ກົງສຸນລາວທີ່ນະຄອນຄຸນມິງ ມອບເງິນຊ່ວຍເຫຼືອປະຊາຊົນຈີນ ທີ່ໄດ້ຮັບຜົນກະທົບໂຄວິດ-19.

497

ຕອນບ່າຍຂອງວັນທີ 19 ມີນາ 2020, ທ່ານ ຄຳພອນ ວົງສັນຕິ, ກົງສຸນໃຫຍ່ ແຫ່ງ ສປປ ລາວ ທີ່ນະຄອນຄຸນມິງ ສປ ຈີນ ໄດ້ຕາງໜ້າຜູ້ບໍລິຈາກເກືອບ 600 ກວ່າທ່ານ ມອບເງີນຊ່ວຍເຫລືອຈຳນວນ 28.000 ຢວນ  (ປະມານ 36.400.000 ກີບ) ໃຫ້ແກ່ປະຊາຊົນແຂວງຢູນນານ ສປ ຈີນ  ທີ່ໄດ້ຮັບຜົນກະທົບຈາກການລະບາດຂອງ ໄວຣັສໂຄວິດ – 19 ທີ່ຫ້ອງການຕ່າງປະເທດແຂວງຢູນນານ ສປ ຈີນ.

ທ່ານ ຄຳພອນ ວົງສັນຕິ, ກົງສຸນໃຫຍ່ ແຫ່ງ ສປປ ລາວ ທີ່ນະຄອນຄຸນມິງ ສປ ຈີນ  ໄດ້ແຈ້ງໃຫ້ຊາບວ່າ: ວັນທີ  07 ກຸມພາ 2020 ໜ່ວຍຊາວໜຸ່ມສະຖານກົງສຸນໃຫຍ່  ແຫ່ງ  ສປປ  ລາວ ທີ່ນະຄອນຄຸນມິງ ສປ ຈີນ ໄດ້ເປັນເຈົ້າ ການຈັດການລະດົມເງີນຊ່ວຍເຫລືອປະຊາຊົນແຂວງຢູນນານ ສປ ຈີນ ທີ່ໄດ້ຮັບຜົນກະທົບຈາກການລະບາດຂອງໄວຣັສໂຄວິດ – 19  ເຊິ່ງໄດ້ຮັບການສະໜັບສະໜູນຈາກຫຼາຍພາກສ່ວນຢ່າງເປັນຂະບວນເຊັ່ນ: ພະນັກງານກົງສຸນໃຫຍ່ທີ່ຄຸນມິງພ້ອມດ້ວຍຄອບຄົວ ແລະ ຫມູ່ເພື່ອນ, 3 ອົງການຈັດຕັ້ງມະຫາຊົນ, ​ນັກສຶກສາລາວທີ່ແຂວງຢູນນານ, ປະທານບໍລິສັດ  Zhe Jiang  Long Sheng  Aquatic  Products  Co.,Ltd, ປະທານບໍລິສັດ ໂຊລິນ ຂາເຂົ້າ – ຂາອອກ ຈໍາກັດຜູ້ດຽວ ແລະ ພາກສ່ວນອື່ນໆ  ເກືອບ 600 ທ່ານ.

ນອກນັ້ນ, ໜ່ວຍຊ່ວຍໜຸ່ມສະຖານກົງສຸນໃຫຍ່  ແຫ່ງ  ສປປ ລາວ  ທີ່ນະຄອນຄຸນມິງ ຍັງໄດ້ຂົນຂວາຍເຄື່ອງນຸ່ມ ຈຳນວນ  512 ໂຕ  ຄິດເປັນມູນຄ່າ  15 ລ້ານກວ່າກີບ ມອບໃຫ້ແກ່ປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມທີ່ເມືອງສະໜາມໄຊ ແຂວງອັດຕະປື ໃນປີ  2018 ແລະ ຈັດກິດຈະກຳລະດົມເງີນຊ່ວຍເຫຼືອປະຊາຊົນລາວທີ່ໄດ້ຮັບຜົນກະທົບຈາກໄພນໍ້າຖ້ວມໃນປີ 2019 ຈຳນວນ 12 ລ້ານກວ່າກີບ. ທັງນີ້ກໍ່ເພື່ອຍົກສູງນໍ້າໃຈຮັກເຊື້ອແພງຊາດ,  ສ້າງຄວາມສາມັກຄີພາຍໃນ ແລະ ພາຍນອກ, ຊ່ວຍເຫລືອສັງຄົມໃນຖັນແຖວຊາວໜຸ່ມ, ໄວໜຸ່ມນັກສຶກສາລາວ, ສົ່ງເສີມມິດຕະພາບ ແລະ ສາຍພົວພັນອັນເປັນມູນເຊື້ອລາວ – ຈີນ, ຈີນ – ລາວ.

ທີ່ມາ: ສະຖານກົງສຸນໃຫຍ່  ແຫ່ງ  ສປປ ລາວ ປະຈໍານະຄອນຄຸນມິງ