ນາຍົກເນັ້ນປະ​ຕິ​ບັດ 6 ມາດ​ຕະການ ຢ່າງເຄັ່ງຄັດເພື່ອຕ້ານໂຄວິດ ຫຼັງພົບຜູ້ຕິດເຊື້ອ 2 ຄົນທຳອິດ

471

ນາຍົກຮຽກຮ້ອງໃຫ້ປະຕິບັດຕາມແຈ້ງການ ແລະ ລະບຽບວິໄນຢ່າງເຄັ່ງຄັດ ເພື່ອຕ້ານໂຄວິດ ຫຼັງພົບຜູ້ຕິດເຊື້ອ 2 ຄົນທຳອິດຂອງປະເທດ
ໃນເວລາ 12:30 ໂມງ ຂອງວັນທີ 25 ມີນາ 2020​ ນີ້ ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ພ້ອມຄະນະສະເພາະກິດ ໄດ້ຖະແຫຼງຂ່າວຕໍ່ສື່ມວນຊົນ ກ່ຽວກັບການລະບາດຂອງເຊື້ອ ໂຄວິດ-19. ໃນນັ້ນ,​ ມີຜູ້ຕິດເຊື້ອ 2 ຄົນ, ລັດຖະບານຈະເພີ່ມມາດຕະການເຂັ້ມງວດຄື:

1 .ຈະເພີ່ມທະວີຕິດຕາມແຮງງານທີ່ກັບມາຈາກປະເທດເພື່ອນບ້ານເພື່ອຄຸ້ມຄອງໃຫ້ເຂັ້ມງວດກັກຕົນເອງ ພາຍໃນ 14 ວັນ.​
2. ຂໍໃຫ້ປະຕິບັດຫຼັກການຕົນເອງຕາມຫຼັກການແພດວາງອອກ ແລະ ກວດກາເປັນປົກກະຕິ.​
3. ໃຫ້ທຸກພາກສ່ວນຕິດຕາມການເຄື່ອນໄຫວຂອງສຳນັກງານໃຫ້ຢຸດຕິການປະຊຸມ ແລະ ການຊຸມນຸມຈຳນວນຫຼາຍ ຖ້າມີຄວາມສາມາດເຮັດວຽກຢູ່ເຮືອນຜ່ານອອນລາຍ ກໍໃຫ້ຈັດຕັ້ງປະຕິບັດໄດ້.​

4. ການເດີນທາງໄປ-ມາລະຫວ່າງກັນຄື ບ້ານຕໍ່ບ້ານ; ເມືອງຕໍ່ເມືອງ ຫຼື ຕໍ່ສຳນັກງານແມ່ນໃຫ້ຫຼຸດຜ່ອນໂດຍການໂທລະສັບຫາກັນ.​
5. ຖ້າພົບອາການຜິດປົກກະຕິໃຫ້ຮີບຮ້ອນໂທຫາແພດຈາກສາຍດ່ວນ 166.​
6. ຄະນະສະເພາະກິດຈະໄດ້ອອກຂໍ້ກຳນົດຕື່ມອີກເພື່ອໃຫ້ສັງຄົມປະຕິບັດຢ່າງເຂັ້ມງວດ ທັງນີ້ກໍເພື່ອປົກປັກຮັກສາຊີວິດປະຊາຊົນ ແລະ ຮຽກຮ້ອງສັງຄົມໃຫ້ຮ່ວມມືກັນ.

ໂດຍ: ສອດສ່ອງ