ໄຊຍະບູລີເຜີຍແຜ່ຂໍ້ຫ້າມ ເມື່ອຢູ່ໃກ້ເສົາໄຟຟ້າແຮງດັນສູງ

560

ໃນວັນທີ 18 ມີນາ 2020 ບໍລິສັດໄຊຍະບູລີ ພາວເວີຈໍາກັດ ແລະໜ່ວຍງານຄຸ້ມຄອງຍົກຍ້າຍຈັດສັນໂຄງການພະລັງງານນໍ້າ ແຂວງໄຊຍະບູລີ ໄດ້ລົງເຜີຍແຜ່ຂໍ້ຫ້າມ ເມື່ອຢູ່ໃກ້ກັບເສົາໄຟຟ້າແຮງດັນສູງ ແລະ ຂອບເຂດແລວສະຫງວນສາຍສົ່ງໄຟຟ້າແຮງດັນສູງ ຢູ່ເມືອງພຽງ ແຂວງໄຊຍະບູລີ ນໍາໂດຍ ທ່ານ ສົມໝາຍ ແສນພົນສິລິ ຫົວໜ້າຄຸ້ມຄອງຍົກຍ້າຍຈັດສັນໂຄງການພະລັງງານນໍ້າແຂວງໄຊຍະບູລີ ພ້ອມດ້ວຍຄະນະ ໂດຍການເປັນກຽດເຂົ້າຮ່ວມຂອງທ່ານ ຄໍາພັນ ຄໍາພູບົວ ຮອງເຈົ້າເມືອງ ເມືອງພຽງ ມີບັນດາພະນັກງານທີ່ກ່ຽວຂ້ອງ ພ້ອມດ້ວຍເລຂາໜ່ວຍພັກ ນາຍບ້ານເຂດທີ່ມີເສົາໄຟຟ້າແຮງດັນສູງເຂົ້າຮ່ວມ

ການລົງມາເຜີຍແຜ່ແຈ້ງການກ່ຽວກັບການຈັດຕັ້ງປະຕິບັດລະບຽບການ, ຄວາມປອດໄພໃນລະບົບສາຍສົ່ງແຮງດັນສູງ ເຊິ່ງລະບົບສາຍສົ່ງໄຟຟ້າແຮງດັນສູງຕ່າງໆແມ່ນຊັບສົມບັດຂອງຊາດ, ພົນລະເມືອງລາວ ທຸກຄົນມີພັນທະໃນການປົກປັກຮັກສາເພຶ່ອຜົນປະໂຫຍດຂອງຊາດ ໃນບໍລິເວນຕີນເສົາ ແລະແລວສະຫງວນສາຍສົ່ງໄຟຟ້າແຮງດັັນສູງທີ່ເປັນອັນຕະລາຍຕໍ່ກັບຄົນ, ສັດລ້ຽງ ແລະສິ່ງທີ່ມີຊີວິດຕ່າງໆ, ສະນັ້ນເພຶ່ອຮັບປະກັນຄວາມປອດໄພຕໍ່ຊີວິດ, ສັບສິນຂອງປະຊາຊົນ ທາງໂຄງການຈຶ່ງອອກຂໍ້ຫ້າມຕ່າງໆເພຶ່ອນໍາໄປເຜີຍແຜ່ໃຫ້ແກ່ປະຊາຊົນຮັບຮູ້ເຂົ້າໃຈແຈ້ງ ແລະນໍາໄປຈັດຕັ້ງປະຕິບັດຢ່າງເຄັ່ງຄັດ

ໃນໂອກາດນີ້ ທ່ານ ຄໍາພັນ ຄໍາພູບົວ ຮອງເຈົ້າເມືອງ ເມືອງພຽງ ກໍ່ໄດ້ເນັ້ນໃຫ້ພາກສວ່ນທີ່ກ່ຽວຂ້ອງຈົ່ງເອົາໃຈໃສ່ນໍາເອົາເນື້ອໃນຈິດໃຈ, ຄວາມຮູ້ລວມເຖິງຂໍ້ຫ້າມຕ່າງໆຄັ້ງນີ້ໄປເຜີຍແຜ່ເຮັດໃຫ້ປະຊາຊົນບັນດາເຜົ່າໂດຍສະເພາະຂອບເຂດບ້ານທີ່ມີເສົາໄຟຟ້າແຮງດັນສູງເຂົ້າໃຈແຈ້ງ ແລະຊ່ວຍກັນຈັດຕັ້ງປະຕິບັດໃຫ້ໄດ້ຮັບຜົນດີ ແລະມີຜົນສໍາເລັດຕາມຄາດໝາຍ.

ຂ່າວໂດຍ: ແສງສຸດາ ກິ່ງສະຫວັດ.