ເມືອງສາມັກຄີໄຊ ຈະສູ້ຊົນໃຫ້ເສດຖະກິດຂະຫຍາຍຕົວບໍ່ຫຼຸດ 7,94% ຕໍ່ປີ

710

ທ່ານ ບຸນທະມາລີ ໝັ້ນອານົງ ເຈົ້າເມືອງເມືອງສາມັກຄີໄຊ ແຂວງອັດຕະປື ໄດ້ລາຍງານໃນກອງປະຊຸມໃຫຍ່ຜູ້ແທນອົງຄະນະພັກເມືອງສາມັກຄີໄຊ ແຂວງອັດຕະປື ຄັ້ງທີ VI ວ່າ: ຈະສູ້ຊົນເຮັດໃຫ້ຈັງ ຫວະການຂະຫຍາຍຕົວທາງດ້ານເສດຖະກິດບໍ່ໃຫ້ຫຼຸດ 7,94% ຕໍ່ປີ ແລະ ຮອດປີ 2024 ຈະເຮັດໃຫ້ເສດຖະກິດຂະຫຍາຍຕົວຢູ່ໃນລະດັບ 7,98%; ສືບຕໍ່ສ້າງມູນຄ່າເພີ່ມ ປະມານ 1.198 ກວ່າຕື້ກີບ, ສະເລ່ຍລາຍຮັບໃສ່ຫົວຄົນໃຫ້ໄດ້ປະມານ 27 ລ້ານກີບ; ສູ້ຊົນແກ້ໄຂຄວາມທຸກຍາກໃຫ້ຍັງເຫຼືອ 5% ຂອງຄອບຄົວທຸກຍາກທັງໝົດໃນທົ່ວເມືອງ ແລະ ລຶບລ້າງບ້ານທຸກຍາກໃຫ້ໄດ້ 100%.

 ກອງປະຊຸມໃຫຍ່ຜູ້ແທນອົງຄະນະພັກເມືອງສາມັກຄີໄຊ ແຂວງອັດຕະປື ຄັ້ງທີ VI ໄດ້ອັດລົງດ້ວຍຜົນສຳເລັດຢ່າງຈົບງາມ ພາຍຫລັງໄດ້ດຳເນີນເປັນເວລາ 2 ວັນ ນັບແຕ່ວັນທີ 5 -​ 6 ມີນາ 2020 ຜ່ານມາ ທີ່ສະໂມສອນຫ້ອງວ່າການປົກຄອງເມືອງ ໂດຍການເຂົ້າຮ່ວມຂອງສະຫາຍ ເລັດ ໄຊຍະພອນ ເລຂາຄະນະບໍລິຫານງານພັກແຂວງ ເຈົ້າແຂວງອັດຕະປື, ມີບັນດາການນຳຂັ້ນແຂວງ,​ຂັ້ນເມືອງ,​ ພະນັກງານບຳນານ ພ້ອມດ້ວຍຜູ້ແທນສົມບູນເຂົ້າຮ່ວມ.​

ຕະຫຼອດໄລຍະຂອງການດຳເນີນກອງປະຊຸມເປັນເວລາສອງວັນ ບັນດາຜູ້ແທນທີ່ເຂົ້າຮ່ວມຕ່າງກໍ່ໄດ້ພ້ອມກັນຄົ້ນຄວ້າຕີລາຄາຄືນການຈັດຕັ້ງປະຕິບັດແນວທາງປຽ່ນແປງໃໝ່ຮອບດ້ານທີ່ມີຫລັກການຂອງພັກກໍ່ຄືການຈັດຕັ້ງປະຕິບັດເນື້ອໃນຈິດໃຈມະຕິກອງປະຊຸມໃຫຍ່ຂອງອົງຄະນະພັກເມືອງ, ເສີມຂະຫຍາຍດ້ານຕັ້ງໜ້າ, ຊອກຫາວິທີແກ້ໄຂຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ເພື່ອພ້ອມກັນປັບປຸງແກ້ໄຂ ແລະ ກຳນົດທິດທາງ 5 ປີຕໍ່ຫນ້າ.

ໂອກາດດຽວກັນນີ້, ກອງປະຊຸມຍັງໄດ້ເປັນເອກະພາບກັນຮັບຮອງເອົາຮ່າງບົດລາຍງານການເມືອງ, ແຜນພັດທະນາເສດຖະກິດ-ສັງຄົມ ເປັນຕົ້ນ: ໄດ້ຮັບຮອງເອົາຄາດໝາຍສູ້ຊົນເຮັດໃຫ້ຈັງຫວະການຂະຫຍາຍຕົວທາງດ້ານເສດຖະກິດບໍ່ໃຫ້ຫຼຸດ 7,94% ຕໍ່ປີ ແລະ ຮອດປີ 2024 ຈະເຮັດໃຫ້ເສດຖະກິດຂະຫຍາຍຕົວຢູ່ໃນລະດັບ 7,98%, ສ້າງມູນຄ່າເພີ່ມ ປະມານ 1.198 ກວ່າຕື້ກີບ, ສະເລ່ຍລາຍຮັບໃສ່ຫົວຄົນໃຫ້ໄດ້ປະມານ 27 ລ້ານກີບ; ສູ້ຊົນແກ້ໄຂຄວາມທຸກຍາກໃຫ້ຍັງເຫຼືອ 5% ຂອງຄອບຄົວທຸກຍາກທັງໝົດໃນທົ່ວເມືອງ ແລະ ລຶບລ້າງບ້ານທຸກຍາກໃຫ້ໄດ້ 100%.

ກອງປະຊຸມຍັງໄດ້ດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ ເຊິ່ງຜົນຂອງກອງປະຊຸມໄດ້ຕົກລົງເລືອກເອົາ ສະຫາຍ ບຸນທະມາລີ ໝັ້ນອານົງ ເປັນເລຂາຄະນະບໍລິຫານງານພັກເມືອງ, ສະຫາຍ ຄຳໝັ້ນ ສີສະໝຸດ ເປັນຮອງເລຂາ,​ ສະຫາຍ ນ ພຸດມະໄລພອນ ແກ້ວວົງສາ ເປັນຮອງເລຂາທັງເປັນປະທານກວດກາ.