ເມືອງອາດສະພັງທອງ ຮັບແຮງງານ 188 ຄົນ ເຂົ້າສູນຕິດຕາມ 14 ວັນ

646

ໃນວັນທີ 24 ມີນາ 2020 ນີ້ ທີ່ສະໂມສອນຂອງເມືອງອາດສະພັງທອງ ໄດ້ເປີດກອງປະຊຸມປຶກສາຫາລືກ່ຽວກັບການປ້ອງກັນຄວບຄຸມ ແລະ ແກ້ໄຂການລະບາດຂອງພະຍາດອັກເສບປອດ ( COVID – 19 ) ຂຶ້ນຢ່າງເປັນທາງການ ໂດຍພາຍໃຕ້ການເຂົ້າຮ່ວມຂອງ ທ່ານ ປອ. ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ, ທ່ານ ຕຽງຄໍາ ປ້ອງວົງສາ ຮອງຫົວໜ້າພະແນກສາທາລະນະສຸກແຂວງສະຫວັນນະເຂດ, ທ່ານ ອຸໄພວັນ ໄຊຍະວົງ ເຈົ້າເມືອງອາດສະພັງທອງ, ມີຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ, ຮອງຫົວໜ້າຫ້ອງການອ້ອມຂ້າງເມືອງ, ອໍານາດການປົກຄອງບ້ານໃນ 40 ບ້ານທີ່ຂຶ້ນກັບເມືອງຕະຫຼອດບັນດາຫົວໜ້າສຸກສາລາໃນ 8 ສຸກສາລາ ທີ່ຂຶ້ນກັບເມືອງກໍໄດ້ເຂົ້າຮ່ວມ

ໃນພິທີ ທ່ານ ອຸ່ນຫຼ້າ ພູວົງລິນທາ ຫົວໜ້າຫ້ອງວ່າການເມືອງອາດສະພັງທອງ ກໍໄດ້ຂຶ້ນຜ່ານຂໍ້ຕົກລົງຂອງທ່ານເຈົ້າເມືອງອາດສະພັງທອງ ວ່າດ້ວຍການແຕ່ງຕັ້ງຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ ( COVID – 19 ) ໂດຍອີງຕາມກົດໝາຍວ່າດ້ວຍການປົກຄອງທ້ອງຖິ່ນແຫ່ງ ສປປ ລາວ ( ສະບັບປັບປຸງ ) ເລກທີ 68/ສພຊ ພາກທີ IV ໝວດທີ 4 ມາດຕາ 40 ຂໍ້ 7, ອີງຕາມກົດໝາຍວ່າດ້ວຍການກັນ ແລະ ຄວບຄຸມພະຍາດຕິດຕໍ່ ສະບັບເລກທີ 034/ສພຊ ດັ່ງນັ້ນ ເຈົ້າເມືອງອາດສະພັງທອງ ຈຶ່ງຕົກລົງແຕ່ງຕັ້ງຄະນະຮັບຊີ້ນໍາລວມ, ແຕ່ງຕັ້ງກອງເລຂາ ແລະ ແຕ່ງຕັ້ງຄະນະຮັບຜິດຊອບແຕ່ລະສູນແຍກປ່ຽວຜູ້ຕ້ອງສົງໄສ ແລະ ຜູ້ທີ່ເດີນທາງມາຈາກສະຖານທີ່ໆມີພະຍາດລະບາດ ເຊິ່ງແບ່ງອອກເປັນ 15 ສູນຄື: ສູນລວມຂອງເມືອງ (ໂຮງຮຽນປະຖົມດົງເຫັນ) ຮັບຜູ້ຕ້ອງສົງໄສໃນທົ່ວເມືອງເພື່ອຕິດຕາມກຽມສົ່ງແຂວງ, ສູນໂຮງຮຽນມັດທະຍົມປາຍດົງເຫັນ ຮັບຜູ້ແຍກປ່ຽວມາຈາກບ້ານດົງເຫັນ ແລະ ບ້ານດົງກິໂລ, ສູນໂຮງຮຽນມັດທະຍົມຕົ້ນດົງເຫັນ ຮັບຜູ້ແຍກປ່ຽວມາຈາກບ້ານຕະບອງເພັດ, ໜອງປາກຊ່ອງ, ດອນປ່າໄລ່, ນາສະຫວ່າງ ແລະ ບ້ານສະພັງແກ້ວ, ສູນໂຮງຮຽນປະຖົມສາມັກຄີໄຊ ຮັບຜູ້ແຍກປ່ຽວມາຈາກບ້ານສາມັກຄີໄຊ, ປ່າໄລ່, ໂພນງອຍ ແລະ ບ້ານໜອງໃສ

