ສະຫາຍ ຄອນປະເສີດ ຫຼວງສຸວັນນະວົງ ຖຶກຄັດເລືອກເປັນເລຂາ ທຄຕລ ສາຂາແຂວງເຊກອງ

635

ທະນາຄານການຄ້າຕ່າງປະເທດລາວ ມະຫາຊົນ ສາຂາແຂວງເຊກອງ ໄດ້ຈັດກອງປະຊຸມໃຫຍ່ຄັ້ງທີ II ຂອງໜ່ວຍພັກຂອງຕົນຂຶ້ນ ເພື່ອສະຫຼຸບຕີລາຄາຄືນການຊີ້ນຳ-ນຳພາຂອງຄະນະໜ່ວຍພັກໄລຍະ 5 ປີຜ່ານມາ (2015-2019). ນອກນັ້ນ, ກໍ່ໄດ້ປ່ອນບັດເອົາຄະນະໜ່ວຍພັກຊຸດໃໝ່ ເຊິ່ງເລືອກໄດ້ ສະຫາຍ ຄອນປະເສີດ ຫຼວງສຸວັນນະວົງ ຫົວໜ້າທະນາຄານ ທຄຕລ ສາຂາແຂວງເຊກອງ.

ໃນທີ່ປະຊຸມ, ທະນາຄານ ທຄຕລ ສາຂາແຂວງເຊກອງໄດ້ສະຫຼຸບຜົນງານ 5 ປີຜ່ານມາໃນແຕ່ລະດ້ານໂດຍສະເພາະ: ດ້ານການເມືອງ-ແນວຄິດ, ການຈັດຕັ້ງແລະປັບປຸງ-ຂະຫຍາຍສາມະຊິກພັກ, ແບບແຜນການນຳພາ, ການຜັນຂະຫຍາຍແນວທາງນະໂຍບາຍ, ມະຕິ-ຄໍາສັ່ງ, ຂໍ້ກໍານົດ ແລະ ນິຕິກໍາຕ່າງໆ. ນອກນັ້ນ, ຍັງໄດ້ເອົາໃຈໃສ່ການບໍລິການລູກຄ້າທີ່ມາໃຊ້ບໍລິການຂອງທະນາຄານໃຫ້ມີປະສິດທິ ພາບ ແລະ ເພີ່ມຂອດບໍລິການດ້ານວຽກງານສິນເຊື່ອເພື່ອໃຫ້ເຂົ້າສູ່ລະບຽບການ ພ້ອມທັງໃຫ້ສອດຄ່ອງກັບທິດທາງນະໂຍບາຍຂອງພັກ ແລະລັດຖະບານເພື່ອເຮັດໃຫ້ຍອດສີນເຊື່ອຂອງ ທຄຕລ ເພີ່ມຂື້ນໃນແຕ່ລະປີ.

ໃນທີ່ປະຊຸມ, ກໍ່ໄດ້ປ່ອນບັດເອົາຄະນະໜ່ວຍພັກຊຸດໃໝ່ ໂດຍມີຜູ້ລົງສະໝັກ 5 ສະຫາຍ, ເລືອກເອົາ 3 ສະຫາຍ ເຊິ່ງກອງປະຊຸມຄັ້ງປະຖົມມະລຶກເຫັນດີເລືອກເອົາ ສະຫາຍ ຄອນປະເສີດ ຫຼວງສຸວັນ ນະວົງ ເປັນເລຂາ, ສະຫາຍ ຕຸລາ ວົງໜໍ່ແກ້ວ ເປັນຮອງເລຂາ ແລະ ເຫັນດີເລືອກເອົາສະຫາຍ ຄໍາແດງ ຄໍາພັນຂາວ ເປັນຄະນະ ທັງເປັນຜູ້ເຮັດວຽກງານກວດກາຊອງໜ່ວຍພັກ ເພື່ອພ້ອມກັນສືບຕໍ່ຊີ້ນຳ-ນຳພາຈັດຕັ້ງປະຕິບັດວຽກງານດັ່ງກ່າວໃຫ້ນັບມື້ນັບເຂັ້ມແຂງຂື້ນກວ່າເກົ່າ.

ໂອກາດນີ້, ຍັງໄດ້ຮັບຟັງການໂອ້ລົມຈາກທ່ານ ເຫຼັກໄຫຼ ສີວິໄລ ກໍາມະການປະຈໍາພັກແຂວງ ໄດ້ເນັ້ນໜັກໃຫ້ຄະນະພັກຊຸດໃໝ່ ຕ້ອງໄດ້ແບບຢ່າງນໍາໜ້າທາງດ້ານການບໍລິການຕ່າງໆ ແລະ ເອົາໃຈໃສ່ການສໍາຫຼວດກວດກາ, ການດໍາເນີນຊີວິດການເມືອງພາຍໃນຈຸ, ໜ່ວຍເພື່ອກໍ່ສ້າງຊວ່ນເຫຼືອເຊິ່ງກັນ ແລະກັນ, ສ້າງຄວາມສາມະຄີພາຍໃນໃຫ້ໜັກແໜ້ນພາຍນອກໃຫ້ກວ້າງຂວາງ.

ກອງປະຊຸມດັ່ງກ່າວ, ຈັດຂຶ້ນໃນວັນທີ 18 ມີນາ 2020 ທີ່ ທຄຕລ ສາຂາແຂວງເຊກອງ ເຊິ່ງໃຫ້ກຽດເຂົ້າຮ່ວມ ທ່ານ ເຫຼັກໄຫຼ ສີວິໄລ ກຳມະການປະຈໍາພັກແຂວງເຊກອງ, ທ່ານ ຄອນປະເສີດ ຫຼວງສະວັນະວົງ ເລຂາໜ່ວຍພັກ ຫົວໜ້າທະນາຄານ ທຄຕລ, ມີແຂກຖືກເຊີນຈາກຄະນະໜ່ວຍພັກອອ້ມຂ້າງ ພ້ອມດ້ວຍສະມາຊິກພັກພາຍໃນເຂົ້າຮ່ວມຢ່າງພ້ອມພຽງ.