ຜູ້​ຮູ້​ອະ​ທິ​ບາຍ ອາການແບບໃດ ຈຶ່ງເຂົ້າກໍລະນີສົງໄສ ຫລື ນິຍາມອາການຕິດເຊື້ອໂຄວິດ-19

458

ຈາກສະພາບການລະບາດຂອງພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ ຫລື ໂຄວິດ-19 ໃນປັດຈຸບັນ ໄດ້ເຮັດໃຫ້ປະຊາຊົນເກີດມີຄວາມຢ້ານກວາ, ບໍ່ສະບາຍໃຈ ແລະ ຢາກໄປກວດສຸຂະພາບຂອງໂຕເອງ ເພື່ອໃຫ້ແນ່ໃຈວ່າ ໂຕເອງຕິດເຊື້ອ ຫລື ບໍ່.

ຕໍ່ບັນຫາດັ່ງກ່າວ, ທ່ານ ດຣ.ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ອະທິບາຍຢ່າງແຈ່ມແຈ້ງວ່າ: ກໍລະນີທີ່ສົງໄສ ຫລື ເຂົ້ານິຍາມຂອງອາການຕິດເຊື້ອພະຍາດໂຄວິດ-19 ແມ່ນຕ້ອງເປັນໄຂ້, ໄອ, ຫາຍໃຈຍາກ ແລະ ມີປະຫວັດການເດີນທາງມາຈາກປະ ເທດທີ່ມີການລະບາດ ຫລື ໄດ້ພົວພັນກັບຜູ້ທີ່ຢັ້ງຢືນການຕິດເຊື້ອແລ້ວເທົ່ານັ້ນ. ຖ້າຫາກບຸກຄົນໃດ ຫາກມີອາການເປັນໄຂ້, ໄອ ຫລື ຈາມ ແຕ່ບໍ່ໄດ້ເດີນທາງໄປເຂດ ທີ່ມີການແຜ່ລະບາດຂອງເຊື້ອພະຍາດດັ່ງກ່າວ ຫລື ບໍ່ໄດ້ພົວພັນກັບຜູ້ທີ່ຢັ້ງຢືນການຕິດເຊື້ອໃດໆ ນັ້ນສະແດງວ່າບໍ່ໄດ້ເຂົ້າຂ່າຍກໍລະນີສົງໄສແຕ່ຢ່າງໃດ, ຖືວ່າເປັນໄຂ້, ເປັນໄອ ທຳມະດາຕາມລະດູການ. ຖ້າຫາກບຸກຄົນໃດເຂົ້າກໍລະນີສົງໄສ ຈະມີທີມແພດສະເພາະ ເດີນທາງໄປຫາຮອດເຮືອນທັນທີ ແລະ ເກັບຕົວຢ່າງມາກວດຢ່າງເລັ່ງດ່ວນ.

ການປ້ອງກັນໂຕເອງທີ່ດີທີ່ສຸດ ກໍຄື ການລ້າງມືເປັນຫລັກ ລ້າງໃສ່ສະບູ ແລະ ນໍ້າສະອາດ ຫລື ເຈວລ້າງມືເປັນປະຈຳ ເນື່ອງຈາກມືຂອງເຮົາເປັນພາຫະນຳເຊື້ອ ເພາະຄົນເຮົາມັກຈະຈັບໃບໜ້າ, ຕາ, ດັງ, ປາກ ເປັນປະຈຳ.

ຂ່າວ: ຂ​ປ​ລ