ພະແນກການເງິນ ນະຄອນຫຼວງວຽງຈັນ ທາບທາມຄະນະພັກຮາກຖານຊຸດໃໝ່

501

ໃນວັນທີ 20 ກຸມພາ 2020 ທີ່ຫ້ອງປະຊຸມຫ້ອງວ່າການປົກຄອງນະຄອນຫຼວງວຽງຈັນ (ນວ), ຄະນະພັກຮາກຖານພະແນກການເງິນ ນະຄອນຫຼວງວຽງຈັນ (ນວ) ໄດ້ເປີດກອງປະຊຸມທາບທາມບຸກຄະລາກອນເຂົ້າໃນຄະນະພັກຮາກຖານພະແນກການເງິນ ນວ ຊຸດໃໝ່. ໂດຍການເປັນປະທານຂອງສະຫາຍ ສີຫຸນ ສິດທິລືໄຊ ຮອງເລຂາຄະນະພັກ ຮອງເຈົ້າຄອງນະຄອນຫຼວງວຽງຈັນ, ມີສະຫາຍ ຄຳພັນ ມາລາບັນດິດ ຄະນະປະຈຳພັກ ເລຂາຄະນະພັກຮາກຖານ ພະແນກການເງິນ ນວ, ມີຮອງເລຂາຄະນະພັກ, ເລຂາ-ຮອງເລຂາໜ່ວຍພັກ, ພ້ອມດ້ວຍສະມາຊິກພັກສົມບູນ-ສຳຮອງເຂົ້າຮ່ວມ.

ໃນກອງປະຊຸມ,ສະຫາຍ ສິລິລາດທົງສິນ ທອງເພັງ ຮອງເລຂາຄະນະພັກຮາກຖານພະແນກການເງິນ ນວ ໄດ້ລາຍງານຜົນສຳເລັດກອງປະຊຸມຂອງໜ່ວຍພັກ ແລະ 3 ອົງການຈັດຕັ້ງມະຫາຊົນທີ່ຂຶ້ນກັບຄະນະພັກຮາກຖານ ພ້ອມທັງຜ່ານບົດສຳຫຼວດການນຳພາລວມ, ຊຶ່ງເຫັນໄດ້ຄວາມໝາຍຄວາມສຳຄັນຂອງວຽກງານພັກ, ບັນດາສະຫາຍໄດ້ເອົາໃຈໃສ່ໃນການຈັດຕັ້ງວຽກງານຕົວຈິງບົນພື້ນຖານຖືເອົາຄວາມສາມັກຄີພາຍໃນ ແລະ ພາຍນອກເປັນກົກ ສະ ແດງອອກໃນການດຳເນີນຊີວິດການເມືອງ ແລະ ການດຳເນີນກອງປະຊຸມໃຫຍ່ຂອງແຕ່ລະໜ່ວຍພັກແມ່ນມີຜົນສຳ ເລັດຕາມລະດັບຄາດໝາຍ.

ກອງປະຊຸມ, ສະຫາຍ ຄຳມາ ແສງມີໄຊ ຮອງຫົວໜ້າຄະນະຈັດຕັ້ງ ນວ ໄດ້ຜ່ານມາດຖານ-ເງື່ອນໄຂຂອງຜູ້ສະໝັກເລືອກຕັ້ງເປັນຄະນະພັກຊຸດໃໝ່, ຊຶ່ງໄດ້ດຳເນີນການທາມຜູ້ທີ່ສະໝັກຮັບເລືອກຕັ້ງເຂົ້າໃນຄະນະພັກຮາກຖານພະແນກການເງິນ ນວ 3 ຮອບຊຶ່ງມີຜູ້ສະໝັກຄົນເກົ່າ 3 ສະຫາຍ ແລະ ຜູ້ສະໝັກໃໝ່ 24 ສະຫາຍ, ຊຶ່ງກອງປະຊຸມປະຖົມມະລຶກຄັດເລືອກເອົາ 9 ສະຫາຍເພື່ອລົງສະໝັກເລືອກຕັ້ງເປັນຄະນະພັກຮາກຖານພະແນກການເງິນການເງິນ ນະຄອນຫຼວງວຽງຈັນຊຸດໃໝ່.

ໂອກາດດັ່ງກ່າວ, ໄດ້ຮັບຟັງການການໂອ້ລົມ ແລະ ໃຫ້ທິດຊີ້ນຳຂອງສະຫາຍ ສີຫຸນ ສິດທິລືໄຊ ຮອງເລຂາຄະນະພັກ ຮອງເຈົ້າຄອງ ນວ, ຊຶ່ງສະຫາຍໄດ້ເນັ້ນໃຫ້ເພີ່ມທະວີບົດບາດນຳພາໃນນັ້ນຕົ້ນ: ແມ່ນພະນັກງານ-ສະ ມາຊິກພັກຕ້ອງມີຄວາມຮູ້ຄວາມສາມາດ, ສົມຄູ່ກັບໜ້າກັບໜ້າທີ່ການເມືອງ ແລະ ຄວາມຮຽກຮ້ອງຕ້ອງການໃນໄລຍະໃໝ່, ຄະນະພັກ, ຄະນະໜ່ວຍ ແລະ ສະມາຊິກພັກທຸກສະຫາຍ, ຈົ່ງເຊີດຊູຄວາມຮັບຜິດຊອບໃນໜ້າທີ່ການ ເມືອງຂອງຕົນ, ຕັດສິນໃຈຜ່ານຜ່າຄວາມຫຍຸ້ງຍາກ, ເຕົ້າໂຮມຄວາມສາມັກຄີເປັນປຶກແຜ່ນ ແລະ ມີຄວາມເປັນເອກະພາບສູງເພື່ອພາລະກິດປົກປັກຮັກສາ ແລະ ສ້າງສາພັດທະນາປະເທດຊາດສູ່ຈຸດໝາຍສັງຄົມນິຍົມເທື່ອລະກ້າວ.