ຄົ້ນພົບກະໂຫລກຫົວຄົນບູຮານ ອາຍຸ 2.000 ປີ ຢູ່ເຂດທົ່ງໄຫຫີນ 1 ຄາດຍັງມີຫລາຍ

658

ໃນວັນທີ 22 ກຸມພາ 2020, ເຈົ້າຫນ້າທີ່ລາວ ແລະ ຊ່ຽວຊານຈາກປະເທດອົດສະຕາລີແປກໃຈຫລາຍ ພາຍຫລັງຄົ້ນພົບກະໂຫລກຫົວຄົນບູຮານຢ່າງຕໍ່ເນື່ອງຢັງຢາຍຢູ່ບໍລິເວນໄຫຫີນຢູ່ແຂວງຊຽງຂວາງ ແລະ ຄາດວ່າມີອາຍຸບໍ່ຕໍ່າກວ່າ 2000 ປີ ຂະນະດຽວກັນທົ່ງໄຫຫີນແຫ່ງດັ່ງກ່າວຫາກໍຖືກຮັບຮອງເອົາເປັນມໍລະດົກໂລກແຫ່ງທີ 3 ຕໍ່ຈາກເມືອງມໍລະດົກໂລກຫລວງພະບາງ ແລະ ຜາສາດຫີນວັດພູຈໍາປາສັກ.

ຕາມການໃຫ້ສໍາພາດຂອງ ທ່ານ ວົງສາ ດວງທອງລາ ຫົວໜ້າພະແນກ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງຊຽງຂວາງ ລົງຕິດຕາມການຄົ້ນພົບກະໂຫຼກບູຮານຢູ່ແຫຼ່ງທ່ອງທ່ຽວ ທົ່ງໄຫຫີນ 1, ເຊິ່ງຄະນະກອງບູຮານວິທະຍາ ກົມມໍລະດົກ ກະຊວງ ຖວທ ຮ່ວມກັບຊ່ຽວຊານ ມະຫາວິທະຍາໄລແຫ່ງຊາດ ອົດສະຕາລີ ໄດ້ຄົນພົບກະໂຫຼກດັ່ງກ່າວ.

ທ່ານ ດຣ ທອງລິດ ຫຼວງໂຄດ ຫົວໜ້າກອງບູຮານວິທະຍາ ກົມມໍລະດົກ ກະຊວງ ຖວທ ພ້ອມ ທ່ານ ດຣ ດູກູ ໂອລາຍລີ ແລະ ດຣ ຫຼຸຍ ຊີວອນ ຊ່ຽວຊານມາຈາກ ອົດສະຕາລີ ພ້ອມທີມງານວິຊາການຈາກຂັ້ນແຂວງ ແລະ ເມືອງ ເປີດເປີຍວ່າ ໂດຍເລີ່ມສໍາຫຼວດ ແລະ ຂຸດຄົ້ນ ຢູ່ທົ່ງໄຫຫີນ 1 ເປັນຄັ້ງທີ 2, ເຊິ່ງເລີ່ມມາແຕ່ທ້າຍເດືອນມັງກອນ 2020 ເປັນຕົ້ນມາ. ການຄົ້ນພົບໃນຄັ້ງນີ້ ພົບກະໂຫຼກມະນຸດບູຮານ 5 ກະໂຫຼກ ໃນນັ້ນ ສົມບູນ 3 ກະໂຫຼກ ແລະ ບໍ່ສົມບູນ 2 ກະໂຫຼກ; ພົບຫີນປູນ, ເຕົາດິນເຜົາ, ໄຫນ້ອຍ, ໝາກກະດິ່ງ, ທອງສໍາລິດ ແລະ ໝາກປັດຈໍານວນໜຶ່ງ, ຈາກການສັນນິຖານ ໂຄງກະດູກ ແລະ ວັດຖຸເຫຼົ່ານີ້ມີອາຍຸປະມານ 2.000 ກວ່າປີ.

ແນວໃດກໍ່ຕາມຕໍ່ກັບສິ່ງທີ່ຄົ້ນພົບໃນຄັ້ງນີ້ ທ່ານ ດຣ ທອງລິດ ຫຼວງໂຄດ ບອກວ່າ: ວັດຖຸທີ່ຄົ້ນພົບຈະມີທີ່ມາຈາກໃສນັ້ນ ກໍ່ຍັງຄົງເປັນຄໍາຖາມ, ແຕ່ສິ່ງທີ່ບອກໄດ້ຕອນນີ້ຈາກຫຼັກຖານທີ່ພົບແມ່ນການເຮັດພິທີກໍາຝັງກະດູກຄັ້ງທີ 2.

ນອກຈາກນັ້ນ ຄະນະຊ່ຽວຊານຍັງເຊື່ອວ່າອາດຍັງຫລົງເຫລືອຢັງຢາຍຊະຊາຍໄປຕາມພື້ນທີ່ທົ່ງໄຫຫີນກໍເປັນໄດ້.

ແນວໃດກໍດີ ການສະເຫລີມສະຫລອງການເຂົ້າເປັນມໍລະດົກໂລກຂອງທົ່ງໄຫຫີນແຫ່ງທີ 3 ຈະຈັດຂຶ້ນຢ່າງຍິ່ງໃຫຍ່ ພາຍຫລັງສໍາເລັດງານສະເຫລີມສະຫລອງກິລາແຫ່ງຊາດຢູ່ແຂວງຊຽງຂວາງ.

ໂດຍ: ນໍ້າອອ້ຍຂົມ