ຮອງ​ເຈົ້າ​ແຂວງ​ຄຳ​ມ່ວນ ຢືນ​ຢັນ​ຍັງ​ບໍ່​ມີ​ກໍ​ລະ​ນີ​ພົບ​ຜູ້​ຕິດ​ເຊື້ອ​ໄວ​ຣັ​ສ​ໂຄວິດ-19 ພາຍ​ໃນ​ແຂວງ

626

ແຂວງຄຳມ່ວນ ຍັງບໍ່ມີຜູ້ຕິດເຊື້ອໂຄວິດ-19 ສ່ວນກໍລະນີທີ່ມີການພົວພັນກັບຄົນໄທທີ່ເດີນທາງເຂົ້າມາແຂວງຄຳມ່ວນ ຜ່ານດ່ານຂົວມິດຕະພາບ 3 ຄຳມ່ວນ-ນະຄອນພະນົມ ຕາມແຈ້ງການຂອງສະຖານກົງສູນໃຫຍ່ແຫ່ງຣາຊະອານາຈັກໄທ ປະຈຳແຂວງສະຫວັນນະເຂດ ທີ່ເປັນກະແສໂດ່ງດັງໃນສື່ອອນລາຍ ແມ່ນຢູ່ໃນການຕິດຕາມຂອງແພດ-ໝໍ.

ທ່ານ ບຸນມີ ພິມມະສອນ ຮອງເຈົ້າແຂວງຄຳມ່ວນ ທັງເປັນຫົວໜ້າຄະນະສະເພາະກິດຄວບຄຸມ ແລະ ສະກັດກັ້ນການລະບາດຂອງພະຍາດອັກເສບປອດສາຍພັນໃໝ່ ໂຄວິດ-19 ຂັ້ນແຂວງ ໄດ້ຖະແຫຼງຂ່າວໃນເວລາ 17:00 ໂມງ ຂອງວັນທີ 18 ມີນາ 2020 ວ່າ: ສະພາບການລະບາດຂອງໂຄວິດ-19 ຫຼື ໂຄໂຣນາ ໄວຣັດ ສາຍພັນ ໃໝ່ແມ່ນມີຄວາມຮຸນແຮງ ແລະ ແຜ່ລາມໄປໃນຫຼາຍປະເທດ. ເຖິງວ່າຢູ່ໃນ ສປປ ລາວ ເວົ້າສະເພາະກໍ່ຄືແຂວງຄໍາມ່ວນຍັງບໍ່ທັນມີກໍລະນີຕິດເຊື້ອ ແຕ່ວ່າມີຄວາມສ່ຽງສູງເນື່ອງຈາກບັນດາປະເທດອ້ອມຂ້າງໄດ້ພົບຜູ້ຕິດເຊື້ອເພີ່ມຂຶ້ນ ໂດຍໄດ້ມີການໄປ-ມາຫາສູ່ ເຂົ້າ-ອອກຜ່ານດ່ານສາກົນໃນແຕ່ລະວັນ. ສຳລັບການເຝົ້າລະວັງຕໍພະຍາດດັ່ງກ່າວ ແມ່ນໄດ້ແຕ່ງຕັ້ງພະນັກງານແພດ-ໝໍ ລົງປະຈຳແຕ່ລະດ່ານສາກົນ ໂດຍມີເຄື່ອງກວດອຸນຫະພູມ ເພື່ອກວດກາຄົນທີ່ມີການເຄື່ອນໄຫວເຂົ້າ-ອອກໃນແຕ່ລະວັນ ພ້ອມນັ້ນກໍ່ໄດ້ອອກແຈ້ງການໃຫ້ປິດຊົ່ວຄາວດ່ານທ້ອງຖິ່ນ ແລະ ດ່ານປະເພນີຈຳນວນ 4 ແຫ່ງ ເພື່ອສະກັດກັ້ນການແຜ່ລະບາດຂອງພະຍາດດັ່ງກ່າວ.

ສຳລັບກໍລະນີຂອງຄົນໄທ ທີ່ຕິດເຊື້ອໂຄວິດ-19 ທີ່ໄດ້ເດີນທາງເຂົ້າມາແຂວງຄໍາມ່ວນ ໃນວັນທີ 12 ມີນາ 2020 ຕາມແຈ້ງການຂອງສະຖານກົງສູນໃຫຍ່ຣາຊະອານາຈັກໄທ ປະຈຳແຂວງສະຫວັນນະເຂດ ທາງທີມງານຂອງແຂວງກໍ່ໄດ້ຮີບຮ້ອນຕິດຕາມກວດກາ ໂດຍສະເພາະບຸກຄົນທີ່ຢູ່ໃນຮ້ານອາຫານຈຳນວນ 2 ແຫ່ງ ທີ່ຜູ້ຕິດເຊື້ອໄດ້ເຂົ້າໃຊ້ບໍລິການ ທາງພະນັກງານແພດ-ໝໍແມ່ນໄດ້ມີການດວກກາ ແຕ່ໃນປະຈຸບັນແມ່ນຍັງບໍ່ພົບກໍລະນີທີ່ເຂົ້າເຄືອຄ່າຍຕິດເຊື້ອໂຄວິດ-19. ເຖິງຢ່າງໃດກໍ່ຕາມບັນດາບຸກຄົນທີ່ຢູ່ໃນເປົ້າໝາຍ ແມ່ນຈະໄດ້ສືບຕໍ່ຕິດຕາມກວດກາຈົນຄົບຈຳນວນ 14 ວັນ.

ສຳລັບແຜນການຮັບມືໃນຕໍ່ໜ້າ ແມ່ນຈະໄດ້ເພີ່ມຈຳນວນພະນັກງານແພດ-ໝໍ ພ້ອມທັງເພີ່ມອຸປະກອນການກວດກາ ລົງປະຈຳໃນແຕ່ລະດ່ານສາກົນ ເພື່ອໃຫ້ມີຄວາມສະດວກໃນການປະຕິບັດ ແລະ ເຂັ້ມງວດໃນການກວດກາຂຶ້ນຕື່ມ ພ້ອມນັ້ນທ່ານຍັງໄດ້ຮຽກຮ້ອງໃຫ້ທຸກພາກສ່ວນຈົ່ງອຳນວຍຄວາມສະດວກ ແລະ ໃຫ້ການຮ່ວມມືແກ່ເຈົ້າໜ້າທີ່ ທີ່ກ່ຽວຂ້ອງ ເພື່ອຮັບປະກັນຢັບຢັ້ງການແຜ່ລະບາດຂອງພະຍາດດັ່ງກ່າວ.