ຜ່ອນຜັນອີກມື້! ສະຫວັນນະເຂດເປີດດ່ານໃຫ້ຄົນລາວກັບເຂົ້າປະເທດອີກ 1ມື້ເປັນກໍລະນີພິເສດ

552

ກ່ອນໜ້ານີ້ ລັດຖະບານໄດ້ອອກແຈ້ງການປິດດ່ານຫຼາຍແຫ່ງໃນທົ່ວປະເທດ ໜຶ່ງໃນນັ້ນແມ່ນ ດ່ານສາກົນຂົວມິດຕະພາບ 2 ມຸກດາຫານ-ສະຫວັນນະເຂດ ແຕ່ເນື່ອງຈາກຄົນລາວ ໂດຍສະເພາະແມ່ນແຮງງານລາວທີ່ເດີນທາງໄປເຮັດວຽກຢູ່ຕ່າງປະເທດນັ້ນມີຈໍານວນຫຼວງຫຼາຍ ແລະ ພວກເຂົາເຫຼົ່ານັ້ນລ້ວນຢາກກັບບ້ານກໍ່ຄືປະເທດລາວເຮົາເຮັດໃຫ້ດ່ານຂົວມິດຕະພາບ 2 ຕ້ອງເລື່ອນປິດໄປອີກ 1 ມື້ ແລະ ຈະອະນຸຍາດໃຫ້ຄົນລາວສາມາດຂ້າມດ່ານກັບລາວໄດ້ຈົນຮອດເວລາ 16:00ໂມງຂອງມື້ນີ້.

ໃນວັນທີ 23 ມີນາ 2020​ ດ່ານສາກົນຂົວມິດຕະພາບແຫ່ງທີ 2 ມຸກດາຫານ-ສະຫວັນນະເຂດ ຜ່ອນຜັນ ໃຫ້ຄົນລາວຂ້າມດ່ານກັບບ້ານກໍລະນີພິເສດ 1 ວັນ ຈົນເຖິງ 16 ໂມງ ເພາະກ່ອນໜ້ານີ້ໄດ້ມີການປະກາດປິດດ່ານເຂົ້າ-ອອກ ເລີ່ມແຕ່ວັນທີ 23 ມີນາ ເປັນຕົ້ນໄປ.

ເຈົ້າໜ້າທີ່ປະຈຳດ່ານໂພສພາບພ້ອມຂໍ້ຄວາມວ່າ: ລົດເມ 40-50 ຄັນ ມາພ້ອມກັນເພື່ອຮອງຮັບຄົນໂດຍສານທີ່ມີຈໍານວນແໜ້ນໜາ ພ້ອມເຕືອນຢ່າເອົາໂຄວິດ-19​ ກັບບ້ານເດີ້ ທຸກຄົນຕ້ອງກວດອຸນຫະພູມ ເຊິ່ງທາງດ່ານຜ່ອນຜັນໃຫ້ພີ່ນ້ອງຊາວລາວ ກັບບ້ານກໍລະນີພິເສດ 1 ວັນ ກໍ່ຄືມື້ນີ້ ຈົນເຖິງເວລາ 16 ໂມງ.