ໂຄງການຕາຝັ່ງເຈື່ອນ ນະຄອນໄກສອນ ພົມວິຫານຄືບໜ້າ50%

548

ພະແນກໂຍທາທິການ ແລະ ຂົນສົ່ງ ແຂວງສະຫວັນນະເຂດໄດ້ແຈ້ງໃຫ້ຮູ້ວ່າ: ໂຄງການກໍ່ສ້າງຕາຝັ່ງເຈື່ອນແຄມຂອງຢູ່ເຂດບ້ານ ໄຊຍະພູມ ນະຄອນໄກສອນ ພົມວິຫານ ຫຼັງຈາກສ້າງສໍາເລັດຈະເປັນສູນການຄ້າຄົບວົງຈອນ, ສູນກິລາ, ບ່ອນອອກກໍາລັງກາຍ, ຮ້ານອາຫານ, ແຫຼ່ງທ່ອງທ່ຽວ ຊຶ່ງຈະກາຍເປັນໃບໜ້າໃໝ່ຂອງນະຄອນໄກສອນ ພົມວິຫານ

ທ່ານ ພົມມາ ວົງພະຈິດ ຫົວໜ້າໂຄງການດັ່ງກ່າວໄດ້ໃຫ້ສໍາພາດຕໍ່ຜູ້ສື່ຂ່າວສະຖານີວິທະຍຸກະຈາຍສຽງແຂວງ ໃນຕອນເຊົ້າວັນທີ 19 ມີນາ 2020 ນີ້ວ່າ: ໂຄງການກໍ່ສ້າງຕາຝັ່ງເຈື່ອນແຄມຂອງ ນະຄອນໄກສອນພົມວິຫານ ແມ່ນຈະກວມເອົາເຂດດ່ານປະເພນີລະຫວ່າງ ນະຄອນໄກສອນ ພົມວິຫານ (ສປປ ລາວ) – ມຸກດາຫານ (ປະເທດໄທ) ມີຄວາມຍາວທັງໝົດ 980 ແມັດ ແລະ ກວ້າງ 50 ແມັດ ອອກຈາກໜ້າທາງ ມີມູນຄ່າການລົງທຶນຫຼາຍກວ່າ 4.500.000 ໂດລາ ໂດຍການສະໜອງທຶນຈາກທະນາຄານພັດທະນາອາຊີ.ໂຄງການນີ້ໄດ້ເລີ່ມມີການກໍ່ສ້າງແຕ່ເດືອນມິຖຸນາ 2019 ແລະ ປະຈຸບັນນີ້ແມ່ນສໍາເລັດແລ້ວຫຼາຍກວ່າ 50% ຊຶ່ງຄາດວ່າ ຈະສ້າງສໍາເລັດໃນປີ 2021 ທີ່ຈະມາເຖິງນີ້


(ພາບປະກອບບໍ່ກ່ຽວຂ້ອງກັບບົດ)
ທ່ານ ພົມມາ ໄດ້ກ່າວຕື່ມອີກວ່າ: ໂຄງການນີ້ ເປັນໂຄງການໃຫຍ່ນອກຈາກການສ້າງຕາຝັ່ງເຈື່ອນແລ້ວຍັງມີການປັບປຸງເສັ້ນທາງພາຍໃນເຂດດັ່ງກ່າວ, ນອກນັ້ນຍັງຈະມີໄຟເຍືອງທາງ, ສ້າງສວນດອກໄມ້, ສວນສາທາລະນະ ເພື່ອເປັນບ່ອນອອກກໍາລັງກາຍ, ສ້າງສູນການຄ້າທີ່ມີຫຼາຍກວ່າ 10 ສູນການຄ້າ ແລະ ອື່ນໆ.