ຊົມເຊີຍ! ຫົງສາກຳນົດ 4 ສະຖານທີ່ ຮອງຮັບແຮງງານກັບຈາກຕ່າງປະເທດ ຕິດຕາມອາການ 14 ວັນ

879

ເນື່ອງຈາກສະຖານະການ ການລະບາດຂອງພະຍາດໂຄວິດ-19 ໄດ້ແຜ່ລະບາດຢູ່ຫຼາຍປະເທດ. ຂະນະທີ່ ສປປ ລາວເອງ ຫຼ້າສຸດ ກວດພົບ 3 ກໍລະນີຕິດເຊື້ອໂຄວິດ-19. ສະນັ້ນ,​ ເພື່ອປ້ອງກັນ ແລະ ຄວບຄຸມພະຍາດດັ່ງກ່າວບໍ່ໃຫ້ແຜ່ລາມເປັນວົງກວ້າງ ລັດຖະບານ ໂດຍສະເພະາແມ່ນຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຈຶ່ງເພີ່ມມາດຕະການເຂັ້ມງວດໃນການປ້ອງກັນ ໂດຍສະເພາະແມ່ນບັນດາແຮງງານທີ່ກັບມາຈາກປະເທດທີ່ມີການລະບາດ ຕ້ອງກັກບໍລິເວນຕົວເອງ 14 ວັນ ເພື່ອຕິດຕາມອາການ.

ຫຼ້າສຸດໃນວັນທີ 24 ມີນາຜ່ານມາ ຊາວໜຸ່ມຈາກສຳນັກງານ, ຫ້ອງການ, ກອງບັນຊາການທະຫານ ແລະ ຕຳຫຼວດ ຮ່ວມກັບ ຫ້ອງການສາທາລະນະສຸກເມືອງຫົງສາ ແຂວງໄຊຍະບູລີ ໄດ້ສ້າງຂະບວນການອອກແຮງງານອະນາໄມລວມຢູ່ສະຖານທີ່ໂຮງຮຽນປະຖົມສຶກສາສົມບູນຫົງສາ ເພື່ອກະກຽມໃຫ້ເປັນບ່ອນພັກເຊົາສຳລັບແຮງງານລາວທີ່ກັບມາຈາກປະເທດໄທ.

ໂດຍທາງອົງການປົກຄອງເມືອງຫົງສາ ໄດ້ຕົກລົງ ແລະ ເຫັນດີກຳນົດເອົາສະຖານທີ່ 4 ແຫ່ງ ຄື: ໂຮງຮຽນປະຖົມສຶກສາສົມບູນຫົງສາ, ໂຮງຮຽນປະຖົມສຶກສາສົມບູນບ້ານເມືອງຫານ, ໂຮງຮຽນປະຖົມສຶກສາສົມບູນນາປຸ່ງ ແລະ ໂຮງຮຽນປະຖົມສຶກສາສົມບູນພູແລ້ງ ເປັນບ່ອນພັກເຊົາຊົ່ວຄາວໃຫ້ແກ່ແຮງງານລາວທີ່ກັບມາພູມລຳເນົາ.

"</p

ປັດຈຸບັນບ່ອນພັກເຊົາທີ່ໄດ້ກຳນົດນັ້ນແມ່ນມີຄວາມພ້ອມຫຼາຍພໍສົມຄວນໃນການຮອງຮັບແຮງງານລາວທີ່ກັບມາພູມລຳເນົາຄັ້ງນີ້  ເພື່ອເປັນມາດຕະການໃນການຄວບຄຸມການແຜ່ລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ ຫຼື ໂຄວິດ – 19 ແລະ ໃຊ້ສະຖານທີ່ດັ່ງກ່າວນີ້ເປັນບ່ອນຈໍາກັດບໍລິເວນເປັນເວລາ 14 ວັນ ໃຫ້ຢູ່ສະຖານທີ່ພັກເຊົາຂອງຕົນເອງເທົ່ານັ້ນ.

"</p

ໃນໂອກາດນີ້, ທ່ານ ຂັນທອງ ແສນໂສພາ ຮອງຫົວໜ້າຫ້ອງການສາທາລະນະສຸກເມືອງຫົງສາ ໄດ້ກ່າວໃຫ້ຮູ້ວ່າ: ທາງຫ້ອງການສາທາລະນະສຸກເມືອງ ກໍໄດ້ກຽມພະນັກງານແພດໝໍ ເພື່ອສົມທົບກັບເຈົ້າໜ້າທີ່ ແລະ ພາກສ່ວນທີ່ກ່ຽວຂ້ອງຂອງເມືອງ ໄປປະຈຳຢູ່ສະຖານທີ່ພັກເຊົາທີ່ໄດ້ກຳນົດໄວ້ ເພື່ອຕິດຕາມອາການຂອງແຮງງານທຸກຄົນທີ່ຖືກຈຳກັດບໍລິເວນ.

ພ້ອມນັ້ນ, ທ່ານຍັງຮຽກຮ້ອງມາຍັງພໍ່ແມ່ປະຊາຊົນທົ່ວສັງຄົມບໍ່ໃຫ້ແຕກຕື່ນ ຫຼື ຢ້ານກົວຈົນເກີນໄປ ເພາະເປັນມາດຕະການໃນການຄວບຄຸມການແຜ່ລະບາດຂອງພະຍາດໂຄວິດ – 19 ທີ່ທາງລັດຖະບານໄດ້ກຳນົດໄວ້.