ສະຫວັນຄຸມເຂັ້ມ ແຮງງານລາວລັກລອບເຂົ້າປະເທດບໍ່ຜ່ານຈຸດກວດກາ ພົບເຫັນຕົວກັກທັນທີ

893

ຄະນະສະເພາະກິດ ເພື່ອປ້ອງກັນ, ຄວບຄຸມແລະ ແກ້ໄຂການລະບາດ ໂຄວິດ-19 ແຂວງ ສະຫວັນນະເຂດ ແຈ້ງສະບັບເລກທີ 01/ສພກ.ສຂ ລົງວັນທີ 24 ມີນາ 2020 ເຖິງທ່ານ ເຈົ້ານະຄອນໄກສອນພົມວິຫານ ແລະ ເຈົ້າເມືອງ 14 ເມືອງ, ທ່ານ ຫົວຫນ້າພະແນກການ, ກົມກອງອ້ອມຂ້າງແຂວງ ທັງພາກລັດ ແລະ ພາກທຸລະກິດ, ອໍານາດການປົກຄອງບ້ານ ແລະ ພໍ່ແມ່ປະຊາຊົນ ໃນຂອບເຂດແຂວງສະຫວັນນະເຂດ ໃຫ້ເອົາໃຈໃສ່ປະຕິບັດມາດຕະການ ການປ້ອງກັນ ແລະ ຄວບຄຸມການແຜ່ເຊື້ອພະຍາດອັກເສບປອດ ຍ້ອນເຊື້ອຈຸລະໂລກສາຍພັນໃໝ່ (ໂຄວິດ-19) ໃນກຸ່ມແຮງານລາວ ທີ່ເດີນທາງມາຈາກຕ່າງປະເທດ ເຂົ້າມາຢູ່ຕາມບ້ານ, ເມືອງຕ່າງໆ ໃນຂອບເຂດແຂວງສະຫວັນນະເຂດດັ່ງລຸ່ມນີ້:


1 ໃຫ້ຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການລະບາດ ໂຄວິດ-19 ຂອງ ນະຄອນ ແລະ 14 ເມືອງ ໄດ້ຈັດຫາສະຖານທີ່ກັກກັນ ແຮງງານລາວທີ່ກັບມາຈາກປະເທດທີ່ມີການແພ່ລະບາດເຊື້ອ ໂຄວິດ-19 ຢ່າງຮີບດ່ວນ ໂດຍສາມາດເລືອກເອົາສະຖານທີ່ໂຮງຮຽນ (ຫຼື ສະຖານທີ່ອື່ນໆ) ທີ່ມີມາດຕະຖານ ແລະ ມີຫ້ອງນ້ໍາ ເປັນບ່ອນກັກ ກັນໂດຍເຮັດເປັນຫຼາຍຈຸດ ເພື່ອຫຼີກລ່ຽງການຢູ່ແບບແອອັດ.

2 ໃຫ້ອໍານາດການປົກຄອງບ້ານ ກວດກາກຸ່ມແຮງງານທີ່ກັບມາຢູ່ບ້ານຂອງຕົນໃນແຕ່ລະວັນ, ໃຫ້ລົງທະບຽນ ເປັນລາຍບຸກຄົນ ແລ້ວປະສານງານກັບຄະນະສະເພາະກິດຂອງເມືອງ ເພື່ອປະຕິບັດການກັກກັນຢູ່ສູນທີ່ໄດ້ກຽມໄວ້, ຖ້າຜູ້ໃດທີ່ໄດ້ກັບມາຢູ່ບ້ານ ເກີນ 14 ວັນ ກ່ອນມີການຕັ້ງສູນກັກກັນ ຖ້າບໍ່ມີອາການເຈັບເປັນກ່ຽວກັບ ໂຄວິດ-19 ແມ່ນສາມາດໄປປະຕິບັດວຽກງານໃນສັງຄົມໄດ້, ສ່ວນຄົນໃດທີ່ກັບມາຢູ່ບໍ່ທັນຄົບ 14 ວັນ ແມ່ນແນະນໍາໃຫ້ມາຢູ່ສູນກັກກັນ ຫຼື ສາມາດກັກກັນຕົນເອງຢູ່ເຮືອນໄດ້ຖ້າມີເງື່ອນໄຂ (ຕາມຂໍ້ 3 ລຸ່ມນີ້).


