ຄິວລົດສາຍໃຕ້ວາງ 3 ມາດຕະການປ້ອງກັນໂຄວິດ-19

667

ທ່ານ ສຸກສະຫວາດ ສີສຸກ ຜູ້ຈັດການທົ່ວໄປ ສະຖານີຂົນສົ່ງໂດຍສານສາຍທາງໄກ ສາຍໃຕ້ – ສາຍຕ່າງປະເທດໄດ້ກ່າວວ່າ: ພວກເຮົາກະກຽມຄວາມພ້ອມຢູ່ສະເໝີ ເພື່ອຮັບມີໃນການຕິດຕາມ – ເຝົ້າລະວັງການລະບາດຂອງເຊື້ອຈຸລະໂລກສາຍພັນໃໝ່ ຫຼື ໂຄວິດ-19 ໂດຍມີການຮອງຮັບ 3 ວິທີຄື: ໜຶ່ງ ພວກເຮົາໄດ້ມີເຈລລ້າງມືໄວ້ໃນສະຖານທີ່ຄິວສົດສາຍໃຕ້ ໂດຍສະເພາະຢູ່ປ່ອງບໍລິການປີ້ໂດຍສານ, ປ່ອງປະຊາສໍາພັນ; ສອງ ຈະມີພະນັກງານປະຊາສໍາພັນໃຫ້ຜູ້ໂດຍສານ ໃຫ້ຮູ້ຜົນຮ້າຍ ແລະ ວິທີປ້ອງກັນຕົນເອງ ໂດຍສະເພາະແມ່ນການແນະນໍາໃຫ້ໃສ່ຜ້າອັດປາກ, ໝັ່ນລ້າງມື, ການຢູ່ຫ່າງກັນໄລຍະ 1 ແມັດເຫຼົ່ານີ້ເປັນຕົ້ນ ແລະ ມາດຕະການທີສາມ ທາງສະຖານີກໍໄດ້ມີການສີດພົ່ນຢາຂ້າເຊື້ອພາຍໃນສະຖານີ, ຈຸດບໍລິການ, ຕັ່ງນັ່ງ ເຊິ່ງປະຕິບັດຫຼັງຈາກລົດອອກຈາກຄິວທັງໝົດໃນໄລຍະກາງຄືນ ປະມານ 20:30 ໂມງຂອງທຸກໆວັນ

ປັດຈຸບັນຈໍານວນຜູ້ໂດຍສານເຫັນວ່າຍັງຢູ່ໃນເກນປົກກະຕິບໍ່ເຖິງຂັ້ນແອອັດ ເຊິ່ງສະຖານີພວກເຮົາຍັງໃຫ້ບໍລິການພາຍໃນປະເທດຕາມໂມງ ແລະ ເວລາເກົ່າທີ່ກໍານົດ, ສ່ວນລາຄາກໍບໍ່ມີຫຍັງປ່ຽນແປງ

ສໍາລັບສາຍຕ່າງປະເທດ ໂດຍສະເພາະ ຫວຽດນາມກໍໄດ້ຢຸດບໍລິການແລ້ວ. ສ່ວນຢາຂ້າເຊື້ອໃນປັດຈຸບັນມີຈໍານວນຈໍາກັດ ຕາມແຜນສີດພົ່ນຄັ້ງໜຶ່ງສາມາດກຸ້ມໄດ້ 3 ວັນ ຖ້າຫາກວ່າຢາຂ້າເຊື້ອຊຸດນີ້ໝົດກໍຕ້ອງຊອກຈັດຫາຕື່ມ ເພື່ອຈະໃຫ້ສາມາດສີດພົ່ນໄດ້ຕະຫຼອດ ແຕ່ສີດພົ່ນໃນລົດທາງເຮົາກໍຈະເບິ່ງກ່ອນ ເພາະຢາຂ້າເຊື້ອແມ່ນມີກິ່ນແຮງຈະທົດລອງເບິ່ງວ່າສີດໄປແລ້ວໃຊ້ເວລາເທົ່າໃດເພື່ອໃຫ້ກິ່ນລະເຫີຍ ແລະ ວາງມາດຕະການສີດຕໍ່ໄປ

ສ່ວນການວັດແທກອຸນຫະພູມໃນປັດຈຸບັນຍັງບໍ່ມີ ເຊິ່ງຈະຂໍການຮ່ວມມືນໍາກະຊວງສາທາລະນະສຸກ ວ່າຈະຮ່ວມມືກັນແນວໃດ ? ຈະມີຈຸດກວດວັດແທກໄຂ້ ຫຼື ບໍ່, ສ່ວນພະນັກງານພາຍໃນສະຖານີເຮົາກໍມີຜ້າອັດປາກໃຫ້, ສະໜອງເຈລລ້າງມືໃຫ້ພ້ອມ ທັງແນະນໍາວິທີໃນການປ້ອງກັນຕົນເອງຄືແນວໃດ ເພື່ອເຮັດໜ້າທີ່ບໍລິການປະຊາຊົນໃນສະຖານີເຮົາ.