ໂຈະໝົດ! ປີໃໝ່ລາວປີນີ້ ນະຄອນຫຼວງປອດກິດຈະກໍາ

689

ປີໃໝ່ລາວປີນີ້ຫຼາຍແຫ່ງອາດບໍ່ຄຶກຄື້ນຄືກັບປີຜ່ານໆມາເນື່ອງຈາກຕ້ອງປະຕິບັດມາດຕະການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ອັນກໍາລັງແຜ່ລະບາດຢ່າງໜັກໜ່ວງຢູ່ຫຼາຍປະເທດໃນທົ່ວໂລກ. ທັງນີ້ ກໍ່ເພື່ອຄວາມປອດໄພຂອງປະເທດກໍ່ຄືປະຊາຊົນທຸກຄົນໃນຊາດ. ສະເພາະນະຄອນຫຼວງວຽງຈັນ ກໍ່ໄດ້ອອກແຈ້ງການໂຈະທຸກກິດຈະກໍາທີ່ມີຄົນຊຸມນຸມຫຼາຍໃນງານສະເຫຼີມສະຫຼອງປີໃໝ່ລາວ ເພື່ອປ້ອງກັນພະຍາດດັ່ງກ່າວ.

ໂດຍອີງຕາມ ໜັງສືທາງລັດຖະການ ຂອງຫ້ອງວ່າການນະຄອນຫຼວງວຽງຈັນ ສະບັບເລກທີ 391/ຫວນວ ລົງວັນທີ 19 ມີນາ 2020 ກ່ຽວກັບການສະເຫຼີມສະຫຼອງ ສົ່ງທ້າຍປີເກົ່າ ແລະ ຕ້ອນຮັບປີໃຫມ່ລາວ ພສ 2563 (ຄສ 2020) ອີງຕາມ ການລາຍງານຂອງພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ນະຄອນຫຼວງວຽງຈັນ ຄັ້ງວັນທີ 17 ມີນາ 2020; ອີງຕາມ ການຊີ້ນໍາ ຂອງກອງປະຊຸມເຈົ້າຄອງ-ຮອງເຈົ້າຄອງນະຄອນຫຼວງວຽງຈັນ ຮ່ວມກັບພະແນກການ, ອົງການລັດທຽບເທົ່າພະແນກການ ຂັ້ນນະຄອນຫຼວງວຽງຈັນ ແລະ ເມືອງທີ່ກ່ຽວຂ້ອງ ຄັ້ງທີ 77 ສະໄຫມທີ VI, ຄັ້ງວັນທີ 17 ມີນາ 2020.

ຫ້ອງວ່າການນະຄອນຫຼວງວຽງຈັນ ໄດ້ມີທິດຊີ້ນໍາດັ່ງນີ້:

1 ພື້ນຖານແມ່ນເຫັນດີຕາມການສະເໜີຂອງພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ນະຄອນຫຼວງວຽງຈັນ ໂດຍໃຫ້ ໂຈະທຸກໆກິດຈະກໍາທີ່ເຄີຍຈັດໃນປີຜ່ານມາເຊັ່ນ: ກິດຈະກໍາແຫ່ພະພຸດທະຮູບ ແລະ ກິດຈະກໍາປະກວດນາງສາວນະຄອນຫຼວງວຽງຈັນ. ສໍາລັບ ການຈັດງານບາສີສູ່ຂັວນ ຕາມສໍານັກງານ – ອົງການປົກຄອງ, ພະແນກການ ແລະ ບັນດາເມືອງ ຢູ່ນະຄອນຫຼວງວຽງຈັນ ແມ່ນບໍ່ເຫັນດີໃຫ້ຈັດ.

2 ເຫັນດີໃຫ້ອັງເຊີນພະຄໍາລົງມາ ເພື່ອຫົດສົງ ຢູ່ໃນຂອບເຂດກົມມະລຽນພະທາດຫຼວງ ແລະ ອັງເຊີນພະພຸດ ພະຮູບ ບັນດາວັດ ທົ່ວນະຄອນຫຼວງວຽງຈັນ ລົງຫົດສົງຕາມປະເພນີ ແຕ່ບໍ່ໃຫ້ມີການເຕົ້າໂຮມຄົນຈໍານວນຫຼາຍ ໃຫ້ເຂົ້າ ຫົດສົງ (ຊຸດລະ 30 ຄົນ), ໃນແຕ່ລະວັດໃຫ້ມີ ເຈວລ້າງມື, ເຄື່ອງກວດອຸນຫະພູມວັດໄຂ້ ແລະ ຜູ້ຄົນທີ່ເຂົ້າໄປຕ້ອງໃສ່ຜ້າ ປິດປາກ ເພື່ອປ້ອງກັນພະຍາດລະບາດ COVID-19.

3 ມອບໃຫ້ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ນະຄອນຫຼວງວຽງຈັນ ຮ່າງໜັງສືສະເໜີ ຂໍປິດຮ້ານບັນເທີງຊົ່ວຄາວ ຫຼື ມາດຕະການຈໍາກັດແຂກເຂົ້າຮ້ານ ຮອງຮັບຜູ້ທີ່ເຂົ້າໄປໃຊ້ບໍລິການຊຸດລະ 50 ຄົນ, ຈຸດເຂົ້າອອກ ຂອງຮ້ານຕ້ອງມີ ເຈວລ້າງມື, ເຄື່ອງກວດອຸນຫະພຸມວັດໄຂ້ ແລະ ຜ້າປິດປາກ ເພື່ອປ້ອງກັນພະຍາດລະບາດ COVID-19 ແລະ ຮ່າງບົດລາຍງານ ກ່ຽວກັບການສະເຫຼີມສະຫຼອງ ສົ່ງທ້າຍປີເກົ່າ ແລະ ຕ້ອນຮັບປີໃຫມ່ລາວ ພສ 2563 (ຄສ 2020) ເພື່ອຂໍທິດຊີ້ນໍາ ແລະ ຂໍການຕົກລົງ ຈາກລັດຖະບານ ໂດຍໄວ “.