ແຈ້ງຂ່າວມະຫາວິບປະໂຍກ! ປະທານສູນກາງອົງການພຸດທະສາສະໜາສັມພັນແຫ່ງສປປ ລາວ ໄດ້ ລະສະຣີຣະສັງຂານສ້ຽງພຣະຊົນມາຍຸແລ້ວ

608

ນັບເປັນຂ່າວທີ່ສຸດແສນຈະເສົ້າສະຫຼົດໃຈ ຫຼັງຊາບວ່າອົງພຣະຍອດແກ້ວມະຫາສັງຄະສຸທັມມາທິບໍດີ(ມະຫາງອນ ດຳຣົງບຸນມະຫາເຖຣະເຈົ້າ)ຣັດຕະນະມະຫາສັງຄະປາໂມກປະທານສູນກາງອົງການພຸດທະສາສະໜາສັມພັນແຫ່ງສປປ ລາວ ໄດ້ລະສະຣີຣະສັງຂານສ້ຽງພຣະຊົນມາຍຸແລ້ວ.

ສູນກາງອົງການພຸດທະສາສະໜາສັມພັນ ແຫ່ງ ສປປ ລາວ ຂໍແຈ້ງຂ່າວ ມະຫາວິບປະໂຍກ (ຄວາມເສົ້າສະລົດໃຈອັນໃຫຍ່ຫຼວງ) ມາຍັງ ການນຳພາ ພັກລັດ ການຈັດຕັ້ງ ພໍ່ແມ່ຄູບາອາຈານ ພຣະສົງສາມະເນນ ອອກຕົນຍາດໂຍມ ພຸດທະສາສະນິກະຊົນລາວບັນດາເຜົ່າ ທັງພາຍໃນ ແລະ ຕ່າງປະເທດ ຊາບວ່າບັດນີ້ ອົງພຣະຍອດແກ້ວມະຫາສັງຄະສຸທັມມາທິບໍດີ ປັນຈະສີວິສຸດອຸດຕະມະໂພທິຄຸນ ວິບູນທັມມະຣັດຕະນະຍານນາຍົກ ຕຣີປິດົກໂກສົນວິລາດ ພຸດທະບໍຣິສັດຄາຣະວະສະຖານ (ມະຫາງອນ ດຳຣົງບຸນມະຫາເຖຣະເຈົ້າ) ຣັດຕະນະມະຫາສັງຄະປາໂມກ ປະທານສູນກາງອົງການພຸດທະສາສະໜາສັມພັນ ແຫ່ງ ສປປ ລາວ ໄດ້ ລະສະຣີຣະສັງຂານສ້ຽງພຣະຊົນມາຍຸແລ້ວ ໃນວັນອັງຄານ ວັນທີ 24 ມີນາ ພຣະພຸດທະສັງກາດ ໒໕໖໒ (2020) ທີ່ ໂຮງໝໍ 103 ນະຄອນຫຼວງວຽງຈັນ ລວມສິຣິຊົນມາຍຸ ໄດ້ 91 ປີ, 91 ວັນ.

ປັດຈຸບັນ ພຣະສະຣີຣະສັງຂານ ໄດ້ນຳໄປປະດິດສະຖານຕັ້ງໄວ້ໃຫ້ບຳເພັນກຸສົນສັກກາຣະບູຊາ ທີ່ ຫໍທັມມະສະພາ ຊັ້ນ 2 ວັດພຣະທາດຫຼວງເໜືອ ເມືອງໄຊເຊດຖາ ນະຄອນຫຼວງວຽງຈັນ. ລາຍລະອຽດຕ່າງໆ ພ້ອມດ້ວຍ ກັບກຳໜົດການ ຖວາຍພຣະເພີງພຣະສະຣີຣະສັງຂານ ຈະໄດ້ແຈ້ງຕາມພາຍຫຼັງ

ໝາຍເຫດ ທາງຄະນະກັມມະການ ບໍ່ອະນຸຍາດໃຫ້ບັນດາທ່ານ ພຣະສົງ-ສາມະເນນ ຍາດໂຍມ ການຈັດຕັ້ງ ປະຊາສຳພັນມົ້ວທົ່ວໄປ, ການຈັດຕັ້ງ ພຣະສົງ ສາມະເນນ ອອກຕົນຍາດໂຍມ ທ່ານໃດທີ່ຕ້ອງການປະຊາສຳພັນ ກ່ຽວກັບການລະສັງຂານ ຂອງອົງພຣະຍອດແກ້ວມະຫາງອນ ໃຫ້ກັອບປີ້ຂໍ້ຄວາມ ຫຼື ແຊຣ໌ ຈາກເພຈ ຂອງສູນກາງອົງການພຸດທະສາສະໜາສັມພັນ ແຫ່ງ ສປປ ລາວ ເທົ່ານັ້ນ.

ທີ່ມາ: ສູນກາງອົງການພຸດທະສາສະໜາສັມພັນ ແຫ່ງ ສປປ ລາວ