກ່ຊັບສິນ, ບ້ານເຮືອນ, ຖຽງນາ, ຜົນຜະລິດຂອງປະຊາຊົນ ຕະຫຼອດຮອດອາຄານປຸກສ້າງ ແລະ ບັນດາໂຮງງານຕ່າງໆພາຍໃນ 6 ໝູ່ບ້ານໄດ້ຮັບຜົນເສຍຫາຍເປັນບໍລິເວນກວ້າງຄື: ບ້ານປົ່ງ, ບ້ານນາພຽງ, ບ້ານນາປາຝາ, ບ້ານນໍ້າພອກ,​ ບ້ານບົວຈະເລີນ ແລະ ບ້ານດົງຂ່າ.

ລົມພາຍຸດັ່ງກ່າວຍັງໄດ້ພັດເອົາຫຼັງຄາຂອງໂຮງຮຽນຈໍານວນ 2 ຫຼັງຖືກເສຍຫາຍຄື: ໂຮງຮຽນອະນຸບານບ້ານນາພຽງ ແລະ ໂຮງຮຽນປະຖົມສົມບູນບ້ານດົງຂ່າ, ເສົາໄຟ້ຟ້າຢູ່ເຂດບ້ານນາພຽງຈໍານວນ 6 ຕົ້ນ ແລະ ອີກ 2 ຕົ້ນຢູ່ລະຫວ່າງບ້ານນາປາຝາ ຫາ ບ້ານນໍ້າພອກ ຖືກລົມພັດຫັກເສຍຫາຍ ເຮັດໃຫ້ໄຟຟ້າຢູ່ພາຍໃນເມືອງດັບເປັນບໍລິເວນກວ້າງ.

ພາຍຫຼັງເຫດການດັ່ງກ່າວ ຄະນະນໍາຂັ້ນເມືອງ ນໍາໂດຍທ່ານ ສະໝານ ວິເສດຍະພົງສ໌ ເລຂາພັກເມືອງ ເຈົ້າເມືອງໆຊະນະຄາມ ພ້ອມດ້ວຍບັນດາຄະນະສະກັດກັ້ນໄພພິບັດຂັ້ນເມືອງ ແລະ ພາກສ່ວນທີ່ກ່ຽວຂ້ອງ

ໄດ້ລົງຕິດຕາມກວດກາເກັບກໍາຂໍ້ມູນ ແລະ ປະເມີນຜົນເສຍຫາຍທີ່ເກີດຂຶ້ນ, ພ້ອມທັງຊີ້ນໍາປຸກລະດົມບັນດາພາກສ່ວນຕ່າງ ເຂົ້າໃຫ້ການຊ່ວຍເຫຼືອໃນເບື້ອງຕົ້ນ

ຂ່າວ: ເມືອງຊະນະຄາມ