ແຂວງສະຫວັນນະເຂດ ປັດຈຸບັນມີ 12 ຕຽງຮອງຮັບຄົນເຈັບ

567

ເຈົ້າແຂວງສະຫວັນນະເຂດ ລົງຕິດຕາມຄວາມພ້ອມໃນການຮັບມືຕໍ່ການລະບາດຂອງພະຍາດອັກເສບປອດຍ້ອນເຊື້ອຈຸລະໂລກສາຍພັນໃໝ່ ຫຼື ໂຄວິດ-19 ທີ່ໂຮງໝໍແຂວງສະຫວັນນະເຂດ

ຕອນບ່າຍວັນທີ 25 ມີນາ 2020 ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ໄດ້ລົງຕິດຕາມໂຮງໝໍແຂວງສະຫວັນນະເຂດ ໃນການກຽມຄວາມພ້ອມຂອງໂຮງໝໍເພື່ອຈັດສັນກະກຽມຕຶກ ແລະ ຫ້ອງຕິດຕາມກວດກາກໍລະນີສົງໄສຜູ້ອາດຕິດເຊື້ອຈາກການລະບາດຂອງພະຍາດ COVID-19.

ໂຮງໝໍແຂວງສະຫວັນນະເຂດ ກໍແມ່ນໜຶ່ງໃນບັນດາຈໍານວນໂຮງໝໍທີ່ທາງແຂວງໄດ້ກະກຽມໄວ້ຮອງຮັບ ແລະ ປິ່ນປົວຜູ້ຕິດເຊື້ອພະຍາດ COVID-19 ເຊິ່ງພາຍໃນແຂວງສະຫວັນນະເຂດຂອງພວກເຮົາ ເຖິງແມ່ນວ່າຍັງບໍ່ທັນມີຜູ້ຕິດເຊື້ອ COVID-19 ແຕ່ກໍມີຄວາມສ່ຽງສູງທີ່ອາດຈະເກີດຂຶ້ນໄດ້. ສະນັ້ນ, ທາງການນໍາຂອງແຂວງຈຶ່ງໄດ້ລົງຕິດຕາມຢ່າງໃກ້ຊິດ ເພື່ອກຽມຮັບມືກັບພະຍາດດັ່ງກ່າວ ເຊິ່ງໃນນີ້ທາງໂຮງໝໍແຂວງແມ່ນໄດ້ກະກຽມຕຶກປິ່ນປົວຄົນເຈັບ ແລະ ເຄື່ອງມືຮັບໃຊ້ທີ່ທັນສະໄໝໄວ້ຮອງຮັບ ແຕ່ກໍອາດຈະບໍ່ພຽງພໍຖ້າຫາກເຊື້ອພະຍາດ COVID-19 ເກີດຂຶ້ນ ເນື່ອງຈາກວ່າໃນປັດຈຸບັນທາງໂຮງໝໍແຂວງພວກເຮົາແມ່ນມີພຽງແຕ່ 12 ຕຽງ ຮັບໄດ້ພຽງ 12 ກໍລະນີເທົ່ານັ້ນ

ໂອກາດນີ້ ທ່ານເຈົ້າແຂວງສະຫວັນນະເຂດ ກໍໄດ້ຊີ້ນໍາ ແລະ ເນັ້ນໜັກໃຫ້ຄະນະພະແນກສາທາລະນະສຸກແຂວງ ແລະ ຄະນະອໍານວຍການໂຮງໝໍແຂວງ ຄົ້ນຄວ້າຕື່ມທາງດ້ານຕຶກຮັບຮອງ ໂດຍອາດນໍາໃຊ້ອາຄານສະຖານທີ່ຂອງວິທະຍາໄລວິທະຍາສາດ ສຸຂະພາບ ສະຫວັນນະເຂດ ເຊິ່ງມີຄວາມເປັນໄປໄດ້ສູງ ເພາະມີຊາຍແດນຕິດຈອດກັນຈຶ່ງສະດວກໃນການຕິດຕາມປິ່ນປົວຄົນເຈັບຂອງແພດໝໍ.
ຂໍ້ມູນ: ວິທະຍຸກະຈາຍສຽງແຂວງສະຫວັນນະເຂດ