ບໍ່ແກ້ວ-ຊຽງຣາຍ ຫາລືແກ້ໄຂບັນຫາຢາເສບຕິດຕາມຊາຍແດນ ລາວ-ໄທ

627

ໃນວັນທີ 04 ມີນາ 2020 ຜ່ານມານີ້, ກອງບັນຊາການທະຫານແຂວງບໍ່ແກ້ວ ຮ່ວມກັບ ໜ່ວຍເຮືອຮັກສາຄວາມສະຫງົບຕາມແລວຊາບແດນລ້ອງແມ່ນໍ້າຂອງຈັງຫວັດຊຽງຮາຍ ເຊິ່ງຈຸດປະສົງຂອງການຈັດກອງປະຊຸມປຶກສາຫາລືຮ່ວມກັນກ່ຽວກັບການແກ້ໄຂບັນຫາຢາເສບຕິດຕາມຊາຍແດນ ລາວ-ໄທ.

ໂດຍການເປັນປະທານຮ່ວມຝ່າຍລາວມີ ສະຫາຍ ພັນເອກ ວິດອນ ພຸດດາວົງ ໜ້າກອງບັນຊາການທະຫານແຂວງບໍ່ແກ້ວ, ຝ່າຍໄທນຳໂດຍ ນາວາເອກ ໄຫວພົດ ວິລະປະເສີດ ຜູ້ບັງຄັບການໜ່ວຍເຮືອຮັກສາຄວາມສະຫງົບຕາມແລວຊາບແດນລ້ອງແມ່ນໍ້າຂອງຈັງຫວັດຊຽງຮາຍພ້ອມດ້ວຍເຈົ້າໜ້າທີ່ກ່ຽວຂ້ອງຂອງສອງຝ່າຍເຂົ້າຮ່ວມ.

ກອງປະຊຸມດັ່ງກ່າວ, ທັງສອງຝ່າຍໄດ້ປຶກສາຫລືກ່ຽວກັບຂອບເຂດສິດ ແລະ ໜ້າທີ່ການປະຕິບັດງານແກ້ໄຂບັນຫາຢາເສບຕິດຕາມຊາຍແດນ ລາວ-ໄທ ເວົ້າສະເພາະ ບໍ່ແກ້ວ-ຊຽງຮາຍ ທີ່ໄດ້ຮັບການເຫັນດີຈາກຄະນະຊີ້ນຳທັງສອງຝ່າຍໃຫ້ສາມາດນຳໄປປະຕິບັດໄດ້ໂດຍໄວ ແລະ ເພື່ອເປັນການຈັດຕັ້ງ ພົບປະແລກປ່ຽນ ເຮັດໃຫ້ຮູ້ຈັກລະຫວ່າງໜ່ວຍປະສານງານປະຈໍາພື້ນທີ່ ແລະ ຄະນະປະຕິບັດງານເພື່ອແກ້ໄຂບັນຫາຢາເສບຕິດຕາມຊາຍແດນລາວ- ໄທ.

ເຊິ່ງທັງສອງຝ່າຍ ກໍ່ໄດ້ມີການແລກປ່ຽນຄໍາຄິດຄໍາເຫັນ ແລະ ລາຍງານສະພາບການເຄື່ອນໄຫວຄ້າຂາຍຢາເສບຕິດຂອງກຸ່ມຄົນບໍ່ດີຢູ່ບໍລິເວນຂອບເຂດທີ່ຕົນຮັບຜິດຊອບໃຫ້ກັນລະກັນຊາບ ເພື່ອພ້ອມກັນຊອກຫາຊ່ອງທາງແກ້ໄຂບັນຫາຢາເສບຕິດ ແລະ ປາກົດການຫຍໍ້ທໍ້ອື່ນໆທີ່ອາດຈະເກີດຂື້ນ ເພື່ອສ້າງໃຫ້ກາຍເປັນຊາຍແດນແຫ່ງສັນຕິພາບ, ມິດຕະພາບ, ປອດຢາເສບຕິດ ແລະ ມີການຮ່ວມມືກັນຢ່າງແທ້ຈິງ.ກອງປະຊຸມໄດ້ຈັດຂຶ້ນທີ່ຂົວມິດຕະພາບລາວ-ໄທແຫ່ງທີ 4 ຢູ່ເມືອງຫ້ວຍຊາຍ ແຂວງບໍ່ແກ້ວ.