ຄ​ະ​ນະ​ກາ​ນ​ນຳ​ຂັ້ນ​ສູງ ເຂົ້າ​ວາງ​ພວງ​ມາ​ລາອະນຸສາວະ ລີນັກຮົບນິລະນາມດາວແດງ ເນື່ອງ​ໃນ​ໂອ​ກາດ​ວັນ​ສ້າງ​ຕັ້ງ​ພັກ

525

ວັນທີ 22 ມີນາ 2020 ຄະນະການນໍາຂັ້ນສູງພັກ-ລັດ ເຂົ້າຮ່ວມພິທີວາງພວງມາລາຢູ່ອະນຸສາວະ ລີນັກຮົບນິລະນາມດາວແດງ ໃນໂອກາດສະເຫຼີມ ສະຫຼອງວັນສ້າງຕັ້ງພັກປະຊາຊົນປະຕິວັດລາວ ຄົບ ຮອບ 65 ປີ (22 ມີນາ 1955-22 ມີນາ 2020) ເພື່ອສະແດງຄວາມເຄົາລົບນັບຖື ກະຕັນຍູຮູ້ບຸນ ຄຸນເຖິງຜົນງານ ແລະ ນໍ້າໃຈຕໍ່ສູ້ອັນພິລາດອາດ ຫານ ບໍ່ຍອມຈໍານົນຂອງບັນພະບູລຸດລາວ ແລະ ນັກຮົບປະຕິວັດທີ່ໄດ້ເສຍສະຫຼະຊີວິດ ແລະ ເລືອດເນື້ອເພື່ອພາລະກິດປະຕິວັດຢ່າງອົງອາດກ້າຫານ ພາຍໃຕ້ການນໍາພາຂອງພັກປະຊາຊົນປະຕິວັດລາວ ຈົນສາມາດຍາດໄດ້ໄຊຊະນະອັນໃຫຍ່ຫຼວງ ປະກາດເອກະລາດ ແລະ ສະຖາປະນາ ສປປ ລາວ ຂຶ້ນຢ່າງເປັນທາງການໃນວັນທີ 2 ທັນວາ 1975 ເຊິ່ງຜົນ ງານ ແລະ ຄຸນງາມຄວາມດີດັ່ງກ່າວ ໄດ້ຈາລຶກໄວ້ໃນຄວາມຊົງຈໍາຂອງປວງຊົນລາວບັນດາເຜົ່າຕະຫຼອດກາລະນານ.

ສໍາລັບຄະນະທໍາອິດ ແມ່ນຄະນະບໍລິຫານງານສູນກາງພັກ ນໍາໂດຍສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດ ຄະນະລັດຖະ ບານນຳໂດຍສະຫາຍ​ ທອງລຸນ ສີສຸລິດ ກຳມະການກົມການເມືອງສູນ​ກາງພັກ ນາຍົກລັດຖະມົນຕີ​ ຄະນະສະພາແຫ່ງ​ຊາດ ນຳໂດຍສະຫາຍ​ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ຄະນະສູນກາງແນວລາວສ້າງຊາດ ສະຫະພັນນັກຮົບເກົ່າ ແລະ ສາມອົງການຈັດຕັ້ງມະຫາຊົນ ນໍາໂດຍສະຫາຍ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ຜູ້ຊີ້ນໍາອົງການຈັດຕັ້ງມະຫາຊົນ ຄະນະກໍາລັງປ້ອງກັນຊາດ-ປ້ອງກັນຄວາມສະຫງົບ ນໍາໂດຍສະຫາຍ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ ເລຂາຄະນະພັກ ລັດຖະມົນຕີກະຊວງປ້ອງກັນປະເທດ, ຄະນະພັກ-ຄະນະນໍານະຄອນຫຼວງວຽງຈັນ ນໍາໂດຍສະຫາຍ ສິນລະວົງ ຄຸດໄພທູນ ກໍາມະການກົມການເມືອງ​ສູນກາງພັກ ເລຂາຄະນະພັກ ເຈົ້າຄອງນະຄອນຫຼວງວຽງຈັນ.

ພາຍຫຼັງການວາງພວງມາລາຢູ່ອະນຸສາວະລີນັກຮົບນິລະນາມແລ້ວ ຄະນະການນໍາຂັ້ນສູງກໍໄດ້ສືບຕໍ່ໄປວາງກະຕ່າດອກໄມ້ຢູ່ອະນຸສອນສະ​ຖານ ປະທານ ໄກສອນ ພົມວິຫານ ເຊິ່ງມີຄະນະຈັດຕັ້ງສູນກາງພັກ ຄະນະກວດກາສູນກາງພັກ ຄະນະທະນາຄານແຫ່ງ ສປປ ລາວ ຄະນະສະຖາບັນການເມືອງ ແລະ ການປົກຄອງແຫ່ງຊາດ ແລະ ຄະນະຮັບຜິດຊອບຫໍພິພິທະພັນ ໄກສອນ ພົມວິຫານ ເຂົ້າຮ່ວມນໍາ.