ການຄ້າ ນວ ແຈ້ງການ! ຫ້າມຂຶ້ນລາຄາສິນຄ້າຕາມລໍາພັງໃຈເດັດຂາດ ຫາກຝ່າຝືນຈະຖືກປະຕິບັດມາດຕະການຕາມລະບຽບກົດໝາຍ

548

ປັດຈຸບັນ ການລະບາດຂອງໂຄວິດ ຍິ່ງຮຸນແຮງຂຶ້ນນັບມື້ ເຮັດໃຫ້ພໍ່ແມ່ປະຊາຊົນ ວິຕົກກັງວົນ ໄປທົ່ວໂລກ ຫວັ່ນຕິດເຊື້ອດັ່ງກ່າວ ເຮັດໃຫ້ຄົຮຈໍານວນຫຼາຍຫຼີກລ່ຽງເດີນທາງໄປຍັງເຂດຊຸມຊົນ ໂດຍສະເພາະແມ່ນຕະຫຼາດ ເຮັດໃຫ້ເກີດມີການແຫ່ຊື້ສິນຄ່າເພື່ອກັກຕຸນຈໍານວນຫຼາຍ ເຊິ່ງອາດກາຍເປັນຊ່ອງຫວ່າງເຮັດໃຫ້ກຸ່ມຄົນຈໍານວນໜຶ່ງສວຍໂອກາດກັກຕຸນສິນຄ້າເພື່ອຂຶ້ນລາຄາໄດ້ ເຊິ່ງຫຼ້າສຸດພະແນກອຸດສາຫະກໍາ ແລະ ການຄ້າ ນະຄອນຫຼວງວຽງຈັນກໍ່ໄດ້ອອກແຈ້ງການເພື່ອປ້ອງກັນບໍ່ໃຫ້ເກີດບັນຫາດັ່ງກ່າວ.

ອີງຕາມແຈ້ງການ ຂອງ ພະແນກອຸດສາຫະກໍາ ແລະ ການຄ້າ ນະຄອນຫລວງວຽງຈັນ ເລື່ອງຮ່ວມແຮງຮ່ວມໃຈເພື່ອຕ້ານ ແລະ ສະກັດກັ້ນການແຜ່ລະບາດເຊື້ອຈຸລະໂລກ ໄວຣັດໂລນາ ສະບັບເລກທີ 0553/ອຄ.ນວ.ຄພນ ລົງວັນທີ 18 ມີນາ 2020 ໃຫ້ຮູ້ວ່າ: ປັດຈຸບັນສະພາບການແຜ່ລະບາດຂອງເຊື້ອຈຸລະໂລກ ໂຄວິດ-19 ໃນຫຼາຍປະເທດໄດ້ຂະຫຍາຍເປັນວົງກວ້າງ ເຖິງວ່າຢູ່ ສປປ ລາວ ຍັງບໍ່ທັນ ພົບແຕ່ກໍ່ມີຄວາມສ່ຽງ ສະນັ້ນ, ເພື່ອຮັບມືໃນການຕ້ານ ແລະ ສະກັດກັ້ນການແຜ່ລະບາດເຊື້ອຈຸລະໂລກດັ່ງກ່າວ, ຈີ່ງແຈ້ງມາຍັງທຸກພາກສ່ວນໃຫ້ປະຕິບັດຕາມດັ່ງນີ້:

1 ໃຫ້ທຸກຫົວຫນ່ວຍວິສາຫະກິດ ຈົ່ງຮ່ວມມືໃນການປະຕິບັດມາດຕະການເພື່ອຕ້ານ ແລະ ສະກັດກັ້ນການແຜ່ລະບາດເຊື້ອຈຸລະໂລກ ໂຄວິດ-19 ຢູ່ໃນຂອບເຂດຄວາມຮັບຜິດຊອບຂອງຕົນ, ໂດຍໃຫ້ມີການຕິດຕາມຂໍມູນຂ່າວສານການແຈ້ງເຕືອນຈາກຄະນະສະເພາະກິດ ແລະ ພາກສ່ວນທີ່ກ່ຽວຂ້ອງ, ປະຕິບັດຕາມມາດຕະການປ້ອງກັນຕາມຫຼັກວິຊາການທີ່ຂະແໜງສາທາລະນະສຸກໄດ້ວາງອອກຢ່າງເຂັ້ມງວດ.

2 ບໍ່ໃຫ້ມີການສວຍໂອກາດຂຶ້ນລາຄາສິນຄ້າ ແລະ ຄ່າບໍລິການ ຕາມລໍາພັງໃຈ, ກັກຕຸນສິນຄ້າ ທີ່ເປັນການກະທໍາເອົາປຽບຜູ້ບໍລິໂພກໂດຍບໍ່ຊອບທໍາ ແລະ ຈໍາໜ່າຍສິນຄ້າທີ່ບໍ່ມີຄວາມປອດໄພທາງດ້ານຄຸນນະພາບຢ່າງເດັດຂາດ, ພ້ອມກັນນັ້ນກໍ່ໃຫ້ນໍາເອົາສິນຄ້າຂອງຕົນອອກຈໍາຫນ່າຍສູ່ສັງຄົມເປັນປົກກະຕິ, ການດໍາເນີນທຸລະກິດຂອງທຸກຫົວຫນ່ວຍວິສາຫະກິດ ແມ່ນໃຫ້ສືບຕໍ່ເຄື່ອນໄຫວຕາມວັດຖຸປະສົງຂອງຕົນໃຫ້ຕໍ່ເນື່ອງ.

3 ຖ້າພາກສ່ວນທຸລະກິດໃດຫາກມີຄວາມຫຍຸ້ງຍາກ ຫຼື ມີຄວາມຈໍາເປັນໃນການເຄື່ອນໄຫວດໍາເນີນທຸລະກິດຂອງຕົນໃນຊ່ວງໄລຍະການເຝົ້າລະວັງເຊື້ອຈຸລະໂລກດັ່ງກ່າວ ແມ່ນໃຫ້ສະເໜີມາຍັງພະແນກອຸດສາຫະກໍາ ແລະ ການຄ້ານະຄອນຫຼວງວຽງຈັນ ເພື່ອຄົ້ນຄວ້າ, ນໍາສະເຫນີ ແລະ ພິຈາລະນາແກ້ໄຂຕາມລະບຽບການ

4 ແຈ້ງການສະບັບນີ້ ມີຜົນສັກສິດນັບແຕ່ມື້ລົງລາຍເຊັນເປັນຕົ້ນໄປ, ທຸກພາກສ່ວນທີ່ກ່ຽວຂ້ອງຈົ່ງຮັບຮູ້ ແລະ ພ້ອມກັນຈັດຕັ້ງ ປະຕິບັດຢ່າງເຂັ້ມງວດ, ຖ້າມີການລະເມີດຂໍ້ຫ້າມຂ້າງເທິງນີ້ ແມ່ນຈະຖືກປະຕິບັດມາດຕະການຕາມລະບຽບກົດຫມາຍ.

1510 ພົບເຫັນການສວຍໂອກາດຂຶ້ນລາຄາສິນຄ້າຕາມລຳພັງໃຈ, ບໍ່ໄດ້ຮັບຄວາມເປັນທຳໃນການຊື້-ຂາຍໂທລາຍງານໄດ້ທີ່ເບີສາຍດ່ວນ

ຮູບພາບ: ຂ່າວເສດຖະກິດການຄ້າ