ເຜີຍແຜ່ມາດຕະການຕ້ານໂຄວິດ-19 ແກ່ທູດຕ່າງປະເທດປະຈໍາລາວ

585

ປັດຈຸັນລາວໄດ້ມີມາດຕະການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19ຢ່າງເຂັ້ມງວດ ເນື່ອງຈາກສະພາບການລະບາດທີ່ຮຸນແຮງຢູ່ຫຼາຍປະເທດໃນທົ່ວໂລກ ແຕ່ແນ່ນອນວ່າມາດຕະການດັ່ງກ່າວຕ້ອງສົ່ງຜົນກະທົບຫຼາຍດ້າຕໍ່ລາວເຮົາເອງ ແລະ ຄູ່ຮ່ວມມືລະຫວ່າງປະເທດ. ດັ່ງນັ້ນ, ຈຶ່ງຈໍາເປັນຕ້ອງໄດ້ເຜີຍແຜ່ມາດຕະການດັ່ງກ່າວ ຕໍ່ບັນດາທູຕານຸທູດ ແລະ ບັນດາຜູ້ຕາງໜ້າອົງການຈັດຕັ້ງສາກົນ ປະຈຳລາວ ໃຫ້ຮັບຮູ້ຢ່າງທົ່ວເຖິງ.

ກອງປະຊຸມເຜີຍແຜ່ກ່ຽວກັບ ມາດຕະການສະກັດກັ້ນ ປ້ອງກັນ ແລະ ແກ້ໄຂການລະບາດຂອງພະຍາດໂຄວິດ-19 ຂອງລັດຖະບານລາວ ຕໍ່ບັນດາທູຕານຸທູດ ແລະ ບັນດາຜູ້ຕາງໜ້າອົງການຈັດຕັ້ງສາກົນ ປະຈຳລາວ ຈັດຂຶ້ນໃນວັນທີ 19 ມີນາ 2020 ທີ່ສູນການຮ່ວມມືສາກົນ ແລະ ການຝຶກອົບຮົມ (ICTC) ໂດຍມີທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ, ທ່ານ ຮສ ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ເຂົ້າຮ່ວມ.

ທ່ານ ສະເຫຼີມໄຊ ກົມມະສິດ ໄດ້ກ່າວວ່າ: ມາຮອດ ເວລາ 16:00 ໂມງ ຂອງວັນທີ 19 ມີນາ 2020 ພະຍາດໂຄວິດ-19 ໄດ້ແຜ່ລະບາດໄປສູ່ 165 ປະເທດໃນທົ່ວໂລກ ມີຜູ້ຕິດເຊື້ອທັງໝົດ 219.345 ກໍລະນີ ເສຍຊີວິດ 8.969 ກໍລະນີ ປິ່ນປົວດີ 85.745 ກໍລະນີ. ສຳລັບ ສປປ ລາວ ແມ່ນຍັງບໍທັນມີກໍລະນີໃດຜູ້ຕິດເຊື້ອ.

ໃນໄລຍະຜ່ານມາ, ລັດຖະບານ ໄດ້ປະຕິບັດບາງມາດຕະການ ເພື່ອສະກັດກັ້ນ ແລະ ປ້ອງກັນ ແຕ່ຫົວທີ ເປັນຕົ້ນແມ່ນ: ໄດ້ແຕ່ງຕັ້ງຄະນະສະເພາະກິດເພື່ອຊີ້ນຳການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດດັ່ງກ່າວ; ເຂັ້ມງວດກັ່ນກອງຜູ້ເດີນທາງເຂົ້າມາໃນລາວ; ກຽມຄວາມພ້ອມຂອງໂຮງໝໍ; ຈັດສັນງົບປະມານ; ອອກມາດຕະການຄຸ້ມຄອງລາຄາຜ້າປິດປາກ-ປິດດັງ, ນໍ້າຢາລ້າງມື ແລະ ອຸປະກອນການແພດ.

ແຕ່ເນື່ອງຈາກວ່າ ປະເທດລາວ ມີຊາຍແດນຕິດຈອດ ແລະ ມີການເດີນທາງເຂົ້າມາຂອງຄົນຈາກຕ່າງປະເທດທີ່ມີຜູ້ຕິດເຊື້ອ ເຮັດໃຫ້ ສປປ ລາວ ມີຄວາມສ່ຽງສູງ. ດັ່ງນັ້ນ, ລັດຖະບານ ໄດ້ສຸມໃສ່ບັນດາມາດຕະການເພື່ອສະກັດກັ້ນ ແລະ ປ້ອງກັນການແຜ່ລະບາດ ພ້ອມທັງມີແຜນການກະກຽມຄວາມພ້ອມໃນການຮັບມືກັບກໍລະນີ ທີ່ອາດກວດພົບຜູ້ຕິດເຊື້ອໃນຕໍ່ໜ້າ.

