ທ່ານ ຈັນສີ ໂພສີຄຳ ເຄື່ອນໄຫວເຮັດວຽກຢູ່ແຂວງໄຊຍະບູລີ

560

ໃນລະຫວ່າງວັນທີ 18-20 ມີນາ 2020 ສະຫາຍ ຈັນສີ ໂພສີຄໍາ ກໍາມະການກົມການເມືອງສູນ ກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ໄດ້ເຄື່ອນໄຫວເຮັດວຽກຢູ່ແຂວງ ໄຊຍະບູລີ, ຊຸກຍູ້-ຊີ້ນຳວຽກງານຈັດຕັ້ງ, ກໍ່ສ້າງພັກ-ພະນັກງານຢູ່ເມືອງທົ່ງມີໄຊ, ເມືອງໄຊສະຖານ ແລະ ເຂົ້າຮ່ວມມີຄຳເຫັນໂອ້ລົມຕໍ່ກອງປະຊຸມສະຫຼຸບຖອດຖອນບົດຮຽນການດຳເນີນກອງປະຊຸມໃຫຍ່ຜູ້ແທນອົງ ຄະນະພັກເມືອງທົ່ວແຂວງໄຊຍະບູລີ ໂດຍໃຫ້ກຽດຕ້ອນຮັບຢ່າງອົບອຸ່ນຈາກທ່ານ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໄຊຍະບູລີ ພ້ອມດ້ວຍຄະນະ.

ໃນໂອກາດເຂົ້າຮ່ວມກອງປະຊຸມສະຫຼຸບຖອດຖອນບົດຮຽນການດຳເນີນກອງປະຊຸມໃຫຍ່ຜູ້ແທນອົງ ຄະນະພັກເມືອງທົ່ວແຂວງໄຊຍະບູລີ 19 ມີນາ 2020, ສະຫາຍ ຈັນສີ ໂພສີຄໍາ ໄດ້ຮັບຟັງການສະຫຼຸບລາຍງານຜົນການດຳເນີນກອງປະຊຸມໃຫຍ່ຜູ້ແທນອົງຄະນະພັກເມືອງທົ່ວແຂວງໄຊຍະບູລີ ໂດຍການລາຍງານຂອງສະຫາຍ ດວງຕາ ໄຊວຸດ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງໄຊຍະບູລີ ໃຫ້ຮູ້ເຖິງບາດກ້າວຂັ້ນຕອນການກະກຽມໄປເຖິງບາດກ້າວການດຳເນີນກອງປະຊຸມຈົນປະສົບຜົນສຳເລັດ; ພ້ອມນີ້ກໍ່ໄດ້ຮັບຟັງການປະກອບຄຳເຫັນຈາກບັນດາສະຫາຍເລຂາຄະນະບໍລິຫານງານພັກເມືອງ 11 ເມືອງ, ຄຳເຫັນຈາກຜູ້ຕາງໜ້າອະນຸກຳມະການເນື້ອໃນ, ອະນຸກຳມະການຂະບວນການ, ອະນຸກຳມະການບຸກຄະລາກອນ ແລະ ຄຳເຫັນຜູ້ແທນເຂົ້າຮ່ວມກອງປະຊຸມຄັ້ງນີ້ຢ່າງມີບັນຍາກາດທີ່ສ້າງສັນ ແລະ ມີເນື້ອໃນອຸດົມສົມບູນ.