3 ກຸ່ມແຮງງານທີ່ບໍ່ມີອາການຂອງ ໂຄວິດ-19 ໃນມື້ກັບເຂົ້າມາປະເທດ ແມ່ນສາມາດປະຕິບັດການກັກຕົນເອງ ຢູ່ເຮືອນໄດ້ສໍາລັບຄອບຄົວທີ່ມີເງື່ອນໄຂ ເຊັ່ນ: ມີຫ້ອງຢູ່ສະເພາະ ຫຼື ສະຖານທີ່ແຍກປ່ຽວສະເພາະ ໂດຍຮັບປະກັນບໍ່ເດີນທາງໄປໃສ, ສາມາດຕິດຕາມອາການຕົນເອງ ແລະ ລາຍງານໃຫ້ແພດສຸກສາລາ ຫຼື ສາທາລະນະສຸກນະຄອນ ແລະ ເມືອງໃນແຕ່ລະວັນ, ປະຕິບັດການປ້ອງກັນການໄອຈາມໂດຍໃສ່ຜ້າປິດປາກ (ຫນ້າກາກ) ອະນາໄມປະຈໍາ, ລ້າງມືໃຫ້ ສະອາດເລື້ອຍໆ ແລະ ຮັກສາສຸຂະພາບໃຫ້ດີຈົນຄົບ 14 ວັນ, ຖ້າມີອາການໄຂ້, ໄອ, ຫາຍໃຈຍາກແມ່ນໃຫ້ມາກວດທີ່ໂຮງຫມໍໂດຍໄວ.

4 ໃຫ້ຈັດກໍາລັງແພດລົງປະຈໍາຢູ່ສູນກັກກັນ ເພື່ອຕິດຕາມສຸຂະພາບຜູ້ຖຶກກັກກັນປະຈໍາວັນຕາມຫຼັກການດ້ານ ການແພດຈົນຄົບ 14 ວັນຖ້າພົບເຫັນຜູ້ມີອາການເຂົ້າຄ້າຍຕາມນິຍາມຂອງພະຍາດ ໂຄວິດ-19 ເຊ່ນ: ໄຂ້ອຸນຫະພູມ 37.5 ອົງສາຂຶ້ນໄປ, ໄອ, ເຈັບຄໍ, ຫາຍໃຈຝືດ ແລະ ອື່ນໆ ແມ່ນໃຫ້ປະສານກັບສູນປະຕິບັດງານສຸກເສີນພະແນກ ສາທາລະນະສຸກແຂວງ, ໂທ 041 166 ເພື່ອປະຕິບັດການນໍາສົ່ງກັກກັນ-ກວດກາ ແລະ ປິ່ນປົວໂດຍໄວ.


5 ໃຫ້ຈັດກໍາລັງປ້ອງກັນຄວາມສະຫງົບພາຍໃນສູນກັກກັນ 24 ຊົ່ວໂມງ ຕະລອດໄລຍະ 14 ວັນ ເພື່ອປ້ອງກັນ ການຫຼົບໜີຂອງຜູ້ຖືກກັກກັນ ແລະ ການກໍ່ກວນຄວາມບໍ່ສະຫງົບອື່ນໆຈາກບຸກຄົນພາຍນອກ.

6 ການປະຕິບັດເບິ່ງແຍງຊີວິດການເປັນຢູ່ຂອງຜູ້ຖືກກັກກັນ ແມ່ນໃຫ້ປຸກລະດົມຄອບຄົວຂອງເຂົາເຈົ້າໄດ້ມີ ການປະກອບສ່ວນ, ຖ້າຜູ້ຖືກກັກກັນເປັນຄົນອະນາຖາແມ່ນມອບໃຫ້ການຈັດຕັ້ງຂັ້ນບ້ານ ແລະ ເມືອງໄດ້ພິຈາລະນາ ໃຫ້ການຊ່ວຍເຫຼືອຢ່າງເຫມາະສົມ.