ສູນໂຮງຮຽນປະຖົມນາຈານ ຮັບຜູ້ແຍກປ່ຽວມາຈາກບ້ານນາຈານ, ໂພສີແກ້ວ, ດົງໝາກກໍ່ ແລະ ບ້ານນາແສນແກ້ວ, ສູນໂຮງຮຽນມັດທະຍົມຕົ້ນໂພນຜາງ ຮັບຜູ້ແຍກປ່ຽວມາຈາກບ້ານໂພນຜາງ, ນາພັງໂຄກ, ຫ້ວຍ ແລະ ບ້ານໜອງຫອຍ, ສູນໂຮງຮຽນປະຖົມນາແຜກ ຮັບຜູ້ແຍກປ່ຽວມາຈາກບ້ານນາແຜກ, ສູນໂຮງຮຽນມັດທະຍົມສົມບູນດົງນາຂາມ ຮັບຜູ້ແຍກປ່ຽວມາຈາກບ້ານດົງນາຂາມ, ນາຄໍາໃຕ້ ແລະ ບ້ານນາຫຼັກ, ສູນໂຮງຮຽນມັດທະຍົມສົມບູນນາໄລ່ ຮັບຜູ້ແຍກປ່ຽວມາຈາກບ້ານນາໄລ່ດົງ, ນາໄລ່ໂຄກ, ໂຄກສະຫວ່າງ ແລະ ບ້ານໂນນຮັງ, ສູນໂຮງຮຽນມັດທະຍົມຕົ້ນດົງກຶມ ຮັບຜູ້ແຍກປ່ຽວມາຈາກບ້ານດົງກຶມ, ສູນໂຮງຮຽນມັດທະຍົມຕົ້ນໄລກະທະ ຮັບຜູ້ແຍກປ່ຽວມາຈາກບ້ານໄລກະທະ, ສູນໂຮງຮຽນມັດທະຍົມຕົ້ນປົ່ງດົງ ຮັບຜູ້ແຍກປ່ຽວມາຈາກບ້ານປົ່ງນາ, ປົ່ງດົງ ແລະ ບ້ານດົງຂວາງ, ສູນໂຮງຮຽນມັດທະຍົມຕົ້ນແຈລະມ໋ອງ ຮັບຜູ້ແຍກປ່ຽວມາຈາກບ້ານໂພນນົກຂຽນ ແລະ ບ້ານແຈລະມ໋ອງ, ສູນໂຮງຮຽນມັດທະຍົມສົມບູນຫຼຽນໄຊ ຮັບຜູ້ແຍກປ່ຽວມາຈາກບ້ານຫຼຽນໄຊ, ຫົວເມືອງ ແລະ ວັດທະນະສົມບູນ ແລະ ສູນໂຮງຮຽນມັດທະຍົມຕົ້ນພັງໂຮ ຮັບຜູ້ແຍກປ່ຽວມາຈາກບ້ານພັງໂຮ, ນານໍ້າທ່ຽງ ແລະ ບ້ານສີວິໄລ. ພ້ອມນັ້ນນັ້ນ, ກໍຍັງໄດ້ຜ່ານແຈ້ງການຂອງທ່ານເຈົ້າເມືອງ ສະບັບເລກທີ 190/ຈມ.ອທ ວ່າດ້ວຍການປ້ອງກັນ ຄວບຄຸມ ແລະ ແກ້ໄຂ ການລະບາດຂອງພະຍາດອັກເສບປອດຍ້ອນເຊື້ອຈຸລະໂລກສາຍພັນໃໝ່ ( Corona Virus Disease 2019 ຫຼື COVID – 19) ຕື່ມອີກດ້ວຍ. ຈາກນັ້ນ, ໃນກອງປະຊຸມກໍໄດ້ຮ່ວມກັນປຶກສາຫາລືກ່ຽວກັບການປ້ອງກັນຄວບຄຸມ ແລະ ແກ້ໄຂການລະບາດຂອງພະຍາດອັກເສບປອດ (COVID – 19) ຕື່ມດ້ວຍ

ຈາກນັ້ນ, ກໍໄດ້ມີການຈັດສົ່ງແຮງງານທີ່ມີຄວາມສ່ຽງທາງແຂວງສະຫວັນນະເຂດ ຈັດສົ່ງມາເມືອງອາດສະພັງທອງ ຈໍານວນ 188 ຄົນ ເພື່ອສົ່ງລົງໄປສູນທີ່ຢູ່ໃກ້ບ້ານຂອງເຂົາເຈົ້າເພື່ອກັກຕົວໃນໄລຍະ 14 ວັນ ເພື່ອເຝົ້າລະວັງການແຜ່ລະບາດຂອງເຊື້ອພະຍາດຖ້າຫາກບໍ່ພົບເຫັນກໍລະນີຜູ້ຕິດເຊື້ອກໍຈະປ່ອຍຕົວ.
ພາບຂ່າວ: ສາຍສະໝຸດ ສິມພະລີວົງ
ນັກຂ່າວເມືອງ: ອາດສະພັງທອງ