ສາທາຢືນຢັນ ມີຄົນຕິດເຊື້ອໂຄວິດ-9 ແລ້ວຈໍານວນ 2 ຄົນ.

697

ກະຊວງສາທາລະນະສຸກຢືນຢັນເວລາ 14:30 ໂມງ ຂອງວັນທີ 24 ມີນາ 2020 ທີ່ນະຄອນຫຼວງວຽງຈັນ ວ່າພົບຜູ້ຕິດເຊື້ອພະຍາດອັກເສບປອດໂຄວິດ 2 ຄົນຄື:

ຜູ້ທີ 1 ແມ່ນເພດຍິງອາຍຸ 36 ປີ ອາຊີບຜູ້ນໍາທ່ຽວ ແລະ ຜູ້ທີ 2 ແມ່ນເພດຊາຍ ອາຍຸ 28 ປີ ພະນັກງານເຮັດວຽກຢູ່ໂຮງແຮມແຫ່ງໜຶ່ງ. ທັງສອງມີປະຫວັດເຮັດວຽກັບຄົນຕ່າງປະເທດ ແລະ ເດີນທາງໄປຕ່າງປະເທດ ປັດຈຸບັນໄດ້ຮັກສາ ແລະ ປິ່ນປົວຢູ່ໂຮງໝໍມິດຕະພາບ 150 ຕຽງ.

 

ສໍາລັບແຮງງານລາວທີ່ຂ້າມມາແຕ່ປະເທດໄທ ທາງຂົວມິດຕະພາບລາວ-ໄທ 1 ວຽງຈັນ-ໜອງຄາຍ ໃນວັນທີ 23 ມີນາ 2020 ນີ້ ແມ່ນມີຫຼາຍກວ່າ 500 ຄົນ ແລະ ຍັງມີອີກຈຳນວນໜຶ່ງກຳລັງທະຍອຍກັນເຂົ້າມາອີກ ເຊິ່ງໃນນີ້ມີແຮງງານທີ່ຖືກກົດໝາຍ ມີປະມານ 95% ແລະ ຈຳນວນ 5% ແມ່ນພໍ່ແມ່ພີ່ນ້ອງໄປຢ້ຽມລຸກເຕົ້າ ແລະ ໄປທ່ອງທ່ຽວ, ແຕ່ແຮງງານລາວທີ່ຜິດກົດໝາຍທີ່ເຂົ້າມາທາງດ່ານຂົວມິດຕະພາບລາວ-ໄທ 1 ແມ່ນຍັງບໍ່ທັນມີເທື່ອ. ສ່ວນແຂວງສະຫວັນນະເຂດຢືນຢັນມີແຮງງານລາວຢ່າງໜ້ອຍ 4.000 ຄົນ ພວມຂ້າມຂົວມິດຕະພາບລາວ-ໄທແຫ່ງທີ 2.

ມາຮອດປັດຈຸບັນ, ທົ່ວໂລກມີຜູ້ຕິດເຊື້ອ 360.600 ຄົນ, ເສຍຊີວິດ 16.000 ກວ່າຄົນ ແລະ ປິ່ນປົວຫາຍດີແລ້ວ 97.600 ກວ່າຄົນ. ທ່ານ ຄຳແພງ ໄຊສົມແພງ ໃຫ້ຮູ້ຕື່ມວ່າ: ຈຳນວນແຮງງານລາວທັງໝົດທີ່ໄປເຮັດວຽກຢູ່ໄທ ໂດຍຜ່ານບໍລິສັດຈັດຫາງານ ແຕ່ປີ 2016-2019 ມີທັງໝົດ 213.527 ຄົນ ຍິງ 110.340 ຄົນ ໃນນີ້ມີຂົງເຂດກະສິກຳ 23.085 ຄົນ ຍິງ 9.206 ຄົນ, ຂົງເຂດອຸດສາຫະກຳ 42.586 ຄົນ ຍິງ 17.526 ຄົນ ແລະ ຂົງເຂດການບໍລິການ 147.856 ຍິງ 83.608 ຄົນ.

ໂດຍ: ສອດສ່ອງ