7 ໃຫ້ເຈົ້າຫນ້າທີ່ກ່ຽວຂ້ອງປະຕິບັດການເວນຍາມຊາຍແດນ ເພື່ອຕິດຕາມການຂ້າມໄປມາຂອງປະຊາຊົນທັງ ສອງຝັ່ງ ລາວ-ໄທ ແລະ ລາວ-ຫວຽດນາມ, ໂດຍສະເພາະກຸ່ມແຮງງານທີ່ກັບມາຈາກປະເທດໄທໂດຍເຮືອນ້ອຍ, ຖ້າພົບເຫັນແມ່ນໃຫ້ເຈົ້າຫນ້າທີ່ກັກຕົວແລ້ວນໍາສົ່ງເຂົ້າສູນກັກກັນ ເພື່ອຕິດຕາມການເຈັບເປັນ, ຫ້າມເດັດຂາດເຫັນແລ້ວບໍ່ກັກຕົວ ແລະ ປ່ອຍໃຫ້ເຂົ້າໄປໃນບ້ານໂດຍບໍ່ມີການກວດກາແນະນໍາໃດໆຈາກແພດ.

ຖ້າເມືອງໃດຈັດຕັ້ງສູນກັກກັນຍັງບໍ່ສໍາເລັດ ຕ້ອງໃຫ້ກຸ່ມແຮງງານທີ່ຂ້າມມານັ້ນລວມຕົວຢູ່ຈຸດໃດຫນຶ່ງ ແລ້ວປະສານງານກັບຫນ່ວຍງານແພດເພື່ອລົງມາກວດກາ, ຖ້າບໍ່ມີອາການໃດໆກ່ຽວກັບ ໂຄວິດ-19 ກໍ່ສາມາດປ່ອຍໃຫ້ເມືອກັກກັນຢູ່ເຮືອນໄດ້ (ຕ້ອງປະຕິບັດຕາມແນະນໍາໃນ ຂໍ້ 3), ແຕ່ຖ້າມີສູນກັກກັນແມ່ນໃຫ້ເຂົ້າສູນທັງຫມົດໃນກໍານົດ 14 ວັນ, ຖ້າມີອາການຕາມນິຍາມ ໂຄວິດ-19 ແມ່ນສົ່ງໄປໂຮງ ຫມໍເມືອງເພື່ອປະຕິບັດກວດກາຕາມຂັ້ນຕອນຕ່າງໆ.


8 ສິນຄ້າ ແລະ ພາຫະນະຕ່າງໆແມ່ນອະນຸຍາດໃຫ້ຜ່ານໄດ້ສະເພາະແຕ່ຢູ່ດ່ານສາກົນຂົວມິດຕະພາບ 2 ແລະ ດ່ານສາກົນແດນສະຫວັນເທົ່ານັ້ນ, ສ່ວນຈຸດອື່ນໆແມ່ນບໍ່ສາມາດໃຫ້ຜ່ານ (ໃນການຜ່ານຢູ່ດ່ານສາກົນແມ່ນໃຫ້ປະຕິບັດ ຕາມຄວາມເຫັນດີຂອງລະຫວ່າງ 2 ປະເທດ).

9 ຖ້າຫາກບຸກຄົນ ຫຼື ນິຕິບຸກຄົນບໍ່ໃຫ້ການຮ່ວມມື ຕ້ອງໄດ້ປະຕິບັດວິໄນຕາມກົດໝາຍຄວບຄຸມພະຍາດຕິດຕໍ່ ທີ່ໄດ້ກໍານົດໄວ້. ດັ່ງນັ້ນ, ຈຶ່ງແຈ້ງມາຍັງທ່ານເພື່ອຊາບ ແລະ ປະຕິບັດຕາມເນື້ອໃນແຈ້ງການນີ້ຢ່າງເຂັ້ມງວດ.