ມອບ-ຮັບໜ້າທີ່ຫົວໜ້າຫ້ອງການ ຖວທ ເມືອງອຸທຸມພອນ

499

ພິທີມອບ-ຮັບໜ້າທີ່ຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເມືອງອຸທຸມພອນ ລະຫວ່າງຜູ້ເກົ່າ ແລະ ຜູ້ໃໝ່, ໄດ້ຈັດຂຶ້ນທີ່ຫ້ອງການດັ່ງກ່າວ ໂດຍການເຂົ້າຮ່ວມຂອງ ທ່ານ ຈິນດາວັນ ບຸດລາສີ ຮອງເລຂາພັກເມືອງ

ໃນພິທີ ທ່ານ ນາງ ລຳທອງ ຈັນທະແສງ ຫົວໜ້າຫ້ອງການ ຖວທ ເມືອງຜູ້ເກົ່າ ໄດ້ສະຫຼຸບສັງເກດຕີລາຄາຄືນກ່ຽວກັບການຊີ້ນຳ ນຳພາວຽກງານໃນໄລຍະ 5 ປີຜ່ານມາ, ບໍ່ວ່າຈະເປັນວຽກງານຖະແຫຼງຂ່າວ, ວຽກງານບໍລິຫານ, ຈັດຕັ້ງ, ວຽກງານວັດທະນະທຳ ແລະ ວຽກງານທ່ອງທ່ຽວ ເຊິ່ງມີຫຼາຍໜ້າວຽກທີ່ຈັດຕັ້ງປະຕິບັດສຳເລັດ ແລະ ຫຼາຍວຽກທີ່ຍັງຄ້າງຄາຈະຕ້ອງໃຫ້ຫົວໜ້າຜູ້ໃໝ່ສືບຕໍ່ຈັດຕັ້ງປະຕິບັດ.

ຈາກນັ້ນໃນພິທີກໍໄດ້ເຊັນບົດບັນທຶກມອບ-ຮັບໜ້າທີ່ລະຫວ່າງ ທ່ານ ນາງ ລຳທອງ ຈັນທະແສງ ຫົວໜ້າຫ້ອງການ ຖວທ ເມືອງຜູ້ເກົ່າ ກັບ ທ່ານ ສຸພົນ ບຸນຍາລາດ ຫົວໜ້າຫ້ອງການ ຖວທ ຜູ້ໃໝ່ ແຕ່ກ່ອນແມ່ນເປັນຫົວໜ້າຫ້ອງການແຜນການ-ການລົງທຶນເມືອງ, ສ່ວນວ່າ ທ່ານ ນາງ ລຳທອງ ຈັນທະແສງ ແມ່ນໄປຮັບໜ້າທີ່ໃໝ່ ເປັນປະທານແນວລາວສ້າງຊາດເມືອງ.
ໂອກາດເຂົ້າຮ່ວມ ທ່ານ ຈິນດາວັນ ບຸດລາສີ ຮອງເລຂາພັກເມືອງ ກໍໄດ້ເນັ້ນໃຫ້ຜູ້ທີ່ມາຮັບໜ້າທີ່ຕ້ອງໄດ້ສືບຕໍ່ຊີ້ນຳ-ນຳພາແຕ່ລະວຽກງານທີ່ຄົງຄ້າງໃຫ້ສຳເລັດ ບໍ່ວ່າຈະເປັນຊຸກຍູ້ຄອບຄົວທີ່ຍັງບໍ່ທັນໄດ້ຮັບນາມມະຍົດເປັນຄອບຄົວວັດທະນະທຳ, ຊຸກຍູ້ແຫຼ່ງທ່ອງທ່ຽວເພື່ອດຶງດູດໃຫ້ນັກທ່ອງທ່ຽວເຂົ້າມາທ່ອງທ່ຽວຕາມສະຖານທີ່ຕ່າງໆໃຫ້ຫຼາຍຂຶ້ນ ແລະ ວຽກງານດ້ານອື່ນໆກໍເຊັ່ນດຽວກັນ.
ນັກຂ່າວເມືອງອຸທຸມພອນ
ບຸນຊູ ພົມມະເທບ