ອົງຄະນະພັກ ກົມໃຫຍ່ການເມືອງກອງທັບ ເປີດກອງປະຊຸມໃຫຍ່ຜູ້ແທນຄັ້ງທີ V

809

ກອງປະຊຸມໃຫຍ່ຜູ້ແທນຄັ້ງທີ V ຂອງອົງຄະນະພັກກົມໃຫຍ່ການເມືອງກອງທັບ ໄດ້ໄຂຂຶ້ນຢ່າງເປັນທາງການໃນວັນທີ 18 ມີນາ 2020, ໂດຍມີ ທ່ານ ພົນເອກ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ, ລັດຖະມົນຕີ ກະຊວງປ້ອງກັນປະເທດ, ມີຜູ້ຕາງໜ້າ ຈາກບັນດາກົມໃຫຍ່, ຫ້ອງວ່າການກະຊວງ, ພະ ນັກງານປະຕິວັດອາວຸໂສບໍານານ, ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ

ໃນກອງປະຊຸມ ທ່ານ ພົນໂທ ທອງລອຍ ສິລິວົງ ກຳມະການສູນກາງພັກ ຮອງລັດຖະມົນຕີ ກະຊວງປ້ອງກັນປະເທດ ເລຂາຄະນະພັກກົມໃຫຍ່ ຫົວໜ້າກົມໃຫຍ່ການເມືອງກອງທັບ ໄດ້ຍົກໃຫ້ເຫັນໝາກຜົນແຫ່ງການ ເຄື່ອນໄຫວຊີ້ນຳ-ນຳພາ ວຽກງານຮອບດ້ານໃນໄລຍະ 5 ປີຜ່ານມາ ໂດຍປິ່ນອ້ອມຕາມ 4 ໜ້າທີ່ໃຫຍ່ 26 ແຜນງານ ທີ່ຄະນະພັກກະຊວງປ້ອງກັນປະເທດວາງອອກ ກໍຄື ມະຕິກອງປະຊຸມໃຫຍ່ ຄັ້ງທີ IV ຂອງອົງຄະນະພັກກົມໃຫຍ່ການເມືອງ ເຮັດໃຫ້ທົ່ວກົມໃຫຍ່ການເມືອງ ມີຄວາມສະຫງົບໜັກແໜ້ນ ສາມາດເປັນເສນາທິການດ້ານວຽກງານການເມືອງແນວຄິດ ໃຫ້ແກ່ກະຊວງປ້ອງກັນປະເທດ. ພ້ອມນັ້ນ, ກອງປະຊຸມ ຍັງໄດ້ເປັນເອກະສັນຢ່າງສົມບູນ ຮັບຮອງເອົາທິດທາງແຜນການ 5 ປີຕໍ່ໜ້າ ແລະ ປ່ອນບັດຄັດເລືອກເອົາຄະນະພັກ ກົມໃຫຍ່ການເມືອງກອງທັບ ຊຸດໃໝ່ ຈຳນວນ 15 ສະຫາຍ, ເລືອກເອົາຄະນະປະຈຳ ພັກອົງການກົມໃຫຍ່ການເມືອງກອງທັບຈຳນວນ 5 ສະ ຫາຍ, ພ້ອມກັນນັ້ນ, ກອງປະຊຸມຍັງໄດ້ເລືອກເອົາ ສະຫາຍ ພົນໂທ ທອງລອຍ ສິລິວົງ ເປັນເລຂາຄະນະພັກ, ສະ ຫາຍ ພົນຕີ ສອນທອງ ພົມລາວົງ ເປັນຮອງເລຂາຄະນະພັກ, ສະຫາຍ ພົນຈັດຕະວາ ວົງສອນ ອິນປານພິມ ເປັນປະທານກວດກາພັກ, ພ້ອມດຽວກັນນັ້ນ ກໍໄດ້ປ່ອນບັດຄັດເລືອກເອົາຜູ້ແທນສົມບູນ ແລະ ສຳຮອງ ໄປຮ່ວມກອງປະຊຸມ ນຳຄະນະພັກ ຂັ້ນເທິງບັນລຸຕາມຄາດໝາຍ