ການສະຫຼຸບຕີລາຄາການດຳເນີນກອງປະຊຸມໃຫຍ່ຜູ້ແທນອົງຄະນະພັກເມືອງທົ່ວແຂວງໄຊຍະບູລີ ເຫັນວ່າໄດ້ດຳເນີນໄປຕາມບາດກ້າວຂັ້ນຕອນບັນດານິຕິກຳທີ່ກ່ຽວຂ້ອງໃນການກະກຽມດຳເນີນກອງປະຊຸມ ໃຫຍ່ພັກຂັ້ນຂອງຕົນ ເປັນຕົ້ນ: ບາດກ້າວທີ 1 ກະກຽມ ແລະ ສ້າງແຜນການ, ເຊື່ອມຊຶມບັນດານິຕິກໍາທີ່ກ່ຽວຂ້ອງຂອງຂັ້ນເທິງ, ອອກມະຕິຕົກລົງແຕ່ງຕັ້ງບັນດາອະນຸກຳມະການ ແລະ ຄະນະຮັບຜິດຊອບ ກະກຽມດຳເນີນກອງປະຊຸມ, ຈາກນັ້ນຄະນະທີ່ໄດ້ຮັບການແຕ່ງຕັ້ງສ້າງແຜນການດຳເນີນງານຂອງຕົນ; ບາດກ້າວທີ 2 ກະກຽມເຮັດທົດລອງດຳເນີນກອງປະຊຸມໃຫຍ່ຢູ່ຂັ້ນຮາກຖານໜ່ວຍພັກໃດໜຶ່ງກ່ອນ ສະຫຼຸບ ຖອດຖອນບົດຮຽນແລ້ວຈິ່ງຈັດຕັ້ງຜັນຂະຫຍາຍດຳເນີນໄປແຕ່ລະໜ່ວຍພັກທົ່ວເມືອງ ແລະ ທົ່ວແຂວງ; ບາດກ້າວທີ 3 ດຳເນີນຊີວິດການເມືອງພາຍໃນຄະນະບໍລິຫານງານພັກເມືອງ ແລະ ດຳເນີນກອງປະຊຸມ ຄົບຄະນະບໍລິຫານງານພັກເມືອງທ້າຍສະໄໝ, ດຳເນີນກອງປະຊຸມຄົ້ນຄວ້າປະກອບຄຳຄິດຄຳເຫັນໃສ່ຮ່າງ ລາຍງານການເມືອງ, ແຜນພັດທະນາເສດຖະກິດ-ສັງຄົມ ແລະ ຮ່າງບົດສຳຫຼວດການນຳພາລວມເທື່ອ ສຸດທ້າຍ, ຈັດຕັ້ງທາບທາມບຸກຄະລາກອນຮອບທີ 3, ລາຍງານການກະກຽມຄວາມພ້ອມດຳເນີນກອງປະ ຊຸມໃຫຍ່ອົງຄະນະພັກເມືອງຂອງຕົນ, ຄະນະປະຈຳພັກແຂວງຄົ້ນຄວ້າພິຈາລະນາ ແລະ ມີຄຳເຫັນເພື່ອ ປັບປຸງຖ້າຫາກວ່າຍັງມີບາງວຽກງານທີ່ບໍ່ທັນຄົບຖ້ວນ ຖ້າຄົບຖ້ວນສົມບູນແລ້ວກໍ່ອອກມະຕິຕົກລົງອະນຸມັດ ດຳເນີນກອງປະຊຸມໃຫຍ່ອົງຄະນະພັກເມືອງຢ່າງເປັນທາງການ; ບາດກ້າວທີ 4 ທົດລອງດຳເນີນກອງປະ ຊຸມໃຫຍ່ອົງຄະນະພັກເມືອງໜຶ່ງແລ້ວຖອດຖອນບົດຮຽນ ເພື່ອຜັນຂະຫຍາຍສູ່ບັນດາເມືອງທີ່ຍັງເຫຼືອທົ່ວ ແຂວງ ສຳລັບເມືອງເອກໃນເທດສະບານແຂວງແມ່ນດຳເນີນກອງປະຊຸມເປັນເມືອງສຸດທ້າຍ; ບາດກ້າວທີ 5 ສະຫຼຸບຖອດຖອນບົດຮຽນການດໍາເນີນກອງປະຊຸມໃຫຍ່ອົງຄະນະພັກເມືອງ ເພື່ອສືບຕໍ່ສ້າງຂະບວນການ ຕ້ອນຮັບບັນຍາກາດກ້າວເຂົ້າສູ່ການກະກຽມດຳເນີນກອງປະຊຸມໃຫຍ່ອົງຄະນະພັກແຂວງໃນຂັ້ນຕໍ່ໄປ.

ຜ່ານການດຳເນີນກອງປະຊຸມໃຫຍ່ອົງຄະນະພັກເມືອງ 11 ເມືອງທົ່ວແຂວງໄດ້ຄະນະບໍລິຫານງານ ພັກເມືອງຊຸດໃໝ່ທັງໝົດ 277 ສະຫາຍ, ຍິງ 48 ສະຫາຍ ທຽບໃສ່ສະໄໝຜ່ານມາຄະນະບໍລິຫານ ງານພັກເມືອງເພີ່ມຂຶ້ນ 20 ສະຫາຍ, ຍິງ 13 ສະຫາຍ, ໂຄງປະກອບມີ 3 ລຸ້ນ ຄື: 56-60 ປີ ມີ 32 ສະຫາຍ, ອາຍຸ 46-55 ປີ ມີ 137 ສະຫາຍ, ອາຍຸຕໍ່ກວ່າ 45 ປີ ມີ 108 ສະຫາຍ, ເປັນເລຂາໜ່ວຍ ພັກຮາກຖານບ້ານ 25 ສະຫາຍ, ຍິງ 4 ສະຫາຍ ຖ້າທຽບໃສ່ແຜນກຳນົດພະນັກງານນຳພາ-ຄຸ້ມຄອງທີ່ ໄດ້ຮັບຮອງໄວ້ ປະຕິບັດໄດ້ 95%.

