ສສຊ ລົງເຜີຍແຜ່ຜົນສຳເລັດຂອງກອງປະຊຸມສະພາປະຊາຊົນແຂວງບໍ່ແກ້ວ

496

ວັນທີ 18 ຫາ ວັນທີ 20 ມີນາ 2020 ນີ້ ທ່ານ ນາງ ຄຳຈອມພູ ສີລິທຳ ສະມາຊິກສະພາແຫ່ງຊາດຊຸດທີ VIII ປະຈຳເຂດເລືອກຕັ້ງທີ 5 ແຂວງບໍ່ແກ້ວ ຮອງປະທານນສະພາປະຊາຊົນແຂວງບໍ່ແກ້ວ ຊຸດທີ I ໄດ້ສຳເລັດການລົງເຜີຍແຜ່ຜົນສຳເລັດຂອງກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ VIII ແລະ ກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນແຂວງບໍ່ແກ້ວ ຊຸດທີ I ຢູ່ບ້ານຈຽງຕອງ, ບ້ານດົງ, ບ້ານຫ້ວຍໂຄດ ແລະ ບ້ານຫ້ວຍແສດ ເມືອງປາກທາ ແຂວງບໍ່ແກ້ວ, ມີບັນດາຄະນະພັກຮາກຖານ, ອຳນາດການປົກຄອງບ້ານ ແລະ ພໍ່ແມ່ປະຊາຊົນທັງ 4 ບ້ານເຂົ້າຮ່ວມຮັບຟັງຢ່າງພ້ອມພຽງ.


ໃນໂອກາດທີ່ລົງເຜີຍແຜ່ຜົນສຳເລັດໃນຄັ້ງນີ້ ທ່ານ ນາງ ຄຳຈອມພູ ສີລິທຳ ໄດ້ນຳເອົາເນື້ອໃນຜົນສຳເລັດທີ່ກອງປະຊຸມສະພາແຫ່ງຊາດໄດ້ພິຈາລະນາຮັບຮອງເອົາບາງວຽກງານທີ່ສຳຄັນມາເຜີຍແຜ່ ເຊັ່ນ: ພິຈາລະນາຮັບຮອງເອົາການສະເໜີແຕ່ງຕັ້ງບຸກຄະລາກອນຂອງລັດຖະບານ, ຮັບຮອງເອົາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ປະຈຳປີ 2019 ແລະ ທິດທາງແຜນການປີ 2020, ຮັບຮອງເອົາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ 9 ເດືອນ, ຄາດຄະເນໝົດປີ 2019 ແລະ ແຜນການປະຈຳປີ 2020, ຮັບຮອງເອົາວຽກງານຂອງອົງການກວດສອບແຫ່ງລັດ ແລະ ອົງການກວດສອບລັດຖະບານ, ວຽກງານຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ, ວຽກງານສະພາແຫ່ງຊາດ. ພ້ອມນີ້, ຍັງໄດ້ພິຈາລະນາຮັບຮອງເອົາກົດໝາຍທັງໝົດ 8 ສະບັບ. ໃນນີ້, ມີກົດໝາຍສ້າງໃໝ່ 2 ສະບັບ ແລະ ກົດໝາຍປັບປຸງມີ 6 ສະບັບ.

ສໍາລັບຜົນສຳເລັດຂອງກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນແຂວງບໍ່ແກ້ວ ແມ່ນໄດ້ພິຈາລະນາຮັບຮອງເອົາການສະເໜີແຕ່ງຕັ້ງບຸກຄະລາກອນຂອງອົງການປົກຄອງແຂວງ 5 ທ່ານ, ຮັບຮອງເອົາແຜນພັດທະນາເສດຖະກິດ-ສັງຄົມປະຈຳປີ 2019 ແລະ ທິດທາງແຜນການປີ 2020 ຂອງແຂວງ, ບົດລາຍງານຂອງອົງການປົກຄອງແຂວງກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2019 ແລະ ທິດທາງແຜນການປີ 2020 ຂອງແຂວງ, ວຽກງານຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ, ວຽກງານຂອງສະພາປະຊາຊົນແຂວງບໍ່ແກ້ວ.

ພາບ-ຂ່າວ: ພອນສະຫວັນ ມະນີສີ.