ເບຍລາວ ໃຫ້ 2 ຕື້ກີບ ສະໜັບສະໜູນລັດຖະບານແກ້ໄຂວິກິດໂຄວິດ-19 ລະບາດໃນລາວ

740

ພາຍຫຼັງທີ່ກະຊວງສາທາລະນະສຸກໄດ້ອອກມາຢືນຢັນວ່າພົບຜູ້ຕິດເຊື້ອໂຄວິດ-19 ໃນລາວ ເຮັດໃຫ້ລັດຖະບານຍິ່ງມີມາດຕະການຄຸມເຂັ້ມເພື່ອຄວບຄຸມ ແລະ ແກ້ໄຂການລະບາດຂອງພະຍາດດັ່ງກ່າວ. ຕໍ່ກັບມາດຕະການຕ່າງໆນັ້ນກໍໄດ້ຮັບການສະໜັບສະນູນຈາກພາກສ່ວນຕ່າງໆເປັນຢ່າງດີ ໂດຍສະເພາະແມ່ນກຸ່ມນັກທຸລະກິດ ຫຼື ຜູ້ປະກອບການຈໍານວນໜຶ່ງທີ່ຮ່ວມໃຈປະກອບສ່ວນທັງດ້ານອຸປະກອນການແພດ ແລະ ເງິນເພື່ອສະໜັບສະໜູນການແກ້ໄຂວິກິດດັ່ງກ່າວ.

ຫຼ້າສຸດ, ໃນວັນທີ 26 ມີນາ 2020 ທີ່ສຳນັກງານນາຍົກລັດຖະມົນຕີ ບໍລິສັດ ເບຍລາວ ຈໍາກັດ ໄດ້ມອບເງິນ 2.000.000.000 ກີບ ເພື່ອປະກອບສ່ວນສະໜັບສະໜູນລັດຖະບານລາວ ກໍຄືກະຊວງສາທາລະນະສຸກ ແລະ ເຈົ້າໜ້າທີ່ແພດໝໍທີ່ກໍາລັງຮັບມື ແລະ ຄວບຄຸມການລະບາດຂອງພະຍາດໂຄວິດ-19 ໃນລາວ ຕາງໜ້າມອບໂດຍ ທ່ານ ສູນທອນ ພົມມະຈັກ ປະທານ ບໍລິສັດ ເບຍລາວ ຈຳກັດ; ຕາງໜ້າລັດຖະບານຮັບໂດຍ ທ່ານ ສົມດີ ດວງດີ ຮອງນາຍົກລັດຖະມົນຕີ ພ້ອມດ້ວຍຄະນະ, ໂດຍມີຄະນະບໍລິຫານງານ ບໍລິສັດ ເບຍລາວ ແລະ ສື່ມວນຊົນເຂົ້າຮ່ວມເປັນສັກຂີພິຍານ.