ໃນຕອນທ້າຍຂອງກອງປະຊຸມ ຜູ້ແທນໄດ້ຮັບຟັງຄຳເຫັນໂອ້ລົມຈາກສະຫາຍ ຈັນສີ ໂພສີຄຳ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ເຊິ່ງສະ ຫາຍໄດ້ຍ້ອງຍໍຊົມເຊີຍຕໍ່ຜົນສຳເລັດຂອງກອງປະຊຸມໃຫຍ່ອົງຄະນະພັກເມືອງທົ່ວແຂວງໄຊຍະບູລີ ແລະ ໄດ້ເນັ້ນໜັກໃຫ້ຄະນະພັກຊຸດໃໝ່ແຕ່ລະຂັ້ນເພີ່ມທະວີເອົາໃຈໃສ່ສຶກສາອົບຮົມນໍາພາແນວຄິດສະມາຊິກພັກ-ພະນັກງານ ແລະ ປະຊາຊົນບັນດາເຜົ່າທີ່ຂຶ້ນກັບຄວາມຮັບຜິດຊອບຂອງຕົນຕໍ່ສິ່ງທ້າທາຍຕ່າງໆໃຫ້ສູງຂຶ້ນກວ່າເກົ່າ ສາມາດເຕົ້າໂຮມໄດ້ຄວາມສາມັກຄີເປັນປຶກແຜ່ນ; ສຸມໃສ່ປັບປຸງກໍ່ສ້າງຮາກຖານພັກໃຫ້ປອດໃສ, ເຂັ້ມແຂງ, ໜັກແໜ້ນ, ສາມາດເປັນແກນນໍາໃນລະບົບການເມືອງຢູ່ຂັ້ນຮາກຖານ, ເປັນຫຼັກແຫຼ່ງໃນການນໍາພາພັດທະນາເສດຖະກິດ-ສັງຄົມໃນຂອບເຂດສິດຂອງຕົນ; ຄະນະບໍລິຫານງານພັກເມືອງຊຸດໃໝ່ໃຫ້ຮີບຮ້ອນດຳເນີນກອງປະຊຸມຄົບຄະນະ ຄັ້ງທີ 2 ຂອງຕົນ ເພື່ອແບ່ງວຽກແບ່ງຄວາມຮັບຜິດຊອບໃຫ້ບຸກຄົນໃນຄະນະຢ່າງຈະແຈ້ງ, ວາງແຜນງານ-ໂຄງການຕະລອດໄລຍະສະໄໝຂອງຕົນ, ຮັບຮອງເອົາແຜນດຳເນີນງານ, ປະຕິບັດລະບອບເຮັດວຽກຕາມແຜນການທີ່ວາງໄວ້, ເສີມຂະຫຍາຍແບບແຜນເຮັດວຽກຕິດແທດກັບຮາກຖານຕົວຈິງ, ຕິດແທດກັບມະຫາຊົນ ແລະ ສ້າງໃຫ້ໄດ້ບຸກຄະລາກອນທີ່ມີຄຸນນະພາບ ກໍ່ຄືພະນັກ ງານລຸ້ນສືບທອດປ່ຽນແທນທີ່ດີຄົບມາດຖານເງື່ອນໄຂໃຫ້ແກ່ການກະກຽມດຳເນີນກອງປະຊຸມໃຫຍ່ຄັ້ງຕໍ່ໄປ, ຈັດຕັ້ງເຜີຍແຜ່-ເຊື່ອມຊຶມມະຕິກອງປະຊຸມໃຫຍ່ອົງຄະນະພັກເມືອງຂອງຕົນໃຫ້ປະຊາຊົນ ແລະ ສະມາຊິກພັກ-ພະນັກງານທົ່ວເມືອງໄດ້ຮັບຮູ້ເຂົ້າໃຈ, ມີຄວາມເປັນເອກະພາບພ້ອມກັນຈັດຕັ້ງປະຕິບັດ, ບັນຫາສໍາຄັນ ແມ່ນຄະນະພັກແຕ່ລະຂັ້ນ ຕ້ອງເປັນເຈົ້າການສູງໃນການຊີ້ນໍາ-ນໍາພາ ຈັດຕັ້ງປະຕິບັດ, ເຊື່ອມຊຶມ ແລະ ຜັນຂະຫຍາຍວຽກງານດັ່ງກ່າວໃຫ້ປະກົດເປັນຈິງ ສາມາດບັນລຸຜົນສຳເລັດໄດ້ຕາມຄາດໝາຍທີ່ວາງໄວ້.

ໂດຍ: ຄອນຄໍາ ໂສລັດຕະນະວົງ