ໂອກາດດັ່ງກ່າວ, ສະຫາຍ ພົນເອກ ຈັນສະໝອນ ຈັນຍາລາດ ໄດ້ມີຄຳເຫັນໂອ້ລົມ ແລະ ໃຫ້ທິດຊີ້ນຳຫລາຍບັນຫາສຳຄັນ ເພື່ອເປັນແນວທາງ ແລະ ບ່ອນອີງໃຫ້ແກ່ຄະນະພັກຊຸດໃໝ່, ພ້ອມທັງໄດ້ເນັ້ນໜັກໃຫ້ເອົາໃຈ ໃສ່ສຶກສາອົບຮົມການເມືອງ-ແນວຄິດ ໃຫ້ພະນັກງານ-ນັກຮົບ ມີຄວາມຕື່ນຕົວປະຕິບັດແນວທາງນະໂຍບາຍຂອງພັກ, ມີນໍ້າໃຈຮັກຊາດ, ມີຄວາມຈົ່ງຮັກພັກດີຕໍ່ພັກ-ຕໍ່ປະຊາຊົນ, ເອົາໃຈໃສ່ຄົ້ນຄວ້າຮໍ່າຮຽນທິດສະດີການເມືອງ, ທິດສະດີມາກ-ເລນິນ, ແນວຄິດໄກສອນພົມວິຫານ, ມູນເຊື້ອ ແລະ ປະຫວັດສາດຂອງພັກ, ຂອງຊາດ, ແນວທາງນະໂຍບາຍຂອງພັກ-ລັດ ໃນແຕ່ລະໄລຍະ, ສືບຕໍ່ຫັນລົງກໍ່ສ້າງຮາກຖານການເມືອງ ຕິດພັນກັບການພັດທະນາຊົນ ນະບົດຮອບດ້ານຕາມ 4 ເນື້ອໃນ 4 ຄາດໝາຍ ແລະ ມະຕິ 3 ສ້າງ ທີ່ກົມການເມືອງສູນກາງພັກວາງອອກ, ຕັ້ງໜ້າ ປັບປຸງກໍ່ສ້າງກໍາລັງໃຫ້ເຂັ້ມແຂງຮອບດ້ານ, ຕ້ອງເປັນເຈົ້າການຍົກສູງສະຕິເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງ ດ້ວຍຕົນເອງ, ຮູ້ຊອກຄົ້ນ ແລະ ນໍາໃຊ້ທ່າແຮງບົ່ມຊ້ອນ ທີ່ມີເພື່ອສູ້ຊົນປະຕິບັດຄາດໝາຍ, ແຜນການກໍ່ສ້າງເສດຖະກິດ, ແກ້ໄຂຊີວິດການເປັນຢູ່ທີ່ກະຊວງປ້ອງກັນປະເທດ ວາງອອກໃຫ້ປະກົດຜົນເປັນຈິງ. ພ້ອມກັນນັ້ນ, ກໍປະຕິບັດແນວທາງການຕ່າງປະເທດຂອງພັກເຮົາໃນໄລຍະໃໝ່ໃຫ້ຖືກຕ້ອງ ແລະ ບັນຫາສໍາຄັນແມ່ນພ້ອມກັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງນີ້ ໃຫ້ເກີດໝາກເກີດຜົນຕົວຈິງ, ເຮັດໃຫ້ກົມໃຫຍ່ການ ເມືອງກອງທັບມີຄວາມໜັກແໜ້ນເຂັ້ມຂຶ້ນກວ່າເກົ່າ.
ຂ່າວ: ຍ້ອມເພັດ
ຂໍ້ມູນ ຂ່າວສານປະເທດລາວ