ເສບຂ່າວຢ່າງມີສະຕິ! ເມືອງຫົງສາຊີ້ແຈງ ເຫດມີຄົນຊັອກຢູ່ຕະຫຼາດນັດແລ້ວຊ່າລືວ່າຕິດເຊື້ອໂຄວິດ-19

606

ໃນໄລຍະວັນທີ 12 ມີນາ 2020 ຫົງສາເກີດເຫດສັບສົນວຸ້ນວາຍ ຫຼັງມີກຸ່ມຄົນບໍ່ຫວັງດີວ່າມີເັດກນ້ອຍຕິດເຊື້ອໂຄວິດ-19 ແລະ ຊັອກຢູ່ກາງຕະຫຼາດນັດ, ເຊິ່ງເຮັດໃຫ້ປະຊາຊົນພາຍໃນທ້ອງຖິ່ນເກີດຄວາມຢ້ານກົວ, ຕໍ່ກັບບັນຫາດັ່ງກ່າວ ຫຼ້າສຸດ ເມືອງຫົງສາອອກແຈ້ງການຊີ້ແຈງແລ້ວ.

ອີງຕາມແຈ້ງການໃຫ້ຮູ້ວ່າ: ເດັກນ້ອຍຄົນດັ່ງກ່າວຊື່ ທ້າວເຢຍກີ ອາຍຸ 14 ປີ ປະຊາຊົນບ້ານປາກກາ ເມືອງຫນອງແຮດ ແຂວງຊຽງຂວາງໄດ້ຕິດຕາມພໍ່ແມ່ມາຂາຍເຄື່ອງຢູ່ຕະຫຼາດນັດເມືອງຫົງສາ ໃນວັນທີ 5 ມີນາ 2010, ຫຼັ້ງຈາກມາຂາຍເຄື່ອງຢູ່ຕະຫຼາດມາຮອດເວລາ 16 ໂມງ 00 ນາທີ ຂອງວັນທີ 12 ມີນາ 2020 ທ້າວ ເຢຍກີ ອາຍຸ 14 ປີ ຜູ້ເປັນລູກ ມີອາການຊັກແລ້ວລົ້ມລົງ ຢູ່ບໍລິເວນຕະຫຼາດນັດ ຈາກນັ້ນ ຄອບຄົວຜູ້ກ່ຽວ ກໍ່ໄດ້ນໍາຕົວມາປະຖົມພະຍາບານເບື້ອງຕົ້ນ ເພື່ອໃຫ້ປອດໄພ ເວລາດຽວກັນໄດ້ມີປະຊາຊົນຈໍານວນໜຶ່ງ ມາຊື້ເຄື່ອງຢູ່ໃນຕະຫຼາດນັດ ພົບເຫັນກໍ່ເລີຍແຕກຕື່ນ ຄິດວ່າຜູ້ກ່ຽວເປັນພະຍາດ COVID-19 ແລະ ປ່ອຍຂ່າວວ່າຜູ້ກ່ຽວລົ້ມຕາຍຢູ່ສະຖານທີ່ດັ່ງກ່າວ.

ເຊິ່ງເຮັດໃຫ້ປະຊາຊົນມີຄວາມກັງວົນ ຢ້ານກົວຕໍ່ເຫດການທີ່ເກີດຂຶ້ນ, ພາຍຫຼັງ ເຫດການເກີດຂື້ນ ອົງການປົກຄອງເມືອງໄດ້ແຕ່ງຕັ້ງເຈົ້າຫນ້າທີ່ກ່ຽວຂ້ອງ ລົງເກັບກໍາຂໍ້ມູນຢູ່ພື້ນທີ່ຕົວຈິງຢ່າງທັນການ ຜ່ານການກວດກາເກັບກໍາຂໍ້ມູນ ແລະ ການຢັ້ງຢືນຈາກແພດທີ່ໄດ້ວັດແທກອຸນຫະພູມ ແມ່ນ ” ບໍ່ມີອາການຂອງເຊື້ອ ພະຍາດໂຄວິດ-19 “. ພ້ອມນີ້ຈາກຄໍາຢັ້ງຢືນຂອງຄອບຄົວຜູ້ກ່ຽວເຫັນວ່າ: ຜູ້ກ່ຽວມີພະຍາດປະຈໍາຕົວເຄີຍເປັນບ້າຫມູມາແຕ່ນ້ອຍ, ຫຼັງຈາກນັ້ນອາການຜູ້ກ່ຽວກໍ່ຫາຍດີເປັນປົກກະຕິ ແລະ ຢໍ້າວ່າບໍ່ມີການເສຍຊີວິດຢູ່ສະຖານທີ່ແຫ່ງນີ້.