ເປີດຊຸດຝຶກອົບຮົມວຽກງານໂຄສະນາຂ່າວສານການເງິນ 6 ແຂວງພາກກາງ-ໃຕ້

644

ພະແນກໂຄສະນາ ແລະ ຂ່າວສານການເງິນ ຫ້ອງການກະຊວງການເງິນ, ຮ່ວມກັບຄະນະໂຄສະນາອົບຮົມສູນກາງພັກ ໄດ້ເປີດຊຸດຝຶກອົບຮົມວຽກງານໂຄສະນາ ແລະ ຂ່າວສານການເງິນຫັນເປັນສູ່ທັນສະໄໝ ຄັ້ງທີ IV ໃນຫົວຂໍ້: “ການຄຸ້ມຄອງ, ວິເຄາະ ແລະ ນໍາໃຊ້ສື່ສັງຄົມອອນລາຍ” ໂດຍການເຂົ້າຮ່ວມຂອງທ່ານ ຄຳເຜີຍ ໂສມຖາວອນ ຫົວໜ້າພະແນກການເງິນແຂວງອັດຕະປື, ມີທ່ານ ຄໍາວິສັນ ແກ້ວສຸວັນ ຜູ້ຊ່ວຍຫົວໜ້າຄະນະໂຄສະນາອົບຮົມສູນກາງພັກ, ມີນັກວິທະຍາກອນ, ນັກສໍາມະນາກອນ, ນັກຂ່າວສື່ມວນຊົນຂະແໜງການເງິນ 6 ແຂວງ ແລະ ນັກຂ່າວສື່ມວນຊົນຈາກພະແນກ ຖວທ 4 ແຂວງພາກໃຕ້, 2 ແຂວງພາກກາງ ແລະ ຫ້ອງການກະຊວງການເງິນເຂົ້າຮ່ວມ.

ຈຸດຂອງປະສົງຂອງການຝຶກອົບຮົມ ກໍ່ເພື່ອຕອບສະໜອງກັບຄວາມຮຽກຮ້ອງຕ້ອງການຂອງວຽກງານໂຄສະນາ-ຂ່າວສານຂະແໜງການເງິນໃນໄລຍະໃໝ່ທັນເປັນສະໄໝ, ທັນກັບສະພາບການໃນການພັດທະນາຂອງວຽກງານການເງິນໃນປັດຈຸບັນ ໂດຍສະເພາະການສ້າງບຸກຄະລາກອນດ້ານການຂ່າວຂອງຂະແໜງການເງິນໃຫ້ມີຄຸນນະພາບດີຂຶ້ນເລື້ອຍໆ, ທັງເປັນການຍົກລະດັບຄວາມຮູ້ຄວາມສາມາດທາງດ້ານວິຊາການຂ່າວເປັນກະບອກສຽງໃນການໂຄສະນາເຜີຍແຜ່ແນວທາງນະໂຍບາຍຂອງພັກ-ລັດ ທາງດ້ານການເງິນໃຫ້ອອກສູ່ສັງຄົມຢ່າງກ້ວາງຂວາງ.

ສໍາລັບວິຊາທີ່ນໍາມາຝຶກອົບຮົມໃນຄັ້ງນີ້ປະກອບມີ: ຄວາມຮູ້ພື້ນຖານຫຼັກການໃນການຂຽນບົດ, ຂຽນຂ່າວ, ການນໍາໃຊ້ສື່ສັງຄົມອອນລາຍ, ການຕອບຕ້ານຕໍ່ຂ່າວບິດເບືອນຂ່າວໃນສື່ສັງຄົມອອນລາຍ, ການປະສານງານ, ເກັບກໍາຂໍ້ມູນຂ່າວ ແລະ ສົ່ງຂ່າວຈາກການເງິນແຂວງເຖິງກະຊວງການເງິນ ເປັນຕົ້ນແມ່ນ: ການສົ່ງຂ່າວ, ຮູບພາບ, ວິດີໂອ ພ້ອມທັງມີການແນະນໍາການຖ່າຍວິດີໂອຂັ້ນພື້ນຖານ ແລະ ບັນຫາກ່ຽວຂ້ອງອື່ນໆຈໍານວນໜຶ່ງ,

ນອກຈາກ ສໍາເລັດການແນະນໍາພາກທິດສະດີແລ້ວຍັງລົງປະຕິບັດຕົວຈິງ ໂດຍໃຫ້ນັກສໍາມະນາກອນແບ່ງເປັນຈຸງານໃນການເກັບກໍາຂໍ້ມູນ, ກໍ່ຄືການສໍາພາດຂ່າວໃນແຕ່ລະສະຖານທີ່ເປັນຕົ້ນພະແນກ ການເງິນແຂວງອັດຕະປື, ຂະແໜງຄຸ້ມຄອງຊັບສິນຂອງລັດ, ຄັງເງິນແຫ່ງຊາດປະຈໍາແຂວງອັດຕະປືເພື່ອນໍາເອົາຂໍ້ມູນທີ່ໄດ້ນໍາມາຂຽນເປັນບົດ-ຂ່າວໃນຂັ້ນຕໍ່ໄປ.

ໂອກາດດັງກ່າວ, ທ່ານ ຄຳເຜີຍ ໂສມຖາວອນ ຫົວໜ້າພະແນກການເງິນແຂວງອັດຕະປື ໄດ້ມີຄຳເຫັນວ່າ: ວຽກງານໂຄສະນາ-ຂ່າວສານ ເປັນວຽກງານໜຶ່ງທີ່ສໍາຄັນໃນຂອບເຂດການເຄື່ອນໄຫວໜ້າທີ່ການ ເມືອງຂອງວຽກງານຂະແໜງການເງິນຂອງພວກເຮົາ ໃນການນຳເອົາແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ບັນດາຜົນງານຂອງຂະແໜງການເງິນເຜີຍແຜ່ອອກສູ່ສັງຄົມເພື່ອໃຫ້ປວງຊົນໄດ້ມີສະຕີຕື່ນຕົວໃນການປະກອບສ່ວນປະຕິບັດພັນທະຂອງພົນລະເມືອງດີຕໍ່ລັດເປັນຕົ້ນ: ແມ່ນພັນທະດ້ານພາສີ, ອາກອນກໍຄືຄ່າທຳນຽມ, ຄ່າບໍລິການຕ່າງໆ. ຊຸດສໍາມະນາດັ່ງກ່າວ, ຈັດຂຶ້ນໃນລະຫວ່າງວັນທີ 18-20 ມີນາ 2020 ທີ່ແຂວງອັດຕະປື.