ສະນັ້ນ, ລັດຖະບານ ຈື່ງສືບຕໍ່ປະຕິບັດມາດຕະການຜ່ານມາທີ່ໄດ້ວາງອອກແລ້ວ ແລະ ມາດຕະການເພື່ອສະກັດກັ້ນເພີ່ມເຕີມຄື: ປິດດ່ານທ້ອງຖິ່ນ ແລະ ດ່ານປະເພນີ ໃນຂອບເຂດທົ່ວປະເທດ, ສ່ວນດ່ານສາກົນ ໃຫ້ເບິ່ງຄວາມຮັບປະກັນຮອບດ້ານ ຈຶ່ງອະນຸຍາດໃຫ້ເປີດ ໃຫ້ເຂົ້າ-ອອກ ປົກກະຕິ; ໂຈະການອອກ VISA ກັບດ່ານທຸກປະເພດ ສຳລັບທຸກປະເທດ ໃນໄລຍະເວລາ 30 ວັນ.

ສຳລັບຜູ້ທີ່ໄດ້ວີຊາເຂົ້າລາວແລ້ວ ກໍຕ້ອງມີການຢັ້ງຢືນການກວດສຸຂະພາບ ແລະ ກວດປະຫວັດການເຄື່ອນໄຫວໃນໄລຍະ 14 ວັນຜ່ານມາ, ສ່ວນປະເທດ ທີ່ໄດ້ຮັບການຍົກເວັ້ນວີຊາ ເຫັນດີໃຫ້ຍົກເລີກການຍົກເວັ້ນວີຊາດັ່ງກ່າວຊົ່ວຄາວ ຈົນກວ່າຈະມີການພິຈາລະນາໃໝ່ຂອງລັດຖະບານ; ຫຼີກລ່ຽງການເດີນທາງໄປຕ່າງປະເທດ ຂອງພົນລະເມືອງລາວ ໃນໄລຍະນີ້; ຜູ້ທີ່ເດີນທາງກັບຈາກປະເທດທີ່ມີການແຜ່ລະບາດຂອງພະຍາດ ໃຫ້ປະຕິບັດການແຍກປ່ຽວຢ່າງໜ້ອຍ 14 ວັນ ເພື່ອຕິດຕາມສຸຂະພາບ.

ທ່ານ ສະເຫຼີມໄຊ ກົມມະສິດ ໃຫ້ສຳພາດວ່າ: ກອງປະຊຸມເຜີຍແຜ່ໃນຄັ້ງນີ້ ແມ່ນໃຫ້ບັນດາທູຕານຸທູດ ແລະ ຜູ້ຕາງໜ້າອົງການສາກົນ ມາຮັບຟັງບັນດາມາດຕະການຂອງລັດຖະບານລາວ ໃນການສະກັດກັ້ນ ແລະ ຮັບມື ເພື່ອຂໍຄວາມຮ່ວມມື, ສະໜັບສະໜູນຂອງຕ່າງປະເທດ ເພື່ອໃຫ້ສະດວກໃນການຈັດຕັ້ງປະຕິບັດ ແລະ ຮ່ວມມື ພ້ອມທັງແຈ້ງໄປຫາປະເທດຂອງບັນດາທູດ ໃຫ້ເຂົ້າໃຈທົ່ວເຖີງ ສະເພາະແມ່ນການກັກໂຕເອງ ແລະ ການເຮັດວີຊ່າທາງການທ່ອງທ່ຽວ ທີ່ໂຈະຈົນຮອດວັນທີ 20 ເມສາ 2020 ແລະ ຄວາມເຂົ້າໃຈຂອງບັນດານັກທຸລະກິດ ທີ່ໄປເຮັດວີຊ່າມາລາວ ແມ່ນຍັງສາມາດເຮັດໄດ້ ແຕ່ຕ້ອງປະຕິບັດຕາມຂັ້ນຕອນການແຍກປ່ຽວ ແລະ ມືໃບຢັ້ງຢືນການແພດຢ່າງຄົບຖ້ວນ ຈື່ງສາມາດມາລາວໄດ້.

ຂໍ້ມູນຈາກ: ຂ່າວເສດຖະກິດການຄ້າ